Pwede abwa 2

Ekɔn ebe ndɔngwe Efɛsɔs

1Engɔ wɛ a me nu ezɔɔrɔ gho ngɛ gɛrɛ wu ga ena kpe, Ŋwɛʼrɛ ebe ato efwɔ eshunu bɔ Ngwe a Efɛsɔs kpe, “Azɔnɔ na aga egho wɛ e me klini ńtɔrɔta sàambyɛ abwo nde mɔ gɛrɛ ma zhiri abwaʼ achud tɛʼɛ anâm sàambyɛ yɛ e me ndeere ene aklibi àfɔ̀n ngɛ. 2Mmɛ we nɛɛ eleabwa ndzɔn, gɛ̀rɛ̀ nɛɛ aŋu mbɔn à fwɛʼ ekama, mane eklinitaa ndzɔn. Mmɛ we nɛɛ kpe mbɔn ke ma ndɛʼ afwɔ ebe abɔ byɛ e ma tee abwa bɔɔbɔɔ ngɛ bo, mbɔn shi zhweʼre abɔ byɛ e ma ga kpe mbɔɔ na bèmpwɔnɔntɔm shi ne mwɔ angɔ bo ngɛ, mbɔn shi zɔ kpe na bàmɛnɛkɔn andɔɔ. 3Mbɔn shi klini etaa gɛrɛ zɔ ǹgoʼ ene ekumu ngu, bɛʼngɛ ńtara ntsɔn a da me kama, mbɔʼnga mbɔn ma bɔ bɛɛrɛ abwa mbu. 4Bɛʼngɛ ebwa deʼ we twa angu mbɔʼ mbɔn, kpe mbɔn ke wu doʼ angu na aŋu a mwɔ ambèmbè ngɛ bo. 5Éngɛ mbɔn zhuŋu afwɔ yɛ mbɔn me go ebwa ngɔɔ bwɛn aŋu ngɛ. Mbɔn waʼ abwa bɔɔbɔɔ ndzɔn è fwɛʼ aŋu mbɔn à de ma fwɛʼ endzobo mbɔn a klada kiri Yeso ngɛ, ne me éngɛ bo, mala mbɔn ma fɔɔ embè ene abwa bɔɔbɔɔ, mmɛ wa anji ma zeʼe é chi echud tɛʼ anâm ndzɔn afwɔ mɔ mala mbɔn ne kobo bo. 6Bɛʼngɛ ebwa ǹchwɔ̀ mbɔn me le ngɛ ne ga kpe, mbɔn be gwe afwɛʼ Nikolɛtans mane ǹtìmi mɔ na mmɛ gɛrɛ me gwe ngɛ.” 7“Egho wɛ me le ètimi ngɛ e zo ebwa wɛ azhwɛɛrɛ Ngwe ma gà ebe ndɔrɔngwe ngɛ. Ebe egho wɛ ngwe fɔɔ abwa bɔɔbɔɔ ngɛ, mmɛ wa ndɛʼ afwɔ ebe egho wɛ é nde anta azɔd yɛ a ma le gho ma tye ekɔʼɔ akyɛ gimkpaʼ ngɛ. Azɔd zɔnɔ ya tɛ̀bɛ a Paradays ngɛ.”

Ekɔn ebe ndɔngwe a Simayna

8Engɔ gɛrɛ wu ga ene kpe, Ŋwɛʼrɛ ebe ato a ndɔngwe Simayna kpe, “Ewunɔ ne ekɔn wɛ e me zeʼe ebe egho wɛ e mwɔ ǹtsembè gɛrɛ mwɔ koochim ngɛ, wɛ a me ku gɛrɛ shi wu mwɔ ekɔʼɔ ngɛ kpe, 9‘Mmɛ we nɛɛ ǹgoʼ mane ndzaŋa yɛ mbɔn mwɔ efwɔ ngɛ, bɛʼngɛ mbɔn be fɔ̧rɔ ene azhwɛɛrɛ. Mmɛ we nɛɛ abwa bɔɔbɔɔ yɛ abɔ byɛ e ma ga kpe mbɔɔ na bɔ Juu shi ne mwɔ angɔ bo, ma ga mbɔʼ mbɔn ngɛ. Angɔ na ǹtìmi yɛ mwɔ engɔ asatan ngɛ! 10Mbɔn ke bum enyii yɛ e ma ké zeʼe endɔn ngɛ bo. Mbɔn zhuru, asatan ya ngo kwà̧ʼrà angɔn e ge adeʼ a dzɔm, éngɛ enyii ndzɔn ya ngo mwɔ efwɔ enji wum, bɛʼngɛ mbɔn le ebɛrɛtaa ene mmɛ, ka de mwɔ ewu mbɔn fɔɔ embè é le ebɛrɛtaa ene mmɛ. Mala mbɔn le éngɛ shi mmɛ wa ngo ndɛ̀ʼ angɔn etyê nè ǹtsara ndzɔn ene ende ato nɔ.’ 11Éngɛ mala mbɔn me le ètimi, mbɔn zhuru ebwa wɛ azhwɛɛrɛ ma ga ebe ndɔrɔngwe.” Abɔ byɛ e ma nde ato ngɛ, ewu nùrù fyee yà na angɔ mɔmɔ.

Ekɔn ebe ndɔngwe abɛ Pɛgamum

12Engɔ gɛrɛ wu ga ena kpe, Ŋwɛʼrɛ ebe ato a ndɔngwe Pɛgamum kpe, “Ewunɔ ne ekɔn wɛ e me zeʼe ebe egho wɛ è me le ebye twatwa ebɛɛ fyee ngɛ.” 13Mmɛ we nɛɛ afwɔ yɛ mbɔn ma tsɔmɔ ngɛ, ǹtɔʼ asatan na aŋu. Mbɔn be ga éŋwaʼa ena, mbɔn ke waʼa ebɛrɛtaa ekwa ngu bo. Kà de mwɔ èndzobo chɛ â zhudu Antipas antsɛ ebɛrɛtaa ngu wɛ â zhu engɔ abwaʼ ndzɔn awaʼa, afwɔ yɛ asatan ma mwɔ ngɛ. 14Bɛʼngɛ bwo abwa deʼ ya twa ngu nè mbɔn. Bɔ deʼ abwaʼ ndzɔn na kìrì ma abwa Balam à ma tee ngɛ. Balam wɛ à tee ebe Balak aghɛʼnji é gbèe bɔ Israel sàa efwɔ abwa bɔɔbɔɔ aŋu à tiri angɔ é nde ande yɛ â me tɔ̧ɔrɔ ngwere bli anyi ngɛ. Engɔ à gɛrɛ le angɔ le abwa bɔɔbɔɔ ene endese. 15Nkirinkin mbɔn be le bɔ akɛkɛ abwaʼ ndzɔn byɛ e ma kìrì abwa yɛ Nikolɛtans ma tee ngɛ. 16Enjitsɔ mbɔn waʼ abwa bɔɔbɔɔ ndzɔn. Mala mbɔn ne waʼ abwa bɔɔbɔɔ ndzɔn bo shi afwɔ mpiʼ mmɛ wa zeʼe awaʼa é ngwè abɔ byɛ ene ebye ebɛɛ fyee wɛ e ma gli eklo ngu ngɛ. 17Mala mbɔn me le ètimi, mbɔn zhuru ebwa wɛ azhwɛɛrɛ ma ga ebe ndɔrɔngwe ngɛ. Mmɛ wa ngo ndɛ̀ʼ manaa yɛ mmɛ me shi ebe abɔ byɛ e shi ngwe fɔɔ abwa bɔɔbɔɔ ngɛ. Mmɛ gɛrɛ wa ndɛʼ etye bla ebe gho ŋwàʼaŋwàʼ abwaʼ angɔ. E be ŋwɛʼrɛ ekumu fe deʼ edɔm etye yɛ, à me nɛɛ tye egho e ma nu ngɛ tsɛʼ egho tsɛrɛ bo.

Ekɔn ebe ndɔngwe a Tyatira

18Engɔ gɛrɛ wu ga ena kpe Ŋwɛʼrɛ ebe ndɔngwe a Taytira kpe,

“Ekɔn wunɔ ne zeʼe ebe ŋwɔ Ngwe wɛ aghɔɔ ma bɔ̀ ato ne éwu nɔ, elo ma nɛŋɛrɛ na atɔrɔ e me shii nɔ. 19Mmɛ we nɛɛ ebwa mbɔn ma le ngɛ, mmɛ we nɛɛ kpe mbɔn be doʼo angu, gɛ̀rɛ̀ me le ebɛrɛ ene mmɛ. Mmɛ we nɛɛ aŋu mbɔn ma fwɛʼ ena ngɛ mane eklinitaa yɛ mbɔn me le ngɛ. Mmɛ we nɛɛ kpe mbɔn ba fwɛʼ enjitsɔ fɔɔ aŋu mbɔn à dye ma fwɛʼ èndzobo chɛ mbɔn à le ebɛrɛ ene mmɛ ngɛ. 20Bɛʼngɛ ebwa wɛ e me see angu nè mbɔn ngɛ ne ga kpe, mbɔn na zhwezhwe nè aye wɛ e ma zɔʼrɔ kpe Jɛsɛbɛl, wɛ engɔ ga kpe mbè na àmɛnɛkɔn Ngwe ngɛ. Ene etee abwa ngɔ, è wa gbèe bɔ afwɛʼ mbu saa efwɔ endese, gɛ̀rɛ̀ ma ga kpe angɔ sa nde ande yɛ e ma tɔ̧ɔrɔ ngwere bli anyi ngɛ. 21Mmɛ shi ndɛʼ endzobo ebe engɔ é waʼ abwa bɔɔbɔɔ mɔ, bɛʼngɛ e ke doʼo é saara endese mɔ bo. 22Éngɛ mmɛ wa ngo gè aŋwan ekwa ngɔ gɛrɛ gè enyii ekwa abɔ byɛ â ma bwɛnɛ nè engɔ ngɛ enjitsɔ kɔʼtye angɔ kobo ene abwa ǹchù yɛ angɔ à le nè engɔ ngɛ bo. 23Mmɛ na ngo zhudu bɔ gimkpaʼ byɛ â ma kìrì abwa engɔ ngɛ, ndɔrɔngwe gimkpaʼ gɛrɛ nɛɛ kpe na mmɛ wɛ mmɛ me nɛɛ ezhuŋu gho ŋwàʼaŋwàʼ mane abwa yɛ a mwɔ efwɔ ńtara angɔ ngɛ. Mmɛ wa ge enyii ekwa gho ŋwàʼaŋwàʼ abwaʼ ndzɔn ene abwa yɛ engɔ shi fwɛʼ ngɛ.

24Bɛʼngɛ mbɔn abɔ abê a Taytira, mbɔn ke shi kiri etee abwa bɔɔbɔɔ zɔnɔ bo. Mbɔn ke shi bɛɛrɛ abwa abɔ abê ma zɔʼrɔ kpe ‘engwɔm abwa nɛŋɛ asatan’ ngɛ bo. Mmɛ ga endɔn kpe mmɛ ke ma ngo ge ediri deʼ akwa ndzɔn bo. 25Mbɔn fɔɔ embè é le ebɛrɛ ene mmɛ bwɛrɛ èndzobo chɛ mmɛ ma zeʼe ngɛ. 26Ebe abɔ byɛ e ngwe fɔɔ abwa bɔɔbɔɔ, ma le abwa yɛ mmɛ ma ke ngɛ, mmɛ wa ndɛʼ ekama yɛ mmɛ à nu ebe àtɛ ngu ngɛ ebe angɔ. Mmɛ wa ndɛʼ ekama ebe angɔ é klini ebɛ efwɔ ese gimkpaʼ bwɛn endzobo chɛ angɔ ma kudu ngɛ. 27Angɔ ba klini ese ene ebwo kamakam, e dzɛ̀ddɛ̀ bɔ abwa bɔɔbɔɔ na àti àkɔ ma dzɛ̀ddɛ̀ chwâ e ndeere ekɔɔ nɔ. 28Aŋu àtɛ ngu shi ndɛʼ ekama ena ngɛ, mmɛ gɛrɛ wa ngo ndɛʼ ekama ebe abɔ byɛ a ngwe fɔɔ abwa bɔɔbɔɔ ngɛ. Mmɛ gɛrɛ wa ndɛʼ etɔrɔta enchwenchwe ebe angɔ mbɔʼnga angɔ shi fɔɔ. 29Abɔ byɛ e me le ètimi ngɛ, zhuru ebwa wɛ azhwɛɛrɛ ma ga ebe ndɔrɔngwe ngɛ.”

Currently Selected:

Pwede abwa 2: nbt

Highlight

Copy

Compare