Pwede abwa 4
4
Aghɛʼnji yɛ e ma ghɔ Ngwe ekere ngɛ
1Aŋu mmɛ à shi zɔ abwa zɔnɔ gimkpaʼ ngɛ, nklama wu le angu, mmɛ zɔ enduʼndɔ deʼ me fuʼu ekere. Mmɛ zo etsoʼ wɛ mmɛ a shi dye zo ambèmbè ngɛ, e mwɔ na amboo nɔ, e ga ena kpe, “Ngà kwaʼ zeʼe anɔ, mmɛ wa ngo tee ebwa wɛ e ma ngo gli achim ebwa wunɔ ngɛ.” 2Azhwɛɛrɛ Ngwe bere angu ekyɛ ŋwaʼ, mmɛ zɔ atan m̀fɔ̀ ekere, gho deʼ me tsɔmɔ edɔm. 3Ekwa egho wɛ à me tsɔmɔ edɔm ngɛ ma nɛŋɛrɛ na atye naranara deʼ â ma zɔʼrɔ kpe jaspa mane kaneliyan nɔ. Azhi m̀bò kɛɛrɛ atan m̀fɔ̀ zɔnɔ sɔ̀ ma nɛŋɛrɛ na etye deʼ a ma zɔʼrɔ kpe emɛrald nɔ. 4Etan m̀fɔ̀rɔ̀ tsɛrɛ asamabi tɛʼ kwɛ̀ me kɛɛrɛ atan m̀fɔ̀ zɔnɔ è sɔ. Bɔ asamabi tɛʼ kwɛ̀ byɛ â mwɔ eto ngɛ, me tsɔmɔ edɔm etan bɔnɔ. Angɔ à ne ge ǹdiri bla mane ǹtàm ara m̀fɔ̀ chɛ â me ndeere ene aklibi àfɔ̀n ngɛ eto amɔ. 5Ebye m̀bò à na pɛ à zèʼ ene atan m̀fɔ̀ zɔnɔ nɔ, m̀bò kumu, gɛ̀rɛ̀ ghɔ̀bɔ̀. Enâm sàambyɛ ma bɛ̀rɛ efàarà atan m̀fɔ̀ zɔnɔ. Enâm bɔnɔ à ne ezhwɛɛrɛ Ngwe sàambyɛ. 6Ala deʼ gɛrɛ mwɔ efàarà atan m̀fɔ̀ zɔnɔ ne ebɔrɔndim e me ndeere ene glashi nɔ.
Nyɛmɛrɛ kɔʼɔ deʼ kwɛ̀, chɛ â me le aghɔɔ kwɛ̀ embè mane ekuchim ngɛ â ne kɛɛrɛ atan m̀fɔ̀ zɔnɔ sɔ. 7Nyɛm kɔʼɔ mbèmbè à ne mwɔ na ǹgɔmaŋwa nɔ. Engɔ yɛ à me tɛʼ amɔ achim ngɛ me mwɔ na azɛʼ m̀pwɔ̀ kiri asɔmɔ nɔ. Engɔ nùrù tɛd à ne mwɔ ne efàarà gho nɔ. Engɔ nùrù kwɛ̀ me mwɔ na àfùu yɛ à ma fùrù ngɛ nɔ. 8Nyɛmɛrɛ kɔʼɔ kwɛ̀ tsɔnɔ, eŋwàʼaŋwàʼ à ne le eblaba mfo ekwa mɔ. Â ne le aghɔɔ akwa gimkpaʼ efwɔ akwa amɔ, ka de mwɔ efwɔ eblaba. Â na kwɔrɔ nchi mane ǹklì ne ma bwara bo kpe
“Angwanìm Ngwe Masakɛ we pɛ, pɛ, pɛ! Engɔ ne egho wɛ à mwɔ, e mwɔ enjitsɔ gɛrɛ ma ngo yà zeʼe ngɛ!”
9Akyɛ gimkpaʼ yɛ nyɛmɛrɛ kɔʼɔ tsɔnɔ ma ndɛʼ eghɔ, ànòŋò mane ebɛrɛ ebe engɔ wɛ me tsɔmɔ edɔm atan m̀fɔ̀ ngɛ, engɔ wɛ e me tye ekyɛ ŋwaʼ ngɛ, 10bɔ asamabi tɛʼ kwɛ̀ byɛ â mwɔ bɔ tɛbɛ ngɛ gunu etongu amɔ efàarà engɔ wɛ me tsɔmɔ edɔm atan m̀fɔ̀ yɛ ngɛ, engɔ wɛ e me tye ekyɛ ŋwaʼ ngɛ. E ba chidi ǹtàm ara amɔ efàarà ngɔ ma kwɔrɔ kpe
11“Masakɛ Ngwe, ngwo we koʼro
é nu eghɔ, ànòŋò mane ekama
mbɔʼnga ngwo à ndeere ela gimkpaʼ,
Ngwo à nu etsɛrɛ é ndèerè ela bɔnɔ mbɔʼtye e nɔ àkɔʼɔ.”
Currently Selected:
Pwede abwa 4: nbt
Highlight
Copy
Compare
Share
Want to have your highlights saved across all your devices? Sign up or sign in
© 2022, CABTAL
