Efesùs 2

Anug ni dù inga iwu nyi inga ìtḛ̀

1Anjìm ìmbən inug tibɔ̀ŋ fɔrɔ ìwən tìzughə̀, mbə̰ ya fə yaʼ icheg bəd ku. 2Mbə̰ yaya ghìyə̀ inug tibɔ̀ŋ icheg bəd inga isəg. Mbə̰ yaya bə̀ bène abɔ̀ʼ wə̀d we ne tùmbə̀ izwighi mbe ne yaʼi inga ifə. À ya izwighi mbe ne fàʼà amad anìŋ inga bəd mbe ne ghìyə̀ tìzughə̀ abə Ŋwiye. 3Mba məjìm ya kweʼì yaʼ icheg inɔb icheg ne tì yaya fànà bə̀ ghìyə̀ inug mbe ne ìta nyàmnyɔd te ghə̀ʼrə̀. Tì yaya bə̀ bène abɔ̀ʼ ighi mbe ne ìta nyàmnyɔd fɔrɔ ìta tikɔndi te kə̀bə̀. Ane, Ŋwiye ya fə nɔ̀ŋì ni gaŋ tì ina icheg ne wì ya bə gaŋ tì inɔb. 4Si ya gha, Ŋwiye we ne dìgrè igun bəd kwàʼ icheg chɔm, ne bə̀ kɔ̀ŋɔ̀ bəd kwàʼ icheg chɔm, məd ya ghì gha, 5ka ìmba inug tibɔ̀ŋ ya ghì tì si yaʼ icheg bəd ku, tè ywìrì yaʼ izɔm icheg ne tì yaʼi ane ifɔti tì Kristo. À ya anjìm ìchɔ̀mì Ŋwiye ne mbə̀ fə pumi. 6Ŋwiye ya zwemni awa tì Kristo ghì tì chùghi tì məd igun itən kyen kyen ikaŋ àbɔ̀ŋɔ se tùmbə̀ isəg icheg ne tì yaʼi ane ifɔti tì Yeso Kristo. 7Wì ya ghì ane ni gha inga nyùmə̀ isəg we ne məd biri yeʼe, məd we tì wì chwi gha chəyi tì mbi mə̀grì ìchɔ̀mì kyen məd we ne wì ghi ina anjìm Yeso Kristo. 8Icheg ne mbə̀ nɔŋi ibḛfiŋ igun Kristo, Ŋwiye fə ghì ìchɔ̀mì inən, pumni awən. Kayi mbə̰ ghi anug azo̰. À ya ineʼi ne nɔʼi abə Ŋwiye. 9Chəyi Ŋwiye ya pumni awən imbə̀ʼ icheg ne mbə̀ ya ghi anug mɔ̀ʼɔ. Ane, imbə̀ʼ wə̀d kɔmɔ yi igo. 10Mba ya abo àfàʼì Ŋwiye ne wì ya tangi ni gha tì chughi ane ifɔti tì Yeso Kristo ni se ghìyə̀ inug chɔm mbe ne Ŋwiye ya fə bi chùʼri nɔ̀ŋì ina gha tì ghiyə.

Kristo ghì bəd məjìm si wə̀d imɔʼ

11Mbə̀ kɔndi gha, à ya yaʼ ane nyumə̀ mɔ̀ʼɔ, “Bəd mbe ne mbi ŋweri awɔb” yaya kàrà bəd mbe ne kayi bɔn tɔbseg mə̀Ju gha, “Bəd ne chəyi mbi ŋweri”. Mbi ya ghàmà imbə̀ʼ anug ni ŋwed wə̀d ane ibo. 12À ya yaʼ anyumə̀ we, chəyi mbə̰ ya yaʼi ane ifɔti tì Kristo. Chəyi mbə̰ ya bə yaʼ bəd Izre. Chəyi mbə̰ ya beri apan ane ikan we ne Ŋwiye ya kàʼi abə ìmbi bəd. Chəyi mbə̰ ya bə yaʼ bəd Ŋwiye. Mbə̰ ya yaʼ igun isəg aŋa ne chəyi mbə̀ ya nɔŋi ikɔndi igun Ŋwiye. 13Àsi amad anìŋ, anəm ze ne Kristo ya tu igun azed abaʼri fə ghì bəd ne chəyi mbi ya kyeri Ŋwiye mbi tinde iban Ŋwiye, bə̀ yaʼ ane anug amɔʼ tì Yeso Kristo. 14Məd zìye fə ghì àbɔrɔ̀bɔd yeʼe igun ina. Wì fə ghì gha mə̀Ju tì bəd mbe ne kayi mə̀Ju mbe si yaʼ bəd imɔʼ. Wì ya sèmbì achɔb ze ne yaya zìyè ìpàb inga mə̀Ju tì bəd mbe ne kayi mə̀Ju. 15Wì ya nimni mə̀nɔ̀ʼɔ̀ mə̀Ju tì tikə te ne yaʼi inga mə̀nɔ̀ʼɔ̀ fɔrɔ ìwɔb ikuchèg ane ìzi nyàmnyɔd. Kristo ya ghì ane ni gha bəd mbe ne kayi mə̀Ju tì mə̀Ju mbe si yaʼ ane anug amɔʼ ane ifɔti tì məd. Wì ya ghì ane ni gha bəd si chughi ane àbɔrɔ̀bɔd. 16Kristo ya chè ane ìwi iwu chì ìpàb ze ne bəd ne kayi mə̀Ju ya beri tì mə̀Ju. Wì ya fɔti awɔb ane anug amɔʼ, niŋ awɔb ghò abə Ŋwiye. 17Ane, Kristo ya ghà ikən chɔm we ne ghìyə̀ bəd chùghə ane àbɔrɔ̀bɔd abə wə̀d ijìm. Ane, ikən we ya inən mbə̰ mbe ne kayi mə̀Ju ne chəyi mbə̀ ya bi kyèri Ŋwiye fɔrɔ inən mbə̰ mbe ne yaʼi mə̀Ju ne ya kyeri Ŋwiye. 18À ya anjìm Kristo ne Azwighi Ŋwiye ghi awa mba məjìm, mə̀Ju fɔrɔ bəd ne kayi mə̀Ju, tì bèrì apan imbìghè abə Ŋwiye ne yaʼi ìwa Mbaʼ.

19Ane, mbə̰ mbe ne kayi mə̀Ju, chəyi mbə̀ ywirì yaʼ bəd tìsɔ̀ʼ. Amad anìŋ, mbə̰ mbe se inga iwaŋ abɔ̀ʼ bəd Ŋwiye bə̀ yaʼ inga inəbi Ŋwiye. 20Mba ya bəd Ŋwiye ne təmi kà igun ati ze ne bədkə̀n Ŋwiye fɔrɔ bədtɔm Kristo ya bɔmi. Yeso ya iteg ibug nəb mbègtog inga ati nəb ze. 21Kristo ya wə̀d ne nyìme nəb Ŋwiye ghìyə̀ gha ze kweg yaʼ mbàn Ŋwiye ìzḛzḛ abə Anɔŋisəg. 22Icheg ne bə̀ yaʼi ane ifɔti tì məd, mbə̰ inən biri bə kweg abɔ̀ʼ mə̀mbin. Mbə̰ biri kweg si yaʼ asiŋi ne Ŋwiye we chùghə inga ane Àzi Azwighi.

Currently Selected:

Efesùs 2: MBTP

Highlight

Copy

Compare