Titus 2
2
Isambilizyo lyakusimichila ilyi Klezia
1Ukuwa vino wandi uwasambilizya viwe avyisambilizyo zima ilyi Klezia. 2Uwanena wasongo wonsi watize wakolwa, wawe namano wayisunga; awisuwilo zima, nulukundo, nukuzizimichizya. 3Mumwata wowonye uwanena nawanachi wasongo wakwikala numwata wawanachi wane awakwe Leza. Watize wawe awachawufi, nanti akuwa awazya wipala. Wazipila awawa awasambilizya wavintu vizima, 4alyakuti wangasambilizya inchembele ukukunda awalume nawana wawo, 5wayisunga nukwikala ichete, wasunga ing'anda zyawo ichete, wane wakatontela awalume, alyakuti wumwi atize awavwanjila amazwi yano yafuma kwe Leza uluwi.
6Mumwata wowonye uwachinchizya awalumendo wayisunga. 7Muvintu vyonsi, wewenye uwe wechilolelo wakuwomba imilimo mizima. Mumisambilizizye yako uwasimichila. 8Uwavwanga amazwi yakusimichila yano wumwi atanga ayasusye, alyakuti awalwani wako wangalola insoni ndiwapotwa ukulola ichiwipe chimwi chino wangatuvwanjila uluwi.
9Awawomvi wazipila ukutontela wayisikulu wawasechelesya muvintu vyonsi. Watize wapanzyania nawayisikulu, 10watakwiwa, ukuwa waloleka kuno awasuwilwa swinya awazima, alyakuti wangachindika isambilizyo lyakwe Leza e Katula witu mwakwe vyonsi vino wakuchita.
11Chino Leza wayiwumbulila wawo ankumbu zyakwe kukutula awantu wonsi. 12Muno ankumbunye zyakwe naswe twazipila ukuleka ukulumbula imiwele miwipe nulunkumbwa lwamunsi, ngapano tuwayisunga mumyikalile yitu, tololoke, tuwapepa Leza pano tuli munsi. 13Amuno tukulindilila uwanda wimichile wuno tukalolela, pano uwukankala wakwe Leza mukulu witu nu Katula e Yesu Klistu wuliloleka. 14Wayipile kwesweswe, kukututula kuwuwipe aleka tuwa swe watele wane awakwenye wenganye-nsu wane wakaluchila ukuchita ichete.
15Sambilizyanga vyonye-vyoo, uwawomba namaka yako yonsi pano ukuwachinchizya mbali nukuwakalipila wakivwa. Utaleka wumwi akuchefye.
Currently Selected:
Titus 2: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
