2 Tèsàlonikà 1
1
Ichaʼri
1À ya mo Pɔl ŋwàʼri àŋwàʼrì azo̰. Mə we aŋa tì Sayilàs fɔrɔ Timotì. Mə ŋwàʼrì anìŋ inən, mbə̰ bəd Kristo mbe ne yaʼi inga ifeti we a Tèsàlonikà. Mbə̰ ya bəd Ŋwiye ne yaʼi ìwa Mbaʼ fɔrɔ bəd Anɔŋisəg Yeso Kristo.
2Ŋwiye ne yaʼi ìwa Mbaʼ tì Anɔŋisəg Yeso Kristo ghiyə ìchɔ̀mì inən bə̀ ghì mbə̀ chughi ane àbɔrɔ̀bɔd.
Ŋwiye biri saʼ bəd anyumə̀ ne Kristo biri ywiri yeʼe
3Ìmba məfi fɔrɔ ìta njàbi, tì bèrì ni ya nàʼà məyakà abə Ŋwiye aghəm ajìm imbə̀ʼ awən. Ze bɔ̀ŋ gha tì ghiyə ane imbə̀ʼ icheg ne ìwən ibḛfiŋ igun Ŋwiye we kwèghe ghò imbìghè bə̀ fɔrɔ imbə̀ʼ icheg ne mbə̰ mbe chè imbìghè ni ya taŋ kɔ̀ŋɔ̀ mə̀mbin. 4À ya aton ne te kɔ̀mɔ̀ ìwa igo imbə̀ʼ awən inga tifeti bəd Ŋwiye. Tì ya kɔ̀mɔ̀ igo imbə̀ʼ icheg ne mbə̰ zì ibḛfiŋ igun Yeso Kristo kwàʼ icheg chɔm fɔrɔ imbə̀ʼ icheg ne mbə nyìʼè fìŋ anyumə̀ ne mbe chɔ̀ʼɔ ìmbən ibɔʼì ighog fɔrɔ anyumə̀ ne mbə̀ yaʼi inga tiku ngəʼ ijìm.
5Inug mbo̰ ijìm ya aneni ni chwi gha Ŋwiye ya sàʼa bəd ane ikuchèg ne koʼi. Àzo̰ chwi gha Ŋwiye biri ghì mbə̰ kòʼ ni nyi inga anug ìfɔ̀n məd anjìm ngəʼ ze ne mbə̰ mbe zə̰. 6Ŋwiye we ghìyə̀ anug ne koʼi. Wì biri ghum zì ngəʼ igun bəd mbe ne nàʼà ngəʼ inən. 7Àsi mbə̰ mbe ne zə̰ ngəʼ imbə̀ʼ aməd, wì biri ghì gha mbə̀ bere àzùtì. Wì biri bə ghì mba ina bə bèrì àzùtì. Wì biri ghum ghì ane anyumə̀ ne Anɔŋisəg Yeso Kristo biri swiʼi ikaŋ àbɔ̀ŋɔ inga ìkìmi iywid tì ìmbi mbè angirə̀ ka ka. 8Wì biri ghum yeʼe ni zì ngəʼ igun bəd mbe ne to̰ awɔb Ŋwiye bə̀ to̰ awɔb ni zugri ikən chɔm we ne ìwa Anɔŋisəg Yeso ya yeʼe tì ìwiwən. 9Mbɔb biri nyi inga ngəʼ ne chəyi ìnwḭ. Chəyi mbɔb biri nɔʼ bàd Anɔŋisəg. Chəyi mbɔb biri nyi inga ighumni kyen məd ka. 10Ane aneg ze ne Anɔŋisəg biri yeʼe, bəd məd biri se yète məd. Bəd məjìm ne bḛ aməd biri se ghùmnə aməd. Mbə̰ inən biri bə̀ yaʼ abɔ̀ʼ inɔb imbə̀ʼ icheg ne mbə̰ inən ya bə̀ bḛ ikən chɔm we ne tì ya ghà inən.
11À ya aton ne te chàʼrà Ŋwiye mà nyumə̀ ijìm imbə̀ʼ awən gha ìwa Ŋwiye ghiyə mbə̀ ya chùghə ane ikuchèg ne wì ya kàri awən gha mbə̀ chughi. Tì we bə̀ chàʼrà Ŋwiye gha, wì ghiyə mbə̀ ya fàʼà inug chɔm mbe ne mbə̀ kə̀bi ni fàʼ, bə̀ mànì àfàʼì ze ne mbə̰ mbe fàʼà anjìm ìwən ibḛfiŋ. 12Tì ya chàʼrà Ŋwiye ane ni ghì gha bəd ya ghùmnə Anɔŋisəg Yeso imbə̀ʼ awən, bə̀ ghùmnə awən imbə̀ʼ ìchɔ̀mì we ne Ŋwiye tì Anɔŋisəg Yeso Kristo ghi inən.
Currently Selected:
2 Tèsàlonikà 1: MBTP
Highlight
Copy
Compare
Share
Want to have your highlights saved across all your devices? Sign up or sign in
© 2019 CABTAL