Pwede abwa 18

Abɛ Babilɔn go

1Aŋu abwa zɔnɔ à fɔɔ ngɛ, mmɛ zɔ angere tsɛrɛ è ma kla zeʼe ezob. Engɔ à ne le ekama kɛ́ é klini bɔ. Enɛŋɛrɛkɛ ngɔ pɛɛ akwâ efwɔ ese gimkpaʼ. 2Angere wɛ flaba ene angwa etsoʼ gà kpe, “A shi go! Angwa abɛ Babilɔn shi go! A shi firi shi ma afwɔ ezhwɛɛrɛ bɔɔbɔɔ ma tsɔmɔ aŋu. A shi ma afwɔ ezhwɛɛrɛ bɔɔbɔɔ ma namma, a shi ma afwɔ ènɔ̀n bo myɛ bɔ ne me doʼo bo ngɛ ma tsɔmmɔ. 3Éngɛ ebɛ gimkpaʼ shi ŋwɔ mɔm eboo Ngwe mbɔʼ endese angɔ. M̀fɔ̀rɔ̀ edɔm ese shi nde ese efwɔ abɛ zɔnɔ nè angɔ. Abɔ byɛ â ma zɔnɔ gɛ̀rɛ̀ ma fɛ̀nnɛ ela ngɛ shi fɔ̧rɔ nyɛ̀rɛ̀ zèʼe ene ekama yɛ abɛ zɔnɔ à me le é le abwa bɔɔbɔɔ ngɛ.”

4Mmɛ gɛrɛ wu zo etsoʼ tsɛrɛ e ma ga zeʼe ezob kpe

“Bɔ mbu, mbɔn glini efwɔ abɛ yɛngɛ!

Mbɔn ke sa fwɛʼ abwa bɔɔbɔɔ yɛ angɔ ma fwɛʼ ngɛ bo, mbɔʼtye mbɔn ne zɔ ǹgoʼ abwaʼ angɔ bo.

5Enga abwa bɔɔbɔɔ angɔ ye kpɛʼɛ kwaʼ bwɛ̀n ezob. Ngwe gɛrɛ shi zhuŋu abwa bɔɔbɔɔ angɔ.

6Ndɛʼ ebe engɔ nkirinkin aŋu engɔ à ndɛʼ engɛ̂ ngɛ.

Nɛrɛ engɔ ene agha fyee ene abwa yɛ engɔ shi fwɛʼ ngɛ.

Ndɛʼ ǹtoʼro fyee ebe engɔ aŋu engɔ à ndɛʼ eŋwàʼ engɛ̂ ngɛ.

7Aŋu engɔ à ma kwaʼ ekwa ma tsɔmɔ efwɔ àfɔ̀n ngɛ, gɛrɛ ge ǹgoʼ kɛ̀ mane enyii ekwa ngɔ. Na aŋu engɔ à ma ga efwɔ etaa mɔ kpe

‘Mmɛ ne tsɔmɔ na m̀fɔ̀ aye nɔ, mmɛ ke mwɔ eyeti bo, mmɛ yà na ǹgoʼ zɔ.’

8Enyɛrɛ éngɛ, Ngwe ya ge anyii ekwa engɔ anji ŋwaʼ.

Anyii zɔnɔ ya ngo mwɔ ewu, é de ekuru mane jɛbo.

E yà sɔ̀ʼ engɔ efwɔ edzɔwu,

enga Masakɛ Ngwe yɛ ma sɛ̀ʼɛ engɔ ngɛ na angwanìm.”

9M̀fɔ̀rɔ̀ chɛ â ma nde ese nè engɔ a chwâ gɛrɛ ma bùumu engɔ ene andɔŋɔ é le abwa bɔɔbɔɔ ngɛ ba ngo ku̧u mbɔʼ engɔ èndzobo chɛ e ma zɔ enjiʼewu e sa gli afwɔ yɛ e ma twɔ̀n engɔ ngɛ. 10M̀fɔ̀rɔ̀ tsɔnɔ tsa tamma ezhin dɔɔdɔɔ ma bumu é nyii efwɔ enyii yɛ engɔ ma zɔ ngɛ sa ga kpe, “Ewu ngoʼo! Ewu ngoʼo abɛɛ njɛ Babilɔn! Ngwo wɛ ngwo mwɔ ma abɛ kɛ́ ngɛ, ene ampiʼ endzobo, e shi ge enyii ekwa ngwɛ.”

11Abɔ byɛ â gɛrɛ ma fɛ̀nnɛ ma zɔnɔ ela efwɔ ese ngɛ gɛrɛ ba ngo sa ku̧u à dè engɔ mbɔʼnga tsɛʼ gho deʼ ma wu ma zɔnɔ ela angɔ bo. 12Engɔ à na zɔnɔ ela akɛkɛ ebe àfɛ̀nɛ ela na aklibi àfɔ̀n, etɔrɔ, atye naranara, aklɔnɔ, eparandi kama ekɛb m̀pèrempèrè, m̀pèrè ezɔd deʼ byɛ â me le mbì ngɛ, ela â me ndeere ene ashwɔ ànkɔ, ela â me ndeere ene ezɔd kama ekɛb, etɔrɔ m̀pèrempèrè mane m̀pèrè atye deʼ. 13Engɔ à gɛrɛ na zɔnɔ m̀pèrè ela deʼ â ma zɔʼrɔ kpe Sinamɔn, m̀pèrè adwe deʼ â ma zɔʼrɔ kpe mɛyɛ mane frankinsɛns, mɔm, ngud olif, ebun akoʼ, ǹkùru, m̀pwɔ̀rɔ̀ beʼe ela mane ǹglɔ̀rɔ̀, m̀pwɔ̀rɔ̀ bèʼebɔ mane m̀pwɔ̀rɔ̀ ngwe ebiri, mane bɔ byɛ a me fɛnnɛ angɔ ene àdzob ngɛ. 14Â na ga ebe engɔ kpe, “Ela nchwɔnchwɔ byɛ ngwo à me doʼo ngɛ shi myɛ. Àfɔ̀n mane ela naranara mbyɛ shi myɛ pɛdɛ. Ngwo yà ne wu le etsɛrɛ bo.” 15Abɔ byɛ â ma zɔnɔ gɛ̀rɛ̀ ma fɛ̀nnɛ ela bɔnɔ ebe engɔ shi fɔ̧rɔ ene ela bɔnɔ. Angɔ ba ngo tamma ezhin dɔɔdɔɔ ma bumu kpe mbɔɔ ke nyii efwɔ ǹgoʼ yɛ engɔ ma zɔ ngɛ bo. Angɔ ba sa flaba sa kù̧u gɛrɛ sa dè. 16Angɔ ba sa ga kpe, “Ewu ngoʼo! Ewu ngoʼo ebe angwa antiri abɛ. Abɛ yɛ à ne le m̀pèrè ǹdiri naranara deʼ, e mwɔ efan me nɔɔ ene aklibi àfɔ̀n, aklɔnɔ, atye naranara mane atye yeye deʼ â ma zɔʼrɔ kpe èpɛɛl. 17Efwɔ ampiʼ endzobo e tsɔŋɔ àfɔ̀n wunɔ gimkpaʼ.”

Bɔ kɛ efwɔ àwùundim, abɔ a mwɔ efwɔ eji ngɛ, abɔ â ma zhiri efwɔ eji mane abɔ byɛ â ma sɛ̀ʼɛ ewu̧ efwɔ eji ngɛ à tamma ezhin dɔɔdɔɔ. 18Èndzobo chɛ angɔ à zɔ aŋu enjiʼ à ma kwaʼa aŋu e ma twɔ̀n akwâ ngɛ, angɔ ba sa zodo kpe, “Antiri abɛ deʼ a shi mwɔ na abɛ kɛ́ zɔnɔ nɔ ngà?” 19Angɔ pliʼ eto amɔ ene ebun, sa kù̧urù à dè à gà kpe, “E we ngoʼo! E we ngoʼo ebe angwa antiri abɛ wɛ. Abɔ byɛ â me le ewu̧ efwɔ eji ngɛ â na fɔ̧̀rɔ zeʼe achim antiri abɛ zɔnɔ! Efwɔ antiri endzobo e shi nyimi ela gimkpaʼ.

20Ezob, sa gɛnɛ awɛ mbɔʼnga Ngwe shi ge enyii ekwa engɔ! Mbɔn bɔ kristo, bèmpwɔnɔntɔm mane bàmɛnɛkɔn Ngwe mbɔn sa gɛnɛ angɔn. Ngwe shi sɛʼɛ engɔ ene aghɛʼ yɛ engɔ à ma le abwa akwa ndzɔn ngɛ.”

21Éngɛ angwanìm angere nu etye e mwɔ na angwa etye gwo ela nɔ, ndwa efwɔ ebɔrɔndim sa gà kpe, “Ne énde angwa antiri abɛ Babilɔn ma ngo gò, e ne ma wu zɔ bo. 22Babilɔn yà ne wu zo emboo bo, e yà ne wu zo bɔ ma kwɔrɔ bo, yà ne wu zo aŋu bɔ ma fee emboo ngɛ bo, mane abɔ byɛ e ma fee emboo kɛ́ ngɛ ekyɛ tsɛrɛ bo. E yà ne wu zɔ abɔ e ma ndèerè ela ene ebwo amɔ ngɛ bo. E yà ne wu zo ala a ma gwo ela ngɛ a kumu bo. 23Anâm ke ma wu pɛ efwɔ antiri abɛ ndzɔn ekyɛ tsɛrɛ bo. Ngwo ke ma wu zo atsoʼ ŋwɔanɔm mane eŋwɔaye byɛ e me le ebwa elô ngɛ ekyɛ tsɛrɛ bo. E ba ngo tsɔŋɔ antiri abɛ kɛ́ mbɔʼnga abɔ byɛ â ma zɔnɔ gɛrɛ ma fɛ̀nnɛ ela ngɛ â na bɔ kɛ efwɔ ese. Angɔ à ndooro bɔ efwɔ ese ene ǹgbara amɔ.” 24Ngwe à ge enyii efwɔ abɛ Babilɔn mbɔʼnga â zhudu bàmɛnɛkɔn Ngwe mane abɔ tsɛrɛ efwɔ ese efwɔ aŋu.

Currently Selected:

Pwede abwa 18: nbt

Highlight

Copy

Compare