Pwede abwa 20

Dɛbli ya tsɔmɔ nè dzɔm abwo mɔ efwɔ eko enɔ̂m wum byɛ

1Éngɛ mmɛ zɔ angere deʼ ma kla zeʼe ezob, me bere atuuru ene m̀blìʼ ketsɛʼ engudu mane engwa dzɔm deʼ abwo mɔ. 2Angere wɛ shwɔn ǹkwɔmnejwa, atere jwe yɛ à mwɔ dɛbli kà asatan ngɛ è gha engɔ shi efwɔ enɔ̂m ètɔɔshin wum. 3E ndwa engɔ efwɔ m̀blìʼ ketsɛʼ engudu, gwɔb e shii enduʼ mbɔʼtye engɔ ne wu ndooro bɔ bwɛrɛ efwɔ èndzobo chɛ enɔ̂m ètɔɔshin wum ma myɛ ngɛ bo. Anɔ̂m byɛ myɛ, e shi zeʼe zɛɛrɛ engɔ saa ene ampiʼ endzobo deʼ.

4Éngɛ mmɛ zɔ etan m̀fɔ̀rɔ̀, abɔ byɛ â me tsɔmɔ edɔm ngɛ mwɔ abɔ byɛ Ngwe a shi chidi angɔ é sɛʼ abɔ tsɛrɛ ngɛ. Mmɛ à gɛrɛ zɔ ezhwɛɛrɛ abɔ byɛ â shi zhudu angɔ ngɛ. Â zhudu angɔ mbɔʼnga angɔ à ma kìrì Yeso gɛ̀rɛ̀ ma sɛ̀ɛrɛ̀ ega Ngwe. Abɔ bɔnɔ à ke ghɔ enyɛm twatwa yɛ kà azhi mɔ bo. Angɔ à gɛrɛ ke bɛrɛ kpe e ŋwɛʼrɛ anɛ̂ enyɛm yɛ ekɔshi kà ebwo amɔ bo. Angɔ à wu zhwɛm, e gɛrɛ ba ngo klini bɔ ne efwɔ enɔ̂m ètɔɔshin wum. 5Bɛʼngɛ abɔ kudu abê â ke zhwɛm bo bwɛrɛ èndzobo chɛ enɔ̂m ètɔɔshin wum byɛ â myɛ ngɛ. Ezɔnɔ ne ezhwɛɛmɛ bɔ ene ekyɛ mbèmbè. 6Ǹchwɔ̀ mane m̀bɔ̀nɔ na abɔ byɛ e mwɔ efwɔ ekyɛ zhwɛɛmɛ bɔ mbèmbè zɔnɔ ngɛ. Ewu nùrù fyee ke wu le ekama deʼ edɔm angɔ bo. Angɔ ba ngo mwɔ bɔ zhiri Ngwe nè Kristo. Angɔ gɛrɛ ba mwɔ ato nè engɔ efwɔ enɔ̂m ètɔɔshin wum.

E ngwe asatan fɔɔ

7Èndzobo chɛ enɔ̂m ètɔɔshin wum bɔnɔ ma myɛ ngɛ, e shi chidi dzɔmɔrɔ ekwa asatan, chi efwɔ ndɔdzɔm. 8Endzobo chɛ engɔ ma gli a ndɔdzɔm ngɛ, è wa ngɔɔ efwɔ ǹdɔʼrɔ ese kwɛ̀, sa ndooro bɔ efwɔ ebɛ gimkpaʼ. Ǹdɔʼrɔ ese kwɛ̀ tsɔnɔ na Gog mane Magog. Asatan wa bùumu angɔ afwɔbi é ti ebiri. Angɔ ba ngo me ghɛʼ ne ńchiri eba eji ngɛ. 9Angɔ à kɛɛrɛ ese mane afwɔ tsɔmɔ bɔ Ngwe sɔ̀ mane antiri abɛ yɛ engɔ me doʼo ngɛ. Bɛʼngɛ éwu à kla ezob è gwò angɔ pɛdɛ. 10Â nu dɛbli wɛ à ndooro bɔ ngɛ ndwa efwɔ edzɔwu yɛ e ma be tooo, afwɔ yɛ angɔ à shi ndwa enyɛm twatwa mane bàmɛnɛkɔn andɔɔ ngɛ. Ewu wa ngo gbɛɛrɛ angɔ nchi mane ǹklì ene akyɛ kengudu.

Engudu esɛʼ

11Mmɛ zɔ angwa atan m̀fɔ̀ deʼ, e bla, yɛ Ngwe à me tsɔmɔ edɔm ngɛ. Ezɔɔrɔ Ngwe le chwâ mane ezob firi ǹkàrà, gho deʼ ne ma wa zɔ bo. 12Mmɛ zɔ bɔ kudu a m̀pèrempèrè, àkɛ nè akpara, e me tamma efàarà atan m̀fɔ̀ yɛ. E fuʼ eŋwɛʼrɛ byɛ Ngwe à me ŋwɛʼrɛ abwa mbɔʼ angɔ efwɔ ngɛ. Â gɛrɛ ne fuʼu aŋwɛʼrɛ tsɛrɛ. À ne efwɔ aŋwɛʼrɛ yɛ wɛ a me ŋwɛʼrɛ akumu abɔ byɛ e ma ngo mwɔ nè Ngwe ene akyɛ kengudu ngɛ. Â sɛʼ bɔ kudu ene abwa yɛ angɔ à shi le ngɛ aŋu aŋwɛʼrɛ yɛ à tee ngɛ. 13Abɔ byɛ â kudu efwɔ ndim ngɛ a ngɔɔ ebe Ngwe é sɛʼ esɛʼ amɔ. Abɔ abɛ byɛ a shi kudu mwɔ abɛ bɔ kudu ngɛ gɛrɛ ngɔɔ efàarà Ngwe kpe è sɛʼ angɔɔ nyɛ̀rɛ̀ zèʼe ene eleabwa angɔ. 14Éngɛ e dɛmɛ ewu mane abɛ bɔ kudu ndwa efwɔ edzɔwu zɔnɔ. Ewu nùrù fyee ne efwɔ angwa edzɔwu. 15Â gɛrɛ ndwa abɔ byɛ akumu angɔ à me tsɛʼ efwɔ aŋwɛʼrɛ etyê bo ngɛ efwɔ edzɔ aŋu.

Currently Selected:

Pwede abwa 20: nbt

Highlight

Copy

Compare