Pwede abwa 21

Ezob fe mane chwâ fe

1Aŋu nklama nchi fyɛ mmɛ à zɔ Ngwe ma sɛ̀ʼɛ ese à fɔɔ ngɛ, mmɛ zɔ ezob fe mane ese fe. Ezob sam mane ese sam sodo. Ebɔrɔndim gɛrɛ ne bli bo. 2Mmɛ gɛrɛ zɔ abɛ pɛ yɛ à mwɔ Jerusalɛm fe ngɛ ma kla zeʼe ezob ebe Ngwe. Â ne ndeere amɔ na ŋwɔaye me nɔɔ amɔ ma kɔʼɔ enɔm mɔ nɔ. 3Mmɛ gɛrɛ zo etsoʼ kɛ deʼ ga zeʼe edɔm atan m̀fɔ̀ kpe, “Enjitsɔ abɛ Ngwe shi abwaʼ bɔ. Engɔ gɛrɛ wa tsɔmɔ nè angɔ. Angɔ ba ngo mwɔ bɔ Ngwe, Ngwe mɔmbwo gɛrɛ mwɔ nè angɔ. 4Ngwe ya ngo fla ndɛrɛ gimkpaʼ aghɔɔ angɔ. Ebwa ewu kà é de eku kà eku̧u kà ekwa twa yà ne bli bo enga abwa sam yà shi fɔɔ.”

5Engɔ wɛ me tsɔmɔ edɔm atan m̀fɔ̀ ngɛ ga kpe, “Kɔʼɔ anɔ, mmɛ shi ndeere ela gimkpaʼ efwɔ ese e mwɔ àfe.” Engɔ gɛrɛ wu ga kpe, “Ŋwɛʼrɛ abwa zɔnɔ a chwâ mbɔʼnga a ye koʼro gɛ̀rɛ̀ mwɔ éŋwaʼa.” 6Engɔ à gɛrɛ wu ga ena kpe, “Mmɛ shi mɛ̀ɛrɛ abwa gimkpaʼ koʼo! Mmɛ na ǹtsembè gɛ̀rɛ̀ mwɔ ekoochim, eklada gɛ̀rɛ̀ mwɔ engudu. Mmɛ wa ngo ndɛʼ andim myɛ me zeʼe efwɔ amumun ndim myɛ mala gho deʼ ŋwɔ è wa ngo tyè ekɔʼɔ ene akyɛ kengudu ngɛ. Mmɛ wa ndɛʼ andim mɔnɔ bli. 7Abɔ e ma ngwè fɔɔ ngɛ ba ngo nde etiʼi wunɔ. Mmɛ wa ngo mwɔ Ngwe angɔ, angɔ gɛrɛ mwɔ bwɔ mbu. 8Bɛʼngɛ abɔ byɛ e me le èklɔ̀ ne me le ebɛrɛtaa bo, abɔ byɛ e ma le abwa ḿfiri ngɛ, abɔ e ma zhudu bɔ, àndese, àtɛrɛ ǹgbara, abɔ byɛ e ma ghɔ ngwere bli ngɛ, mane abɔ byɛ e ma ga andɔɔ ngɛ, afwɔ angɔ ye efwɔ edzɔwu, ezɔnɔ ne ewu nùrù fyee.”

Jerusalɛm fe

9Angere bi abwaʼ engere sàambyɛ byɛ â me bere nkuʼru sàambyɛ chɛ â me shwe ene enyii ngɛ zeʼe ga ena kpe, “Zeʼe, mmɛ wa tee eŋwɔaye wɛ engɛ̂, eye ŋwɔ ǹglɔ̀ ngɛ.” 10Azhwɛɛrɛ Ngwe à nyii ekwa ngu, angere nu angu ngɔɔ edɔm angwa egu deʼ wɛ à me tɛbɛ ngɔɔ ekere ghɛʼ ngɛ, tee Jerusalɛm antiri abɛ Ngwe yɛ à me pɛ ngɛ ena a ma kla zeʼe ezob enyɛrɛ zeʼe efàarà Ngwe. 11Enɛŋɛrɛkɛ Ngwe à na bla anyi, antiri abɛ yɛ ma nɛŋɛrɛ na aklɔnɔ naranara deʼ nɔ, gɛ̀rɛ̀ mwɔ na m̀pèrè atye deʼ â ma zɔʼrɔ kpe jaspa nɔ gɛ̀rɛ̀ ma pɛ. 12Aba ndɔ mɔ â ne klɔ gɛrɛ me tɛbɛ ngɔɔ ekere me le anduʼnkɛmɛ wum ǹchwɔ̀ fyee. Engere wum ǹchwɔ̀ fyee me tamma ene anduʼnkɛmɛ zɔnɔ. E me ŋwɛʼrɛ akumu anɔrɔkla wum ǹchwɔ̀ fyee bɔ Israel ene anduʼnkɛmɛ zɔnɔ. 13Ǹkɛmɛ yɛ a ne gɛ̀bbɛ ene ntiri kwɛ̀, anduʼnkɛmɛ â na anji abɛɛ gli etaranchwe atɛd, atɛd anji abɛɛ abekè, atɛd anji abɛɛ abitin mane atɛd anji abɛɛ turu etaranchwe. 14Etirindɔ ene antiri abɛ zɔnɔ â ne le èngwara atye wum ǹchwɔ̀ fyee. E gɛrɛ me ŋwɛʼrɛ akumu bèmpwɔnɔntɔm wum ǹchwɔ̀ fyee ŋwɔ ǹglɔ̀ anyi.

15Angere wɛ à ma ga nè mmɛ ngɛ à ne le atam deʼ yɛ à me ndeere ene aklibi àfɔ̀n ngɛ. A na gli atam zɔnɔ é mò abɛ zɔnɔ, anduʼnkɛmɛ mɔ, mane abandɔ mɔ. 16Angere wɛ à mo abɛ Jerusalɛm ene atam yɛ è ga kpe, edɔɔ mɔ à ne mwɔ na ekilomɛtas ètɔɔshin fyee nè ako kwɛ̀ nɔ, ebɛrɛ mɔ gɛrɛ mwɔ engɛ̂, etɛbɛ ngɔɔ ekere mɔ gɛrɛ mwɔ ngɛ. Abɛ kɛ́ yɛ à ne koʼokoʼo ene ebɛɛ gimkpaʼ, ene ebɛrɛ mane edɔɔ mane etɛbɛ. 17Angere wɛ à gɛrɛ mò eba ndɔ e mwɔ emɛta èsama tɛd tɛʼ mfo ene eklɔ mɔ ene ezɔɔrɔ yɛ engɔ à ma mò ngɛ. 18Â ne byɛ abandɔ zɔnɔ ene atye deʼ yɛ à ma zɔʼrɔ kpe jaspa ngɛ. E me byɛ abɛɛ abɛ mɔmbwo ene aklibi àfɔ̀n wɛ à ma pɛ na glashi nɔ. 19Â ne nɔɔ etirindɔ antiri abɛ kɛ́ zɔnɔ ene m̀pèrè bwo atye kama ekɛb naranara deʼ. Etye mbèmbè a na ala deʼ yɛ â ma zɔʼrɔ kpe jaspa nɔ, etye nùrù fyee mwɔ na ala deʼ a ma zɔʼrɔ kpe safaya nɔ, etye nùrù tɛd mwɔ ala deʼ a ma zɔʼrɔ kpe agatɛ, etye nùrù kwɛ̀ mwɔ ala deʼ a ma zɔʼrɔ kpe emɛrald. 20Etye nùrù tan mwɔ ala deʼ a ma zɔʼrɔ kpe onikz, etye nùrù mfo mwɔ ala deʼ a ma zɔʼrɔ kpe kanelyan, etye nùrù sàambyɛ mwɔ ala deʼ a ma zɔʼrɔ kpe Krisolayt, etye nùrù fwɔ̧ɔ mwɔ ala deʼ a ma zɔʼrɔ kpe bɛril, etye nùrù kɔɔ mwɔ ala deʼ a ma zɔʼrɔ kpe topas, etye nùrù wum mwɔ ala deʼ a ma zɔʼrɔ kpe chalkɛdɛmy, etye nùrù wum ǹchwɔ̀ ŋwaʼ mwɔ ala deʼ a ma zɔʼrɔ kpa jasinth, etye nùrù wum ǹchwɔ̀ fyee mwɔ ala deʼ a ma zɔʼrɔ kpe amɛtist. 21Â ne byɛ anduʼnkɛmɛ wum ǹchwɔ̀ fyee yɛ ene m̀pèrè bwo atye deʼ â ma zɔʼrɔ kpe pɛɛl. Â ne byɛ enduʼnkɛmɛ ŋwaʼaŋwaʼ ene pɛɛl ŋwàʼaŋwàʼ. Â ne nɔɔ ǹjì kɛkɛ yɛ â ma nyii ngɔ̀ɔ efwɔ antiri abɛ kɛ́ yɛ ngɛ ene aklibi àfɔ̀n mɔmbwo wɛ à ma pɛ na glashi nɔ.

22Mmɛ à de ke zɔ ndɔngwe kɛ̀ deʼ efwɔ antiri abɛ kɛ́ yɛ bo mbɔʼnga Angwanìm Ngwe mane ŋwɔ ǹglɔ̀ ne mwɔ na ndɔngwe kɛ̀ nɔ. 23Antiri abɛ kɛ́ yɛ ke ma ke ńchwe kà eta é ma pɛ efwɔ aŋu bo mbɔʼnga enɛŋɛrɛkɛ Ngwe ya ndɛʼ ekɛʼ, Ŋwɔ ǹglɔ̀ ma ndɛʼ anâm. 24Bɔ efwɔ ebɛ ba gli ekɛʼ wɛ é fwɛʼ ebwa angɔ me doʼo é fwɛʼ ngɛ. M̀fɔ̀rɔ̀ edɔm chwâ gɛrɛ ma ngo bwɛ àfɔ̀n amɔ zeʼe aŋu. 25E yà ne ma gwɔb anduʼnkɛmɛ zɔnɔ anji deʼ bo mbɔʼnga ǹklì deʼ yà me tsɛʼ aŋu bo. 26Bɔ efwɔ abɛ ba ngo zeʼe nè àfɔ̀n amɔ efwɔ abɛ é ndɛʼ eghɔ ebe Ngwe mane engɔ wɛ mwɔ na ŋwɔ ǹglɔ̀ ngɛ. 27Tsɛ̀ʼ ala deʼ yɛ a ne me pɛ bo ngɛ à ma yà nyii efwɔ bo, ka de mwɔ abɔ byɛ e me le abwa ǹchù kà ga andɔɔ ngɛ yà ne efwɔ nyii. Bɛʼngɛ à tye ma abɔ byɛ e me ŋwɛʼrɛ akumu angɔ efwɔ aŋwɛʼrɛ etyê ŋwɔ ǹglɔ̀ ngɛ e ma yà nyii efwɔ.

Currently Selected:

Pwede abwa 21: nbt

Highlight

Copy

Compare