Efesùs 3
3
Pɔl ghàm Ìngam Ŋwiye abə bəd mbe ne kayi mə̀Ju
1À ya imbə̀ʼ anug azo̰ ne Ŋwiye fɔ̀ti bəd məjìm ane ìmbi imɔʼ, ne mo Pɔl yaʼi wə̀d ndəŋ. Mo ya wə̀d ndəŋ imbə̀ʼ awən mbə̰ mbe ne kayi mə̀Ju anjìm icheg ne mə chètè ikən chɔm imbə̀ʼ Yeso Kristo. 2Mə kyèri gha mbə fə zug àfàʼì ze ne Ŋwiye chɔ̀ʼi amə nàʼ inum. Wì ya chɔʼ amə gha mə̀ chete inug imbə̀ʼ ìchɔ̀mì we ne wì ghi inən. 3Ŋwiye ya ghì mə kyeri inug mbe ne yaʼi inə̀mbi icheg ne mə̀ ya fə ŋwàʼri məyi iki ìngam chà inən. 4Mbə̰ mə̀ fɔŋ inug mbo̰ ne mə̀ ŋwaʼri, ìmbən itog biri zen imbə̀ʼ inug mbe ne yaʼi inə̀mbi imbə̀ʼ Kristo ne mə̀ kyeri. 5Inga ineg mbe aneg, chəyi Ŋwiye ya ghi gha bəd kyeri anug azo̰. Àsi amad anìŋ, Ŋwiye fə chè anjìm Azwighi məd chwi inug mbo̰ abə ìmbi bədtɔm ìzḛzḛ bə̀ chwi abə ìmbi bədkə̀n. 6Anug ze ne yaʼi inə̀mbi ya gha, anjìm ikən chɔm, bəd mbe ne kayi mə̀Ju fə si mbe àjəgnəb abɔ̀ʼ mə̀Ju. Mbɔb ya si isiŋi nyɔd ane nyàmnyɔd imɔʼ tì mə̀Ju. Mbɔb fə bə̀ bèrì àzɔb tì aba ane anug ze ne Ŋwiye ya che anjìm Yeso Kristo kàʼ.
7Mə ya fàʼà ni ghà ikən chɔm gho̰ anjìm ìchɔ̀mì Ŋwiye we ne wì che anjìm ika məd nàʼ inum. 8Ka mə bì kə chè wə̀d kwa ne yaʼi abɔ̀ʼ bəd Ŋwiye məjìm, à ya Ŋwiye ya ghi ìchɔ̀mì inum gha mə̀ ghama abə bəd mbe ne kayi mə̀Ju imbə̀ʼ ifɔmi we ne chəyi wi biri nɔʼ mèg. À ya ifɔmi ne tì beri məyi icheg ne tì kyeri Kristo. 9Wì ya bə̀ chɔʼ amə gha mə̀ ghiyə wə̀d ijìm kyeri anug azo̰ ne yaʼi inə̀mbi, ne Ŋwiye we ne ya tangi ighi ijìm, ya nə̀mbì inga ìzi fìŋ nɔ̀ʼ ane nyumə̀ ne wì ya tangi isəg. 10Wì ya ghì ane ni gha, amad anìŋ, anjìm ifeti bəd Kristo, izwighi ka ka mbe ne yaʼi ikaŋ fɔrɔ ìmbɔb məfɔn mbe tì mbi bàd iwe Ŋwiye ane tinɔnjì nɔʼ nɔʼ. 11Aŋa ya anug ne wì ya fə chuʼri nɔ̀ŋì bɔŋ wì ya se tànga isəg. Wì fə chè anjìm Yeso Kristo ne yaʼi ìwa Anɔŋisəg ghì anug angu. 12Anjìm icheg ne tì yaʼi ane ifɔti tì Kristo fɔrɔ anjìm icheg ne tì nɔŋi ibḛfiŋ igun məd, tì fə bèrì ika ni ghò imbìghè abə Ŋwiye ne chəyi te bɔ. 13Ane, mə we bòʼo ibo inən gha imbə̀ʼ ìtən fìŋ nɔ̀ʼ bɔd imbə̀ʼ icheg ne mo we zə̰ ngəʼ imbə̀ʼ awən. Inug mbo̰ ijìm ya ni wètì awən.
Kristo kɔ̀ŋ bəd
14À ya anjìm anug ze ne Ŋwiye ya fə fàʼi ne mə gɔ̀mɔ̀ itog inwḭ aseg imbìghè abə Mbaʼ anyumə̀ ne mə̀ chàʼrà Ŋwiye. 15À ya ibo ne inəbi bəd məjìm we ne yaʼi ikaŋ àbɔ̀ŋɔ fɔrɔ we ne yaʼi igun isəg we nìŋə ìwɔb ikum. 16Mə we chàʼrà Ŋwiye gha, ane ifɔmi məd we ne chəyi wi biri nɔʼ mèg, wì ghiyə ìtən fìŋ təm kà anjìm ika we ne Azwighi məd ze nàʼà. 17Mə we bə̀ chàʼrà Ŋwiye gha ìwən ibḛfiŋ ghiyə Kristo yaʼ inga ìtən fìŋ, mbə̀ bə ya kɔ̀ŋɔ̀ Ŋwiye bə̀ ya kɔ̀ŋɔ̀ ìmbən məfi fɔrɔ ìtən njàbi. Mbə̰ mə̀ ghì ane, mbə biri təm kà inga àkɔ̀ŋì icheg azed ne ighaŋ taŋ nyi aseg bə̀ təm kà icheg nəb ne ati nəb taŋ kà. 18Mə we chàʼrà Ŋwiye gha, mbə̰ tì bəd Ŋwiye məjìm, mbə̀ bere ika ni kyeri icheg ne Kristo taŋ kɔ̀ŋ awən kwàʼ icheg chɔm. 19Mə we bə̀ chàʼrà Ŋwiye gha mbə̀ kyeri gha, icheg ne Kristo kɔ̀ŋi awən we chè icheg ne tì bəd kyeri. Mbə̰ mə̀ taŋ kyèri icheg ne wì kɔ̀ŋi awən, nji ìwən ikuchèg biri si yaʼ icheg ìwi Ŋwiye.
20À ya Ŋwiye nàʼi ika we ne fàʼà inga ina. Məd we tì wì ghi inug ina ne nɔʼi chè inug ne te bìre ibo kə̀ inug ne te kɔ̀ndɔ. 21Tikəri bəd tijìm te ne yaʼi inga ifeti bəd Kristo fɔrɔ bəd məjìm mbe ne yaʼi ane ifɔti tì Yeso Kristo, mbe ghumni Ŋwiye kwàʼ ane ighə̀m imɔʼ. À ya ane.
Currently Selected:
Efesùs 3: MBTP
Highlight
Copy
Compare
Share
Want to have your highlights saved across all your devices? Sign up or sign in
© 2019 CABTAL
