Romans 4

Abrahamu awili chilolelo

1Ngafwandi twandi tuti wuli nivyakwe Abrahamu, ipongo litu kuno twafumilila? Nga chalinji wuli kwakwe weliwe? 2Nd'achino atele Abrahamu walinji amuzima kwakwe Leza kumilimo yakwe yino wachisile, wanga awayitumvya. Ukuwa atanga ayitumvye pakwe Leza. 3Amawaliko Matela yavwanga yati, Muno Abrahamu walinji nisuwilo, achaleka wasuwizile Leza nga Leza amupochelela ngati amulungamane. 4Umulalikwa akalambulwa; ndi wapochelela ichilambu chisiwa achawila, ukuwa akatela wachiwombela. 5Ukuwa katutele twelenganie kuvyamuntu wino wasuwila Leza nanti kupechela vino angayichitila. Wowonye avino Leza akalola isuwilo lyakwe ngapano amupanzizya umulandu ichete. Wowonye avino Leza akalungamika umuntu. 6Chonye-choo achino nu Davidi watasile pano wavwanganga ivyachimwemwe chamuntu wino Leza wamupochelela ngati amulungamane, nanti milimo:

7Awalongo awantu wane Leza wawatetela ukuwifya kwawo, wasyusyuta—nukusyusyuta amawembuko yawo!

8Awalongo umuntu wino Leza atawalika uluwembu lwakwe!

9Wuzye ichimwemwe choo chino Davidi watasile achakwe wane walembwa uwusilamo watupu? Awe. Achakwe nawalyanye wane watalembwa uwusilamo. Amuno tuweni ku Mawaliko Matele yano yavwanga yati, Abrahamu wasuwizile Leza, achaleka muno alisuwilo lyakwe, Leza wamupochelezile ngati amulungamane. 10Ngafwandi chonye-choo chachisilwe mpindi-chi? Wuzye ye apano Abrahamu atani alembwe uwusilamo pamwi ye walembwa? Chachisilwe pano atani alembwe. 11Walemvilwe uwusilamo pansizi, nukulembwa kwakwe, chalinji achimanyilo chakupanichisya ukuti muno alisuwilo Leza wapochelezile Abrahamu ngati amulungamane pane wachilinji ukuwa amusilamo. Achaleka fwandi Abrahamu ali ngati amukwasi wakwe wonsi wane wasuwila Leza, wane Leza wawapochelela ngati awalungamane, chingatenga watalembwa uwusilamo. 12Swinya weyisi wakwe wane walembwa uwusilamo, asi weyisi muno walembwa uwusilamo, ukuwa amuno wali nisuwilo ilililyonga nalino nutatanye Abrahamu walinji nalyo pane wachilinji ukuwa amusilamo.

Ilayilizyo lino Leza walayilizizye Abrahamu

13Leza walayilizizye Abrahamu nikwata lyakwe ati, Aliwapa insi yonsi. Walayilizizye wonye-woo, musi amuno Abrahamu watontezile amasundo, ukuwa amuno walinji nisuwilo, achaleka Leza amupochelela ngati amulungamane. 14Amuno fwandi ndi ilayilizyo lyakwe Leza likapwa kwewano watontela amasundo, yefwandi isuwilo lyamuntu alyavye, nilayilizyo lyakwe Lezanye nga ye alyachani? 15Kuno kuli amasundo yakwe Musa akuno Leza akafulichilwa; ukuwa kuno kusi amasundo, akutela kusi ukuchila amasundo.

16Fwandi Leza walayilizizye muno alisuwilo lyakwe Abrahamu, ukuti ilayanonye lyolyo lipanichiswe kuno achawila chakwe Leza kwikwata lyakwe Abrahamu lyonsi-wasi awano wakatontela amasundo watupu, ukuwa nawonsinye wane wasuwila ukusuwila kutupu ndivino Abrahamu wasuwizile. Amuno Abrahamu-nye awili mukwasi witu swensinye kumuzimu; 17ndimuno Amawaliko Matela yavwanjila yati, Naleka wawa weyisi wamyiko mivule. Achaleka ilayilizyo lino Leza walayilizizye Abrahamu wino wamusuwizile alizima muno amaka yakwe Leza—Abrahamu wasuwizile Leza wino akazyulupula awafwe swinya wino izwi lyakwe tupu likaleka chino chitalinji-po achitumbuka. 18Abrahamu walemasyanga isuwilo mbali nukulolela, chingatenga mwisuwilo lyakwe vimwi vyamuchilinganianga. Achaleka wawa amukwasi wamyiko mivule. Chawa ndimuno Amawaliko Matele yavwanjila yati, Uliwa nikwata vule nkaninye. 19Chingatenga inkulo yakwe Abrahamu yatezile kwela yafika imyaka umwanda; ukuwa naponye chingatenga uwulapwa wakwe watezile watozoka, atatenzile atonte mwisuwilo lyakwe; nanti apano welenganianga kuno nu Sera-nye atanga akwate awana. 20Atatela alechelezya isuwilo, swinya atavwilikanga kwechino Leza wamulayilizizye; isuwilo lyamusimpisizye, awatumvya Leza. 21Apanichisya mbali nukusuwila numwezo wonsi kuno Leza alifisya ilayilizyo lyakwe. 22Achaleka muno Abrahamu walinji nisuwilo, Leza wamupochelezile ngati amulungamane. 23Namazwi yakuti Leza wamupochelezile ngati amulungamane yatalinji ayakwe weliwe wenga. 24Yataka naswenye swewantu twandi tuwapochelelwa ngati swewalungamane muno tukusuwila wino wazyulupuzile Yesu Imfumu yitu kumfwa. 25Leza wamulemesile alyakuti ayize atufwile kuluwembu lwitu, amuzyulupula alyakuti tulungamikwe kwe Leza.

Currently Selected:

Romans 4: WWN82

Highlight

Copy