Romans 10
10
1Wanawitu, indi nichiluka chonsi mumwezo wane ukuti nche awantu wane wangiza watulwe! Ye, nkawapepela kwe Leza wuli! 2Nenenye nekalola wawo kuno wakalondesya Leza nimyezo yawo yonsi. Ukuwa watamanya muno wangamuvwambila. 3Amuno watamanya inzila yino Leza akalungamichila awantu kwakwe weliwe, walondanga ukuma inzila zyawo; achaleka watazumizile ukupita munzila yakwe Leza wino akalungamika awantu. 4Amuno Klistu wasyusyuta amasundo alyakuti wilamuntu wino akumusuwila angalungama kwe Leza.
Itulwa alyakwe wonsi
5Musa wawalisile ivyakulungamikwa kwakwe Leza ndi watontela amasundo, ati, Wensi wino akutontela amasundo akuwelanga nuwumi kumasundo. 6Ukuwa kuvyakulungamikwa kwe Leza muno alisuwilo wati, Utize uwayiwipa uwati, Ngaweni alikwela mwiyulu? (akuli kuti ayisye Klistu pansi). 7Utize uwafwa nukwelengania uwati, Ngaweni aliyika pansi aye munsi pansi-pansi? (akuli kuti akatusye Klistu kuwafwe). 8Chavwangwa chati, Imbila yakwe Leza ili papipi nawe, ili pamulomo wakonye namumwezo wako-akuli kuti, Imbila yisuwilo yino tukawawilila. 9Amuno ndiwayizumilila numulomo wako wati, Yesu a Mfumu, swinya wasuwila mumwezo wako wati Leza wamuzyulupuzile kumfwa, ye ulitulwa. 10Amuno tukasuwilila nimyezo yitu apano atulungamikwa kwe Leza; tukayivwanjila nimilomo yitunye nga atutulwa. 11Amawaliko Matele yavwanga yati, Wensi wino akumusuwila atalisonzwa insoni. 12Akuli kuti awantu wonsi, amuno pasi uwusyano wumwi ku wa Yuda nanti amakandi; e Leza a Mfumu wenganye wawantu wonsi, akapepa wonsi wane wakamulilila. 13Ndivino Amawaliko Matele yavwanga yati, Wensi wino akupunda izina lya Mfumu, akumulambilizya, alitulwa.
14Ngafwandi wangamwita wuli, ndiwatasuwila? Swinya nga wangasuwila wuli, ndiwativwa imbila? Nga wangivwa wuli, ndi imbila itawizwa? 15Nga imbila ingawizwa wuli, ndi wamwi watatumilwe? Ndivino Amawaliko Matele yavwanga yati, Awalongo wuli wane wakapisya imbila yamazwi mazima! 16Ukuwa watapochelela Ilandwe zima wonsi. Ayizeya-nye umwenecho wavwanzile ati, Mfumu, ngawaweni wane wasuwila amazwi yitu? 17Achaleka fwandi isuwilo likafuma kumazwi yano wakwivwa. Nayo amazwi yano wakakwivwa alili Landwe Zima ilyakwe Klistu.
18Ukuwa nakuwuzya nkuti, Wuzye achakusimichilanye watatela wivwe imbila? Achakusimichilanye wivwile—ndivino Amawaliko Matele yavwanga yati,
Ukupunda kwamazwi yawo kwafisile munsi yonsi;
amazwi yawo yafisile kuno insi yapakula.
19Swinya nkuwuzya nkuti, Wuzye awa Israeli watamanyile? E Musa-nye nalwakwe awino wandi atalichile ukutolelela ati,
Ndileka muchitile awantu wane wasi amwiko-mwiko uwuzuwa;
ndileka muvitilwe umwiko wawantu watumpe.
20Swinya Ayizeya wasinga pano akuti,
Nazanilwe nawano watamvwamvile,
nalolesile kwewano watandonzile.
21Ukuwa ku vya wa Israeli watili, Nakunzuluzile amakasa yane umusanya wonsi nuwukulu kuwantu mintawela iyakalandawuzi.
Currently Selected:
Romans 10: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
