2 Tèsàlonikà 2
2
Wə̀d tìzughə̀ biri yeʼe bɔŋ Yeso se yèʼe
1Ìmbum məfi fɔrɔ ìtum njàbi, tì kə̀b ni ghàm inən imbə̀ʼ icheg ne Anɔŋisəg Yeso Kristo biri ywiri yeʼe fɔrɔ icheg ne tì biri fete, ghò abɔ̀ʼ məd. Tì we bòʼo ibo inən gha; 2Imbə̀ʼ mbə̰ saŋa awən gha bəd burə ìmbən atog kə̀ chìkì ìtən fìŋ ane icheg ne mbɔb mbe ghà gha aneg ze ne Anɔŋisəg biri ywiri yeʼe fə pè. Imbə̀ʼ mbə̰ bḛ awən tikən mɔ̀ʼɔ, kə̀ inug chete mɔ̀ʼɔ, kə̀ ìŋwàʼrì mɔ̀ʼɔ imbə̀ʼ anug azo̰ gha à ya mba cha, ne kayi mba. 3Imbə̀ʼ mbə̰ saŋa awən gha wə̀d mɔ̀ʼɔ tambi awən ka. Aton ya gha, nyùmə̀ we ne bəd biri ya zɔ̀ŋɔ̀ ni ton awɔb Ŋwiye biri chè, wə̀d inug izəg#2:3 wə̀d inug tibɔ̀ŋ bə̀ dù asaŋ, bɔŋ aneg ze ne Anɔŋisəg Yeso biri yeʼe se pè. À ya wə̀d ne Ŋwiye fə nɔŋi gha wì biri ghò inga asiŋi ngəʼ ane ighə̀m imɔʼ. 4Wə̀d inug izəg we biri chɔʼri inug imbə̀ʼ Ŋwiye bə̀ nɔ̀ ìwi nyɔd igun ighi ijìm mbe ne bəd mbe ghùmnə Ŋwiye angu. Wì biri bə nyi chùghi inga mbàn Ŋwiye se ghà gha zìye ya Ŋwiye.
5Àkə chəyi mbə̰ mbe wènde gha anyumə̀ ne mə̀ ya yaʼi tì inən mə yaya ghà inug mbo̰ inən? 6Amad anìŋ, mbə̰ kyèri awən aghi ze ne kiri nyìme wə̀d inug izəg we gha imbə̀ʼ wi kiri yeʼe. Wì biri ghum si chwi ìwi nyɔd asaŋ ane nyùmə̀ kòʼi. 7Ika we ne ghìyə̀ bəd se ghìyə̀ inug izəg, wi fə se fàʼà inga bəd. Wə̀d we ne kə̰ gha imbə̀ʼ inug mbo̰ duwə yi, wì biri chè imbìghè ni kən anene ghò pè ane nyumə̀ ne Ŋwiye biri chì aməd. 8À ya anyumə̀ we ne, wə̀d inug tibɔ̀ŋ biri chwi ìwi nyɔd asaŋ. Anɔŋisəg Yeso biri chì aməd igun ati kyen məd anyumə̀ ne wì yèʼe inga ìwi ìzḛzḛ njandi njandi. Wì biri fə àzi Azwighi, ze zweti wə̀d inug izəg we nìmni. 9Wə̀d inug izəg we biri ya fàʼà inug ne à ya Sàtàn nàʼi ika ibo. Wì biri tambi bəd ane iyeti inug fɔrɔ inug kyen kyen ne wì biri fàʼ ne kayi mbe tesiʼ. 10Wì biri ghì tiku inug tibɔ̀ŋ nɔʼ nɔʼ ni tambi bəd mbe ne biri ku nim. Mbɔb biri ku nim imbə̀ʼ icheg ne chəyi mbi ya kɔ̀ŋi ni bḛ tesiʼ ni pum. 11À ya aton ne Ŋwiye biri sàŋì awɔb gha mbe febre, se bḛ yaʼ inug ako wən. 12À ya ane ne bəd məjìm mbe ne ya to̰ awɔb tesiʼ, zì ìwɔb ibḛfiŋ yaʼ igun inug izəg biri ku nim.
Ŋwiye chɔʼ awən gha mbə̀ pum
13Ìmbum məfi fɔrɔ ìtum njàbi ne Anɔŋisəg kɔ̀ŋi, ze kòʼ ina ni ya nàʼà məyakà abə Ŋwiye imbə̀ʼ awən mà nyumə̀ ijìm imbə̀ʼ icheg ne Ŋwiye ya chɔʼ awən bɔŋ se tànga isəg#2:13 Ìŋwàʼrì mɔ̀ʼɔ ghà aŋa gha Ŋwiye ya chɔʼ awən icheg ighi mbeg, gha mbə̀ pum. Mbə̰ biri pum icheg ne Azwighi Ŋwiye ze ghìyə̀ mbə zḛ, fɔrɔ anjìm icheg ne mbə̀ nɔŋi ibḛfiŋ igun tesiʼ. 14Ŋwiye ya chè anjìm ikən chɔm we ne tì ya ghàmi inən kàrì awən gha mbə̀ pum ni ghì gha mbə̀ bere ighumni icheg ne Anɔŋisəg Yeso Kristo bə bèrì. 15Icheg ne ze yaʼ anìŋ, ìmbum məfi fɔrɔ ìtum njàbi, mbə̀ taŋ təm kà ane ìwən ibḛfiŋ bə̀ taŋ nyìmi inug mbe ne tì ya chwiti inən. Mbə̀ nyìmi inug mbe ijìm, kə̀ àkə mbe ne tì ghàmi ghàmi, kə̀ mbe ne tì ŋwàʼri.
16Anɔŋisəg Yeso Kristo məd məd fɔrɔ Ŋwiye ne yaʼi ìwa Mbaʼ ya kɔ̀ŋ awa ghì ìchɔ̀mì ina bə̀ nəri ìta fìŋ ane icheg ne chəyi ti biri nɔʼ bɔd. Ŋwiye bə̀ ghì tì beri ikɔndi chɔm ni ghɔ̀m isu. Tì ya chàʼrà Ŋwiye gha, 17wì bə̀ nəri ìtən fìŋ bə̀ nàʼ ika inən ni fàʼ ìfàʼì chɔm ijìm bə̀ ya ghàmà tìngam chɔm mà nyumə̀ ijìm.
Currently Selected:
2 Tèsàlonikà 2: MBTP
Highlight
Copy
Compare
Share
Want to have your highlights saved across all your devices? Sign up or sign in
© 2019 CABTAL
