Pwede abwa 19

Bɔ sa kwɔrɔ atsa ezob ene egɛnɛ

1Aŋu abwa zɔnɔ à fɔɔ ngɛ, mmɛ zo ela deʼ ma ga ekere mwɔ na atsoʼ ebaŋabɔ ezob nɔ, ma ga kpe, “Mbɔn zodo Ngwe! Etyê, eghɔ mane ekama ne engɔ Ngwe bɔ̀. 2Enga engɔ na sɛ̀ʼɛ esɛʼ ene éŋwaʼa mane aghɛʼnji yɛ a me koʼro ngɛ. Engɔ shi ge enyii ekwa àndese wɛ à tsɔŋɔ bɔ ene endese mɔ ngɛ. Engɔ shi gwɔmɔ enɔgho ene abɔ byɛ engɔ à zhudu ngɛ.” 3Angɔ à gɛrɛ wu flaba ga kpe, “Mbɔn zodo Ngwe! Enjiʼ wɛ e ma gli à zeʼe efwɔ antiri abɛ kɛ́ yɛ ngɛ na ngɔ̀ɔ ezob akyɛ gimkpaʼ.” 4Éngɛ bɔ asamabi tɛʼ kwɛ̀ byɛ â mwɔ eto ngɛ mane ela kɔʼɔ kwɛ̀ gunu àmɔ̀ a chwâ ghɔ Ngwe yɛ me tsɔmɔ edɔm atan m̀fɔ̀ ngɛ ga kpe, “Ekoʼro! Zodo Ngwe!” 5Etsoʼ deʼ gɛrɛ ga zeʼe edɔm atan m̀fɔ̀ yɛ kpe, “Ntsɔ zodo Ngwe bɔ̀, mbɔn bɔ afwɛʼ ngɔ gimkpaʼ, bɔ gimkpaʼ byɛ e ma ghɔ engɔ ngɛ, e klada ene bɔ kparakpara ngɔɔ bwɛn ene bɔ kɛ́.” 6Mmɛ gɛrɛ wu zo etsoʼ deʼ ne etsoʼ ebaŋabɔ nɔ, gɛrɛ mwɔ na ndim ma kla ene ekob nɔ, gɛrɛ mwɔ na m̀bò kɛ ma kùmù nɔ. Mmɛ zo angɔ ma ga kpe, “Ntsɔ zodo Ngwe enga Masakɛ Angwanìm Ngwe bɔ̀ na m̀fɔ̀. 7Ntsɔ sa sɛnɛ sa gɛnɛ abɔ gɛ̀rɛ̀ sa ndɛ̀ʼ eghɔ ebe engɔ enga endzobo nu-aye ŋwɔ ǹglɔ̀ shi zeʼe, eŋwɔaye wɛ gɛrɛ shi ndeere amɔ é nu engɔ. 8Ngwe shi ndɛʼ afwɔ ebe engɔ é ge ǹdiri chɛ e me ghɔ ene ǹchwɔ̀ e me pɛ ma nɛŋɛrɛ ngɛ.” (Ǹdiri naranara tsɔnɔ ne mwɔ na abwa yɛ a me koʼro efàarà Ngwe yɛ bɔ kristo ma le ngɛ nɔ).

9Éngɛ angere wɛ gâ ena kpe, “Ŋwɛʼrɛ ebwa wunɔ kpe M̀bɔ̀nɔ ye ebe abɔ byɛ e me zɔʼ angɔ ene emɛrɛ ene ebwa nu-aye ŋwɔ ǹglɔ̀ ngɛ.” E gɛrɛ wu ga ena kpe, “Azɔnɔ na aga éŋwaʼa a me zeʼe ebe Ngwe.”

10Éngɛ mmɛ gunu angu a chwâ kpe mmɛ ndɛʼ eghɔ ebe engɔ, bɛʼngɛ engɔ ga ena kpe, “Ke le éngɛ bo! Mmɛ gɛrɛ na gho afwɛʼ Ngwe na ngwo nɔ. Mmɛ gɛrɛ ne egho bi wɛ me bɛrɛ ene Kristo ngɛ. Mmɛ ne egho bi wɛ me tama ene éŋwaʼa wɛ Yeso a ma ga ngɛ. Mbɔn ghɔ ma Ngwe! Enga ne éŋwaʼa wɛ Yeso à ga ngɛ à le bàmɛnɛkɔn Ngwe sa yɛrɛ à sɛ̀ɛrɛ̀ ega Ngwe.”

Egho wɛ à me kwaʼa edɔm m̀pwɔ̀ bèʼebɔ bla ngɛ

11Mmɛ gɛrɛ zɔ ezob me fuʼu, m̀pwɔ̀ bèʼebɔ bla me tam aŋu. E ma zɔʼrɔ egho wɛ me kwaʼ m̀pwɔ̀ bèʼebɔ yɛ ngɛ kpe Gho wɛ Ma fwɛʼ ebe Ngwe ene Etaa mɔ gimkpaʼ ngɛ, ma sɛ̀ʼɛ bɔ ma ti m̀bùʼ ene abwa yɛ a me koʼro ngɛ. 12Aghɔɔ ngɔ à na nɛŋɛrɛ ne éwu nɔ. Engɔ à ne ge ǹtàm ara m̀fɔ̀ ato mɔ eghɛʼ. Â ne ŋwɛʼrɛ ekumu deʼ anyi wɛ gho deʼ ne me nɛɛ bo ngɛ, a shi me nɛɛ tye engɔ mɔmbwo. 13Ǹdi yɛ engɔ à me ge ngɛ à ne zhwaʼa ene anɔm. Ekumu ngɔ na “Ega Ngwe.” 14Bɔ ebiri ezob â na kaara engɔ me kwaʼa edɔm m̀pwɔ̀ bèʼebɔ bla me ge ǹdiri bla. 15Ebyeŋwɔ̀ twatwa à gli eklo ngɔ. Ne ebyeŋwɔ̀ wɛ engɔ à gli é zhudu bɔ efwɔ ebɛ akɛkɛ anyi. Engɔ wa ngo klini angɔ ene ebwo kamakam. E ba ngo dzɛ̀ddɛ̀ afwɔ yɛ e ma to enta azɔd byɛ e ma ndèerè mɔm anyi ngɛ ene eboo kamakam Angwanìm Ngwe. 16E me ŋwɛʼrɛ ene adwɔ ǹdi mane anam alo ngɔ kpe, “M̀fɔ̀ ebe m̀fɔ̀rɔ̀ gimkpaʼ mane Masakɛ ebe èmasakɛ gimkpaʼ.”

17Mmɛ gɛrɛ zɔ angere deʼ me tama efwɔ enchwe ma zɔʼrɔ ènɔ̀n gimkpaʼ myɛ e ma fùnnù ekere ezob ngɛ ene angwa etsoʼ deʼ kpe, “Mbɔn shunu afwɔbi ene antara kɛ̀ wɛ Ngwe me kɛʼɛ endɔn ngɛ! 18Mbɔn zeʼe nde nyɛmekwa bɔ m̀pɛ̀ʼ Ngwe gimkpaʼ byɛ â shi kudu ngɛ, m̀fɔ̀rɔ̀, abɔ â mwɔ eto ebe bɔ ebiri ngɛ, bɔ kɛkɛ, m̀pwɔ̀ bèʼebɔ mane abɔ â ma kwaʼ ngɛ, angɔ bɔ gimkpaʼ, ka mwɔ èdzob kà e ne mwɔ èdzob bo, enɔm bɔ mane etsɛdɛ bɔ.” 19Éngɛ mmɛ zɔ nyɛm ǹgɛ̀ deʼ mane m̀fɔ̀rɔ̀ efwɔ ese nè bɔ ebiri amɔ, e me kɛɛrɛ angɔ byɛ ezob ngɛ ma ke ngwè ebiri nè egho wɛ à me kwaʼ m̀pwɔ̀ bèʼebɔ ngɛ mane bɔ ebiri angɔ. 20Éngɛ â bere nyɛm zɔnɔ mane bàmɛnɛkɔn andɔɔ byɛ â ma le anɛ̂ abwa bɔɔbɔɔ ene ekumu nyɛm zɔnɔ ngɛ. Anɛ̂ abwa andɔɔ zɔnɔ à le bɔ akɛkɛ bɛrɛ é nu anɛ̂ nyɛm zɔnɔ gɛ̀rɛ̀ sa ghɔ ala yɛ â me ndeere a me nu ezɔɔrɔ enyɛm zɔnɔ ngɛ. Â bɛʼrɛ nyɛm ǹgɛ̀ zɔnɔ mane bèmpwɔnɔntɔm andɔɔ mɔ fyee àkɔʼɔ sàa efwɔ edzɔwu yɛ a ne ma nyimi bo ngɛ, angɔ fe efwɔ. 21Egho wɛ à ma zhiri edɔm m̀pwɔ̀ bèʼebɔ ngɛ à mɛɛrɛ abɔ abê zhudu ene ebyeŋwɔ̀ wɛ à ma gli à zeʼe eklo ngɔ ngɛ, m̀fɔ̀rɔ̀ chɛ mane bɔ ebiri amɔ. Ènɔ̀n à nde nyɛmɛrɛ akwa angɔ gɛrɛ zo.

Currently Selected:

Pwede abwa 19: nbt

Highlight

Copy

Compare