Revelation 9
9
1Ngapano umungeli wachitisano alizya inkangang'ombe yakwe. Indola ulutanda luno lwalukusile mupela alupona pansi; 2lwapilwe ki wachizinji chizyolonjela; nichusi achifondomoka mwenemo, ngati achusi chino chikufuma mwilungu kulu; ichusi chino chafondomosile mwizyolonjela achifitika ukuwala kwamusanya mulwelele. 3Makanta afuma muchusinye chocho apona munsi apwa amaka ngati amaka yamakalayili. 4Makantanye weyo wanenilwe ukuti atize ayonone isote, nant'amiti, nant' avino vikamela; ukuwa ayonone awantu wano wasi nichimanyilo chanamba yakwe Leza pampumi zyawo. 5Makanta atazumilizizwe ukukoma awantunye wawo nkandi ukuwayimvya kumyezi yisano. Uwulumila wakulumwa numakanta wuli ngati awulumila wumo umuntu walumwa nikalayili. 6Nga mumpindinye yoyo iyamyezi yisano awantu waliwaluchila imfwa, lelo watalitela wayilole; waliwalonda ukufwa, lelo imfwa iliwasamala.
7Makanta walolesile ngati wekavwalo wino wapimpa kukuyalwa isumo; pamitwe yawo palolekanga ngati atwamba twakwe golide, nimpumi zyawo zyalinjingatiampumi zyawalawa. 8Nameya yakwe makatanye weyo yakoline ngati anyele zyawanachi, namino yawo yalinji ngati amino yavimbwi. 9ivifuwa vyawo vyavwimvilwe navino vyalolekanga ngati avino awavita wakazwala pavifuwa, nacho ichongo chakupapuka kwamapa yawo kwalinji ngati achongo chamutikimbo wakwe wakavwalo wavule wano wakukwema amagereta yisumo pano wakusamalila kukulwa. 10Ali nimisinda nimbolela kweneko, ngati ambo lelo zyikalayili, imisindanye yoyo yino ali nayo ayino yamupa amaka yakuchisila awantu kumyezi yisano. 11Ali nimfumu yino yamuteka, wino awili mungeli mukulu wachizinji chizyolonjela. Izina lyakwe mu chiHeberi we Abadoni; namo mu chiGriki izina we Apolyoni (chino chikusula ukuti, Echononi).
12Uwulanda wakutalika wasila; lelo pansizi pasyalichile uwulanda wukulu wuno wukwiza uwawangeli wanji wawili.
13Ngapano umungeli wachitimutanda alizya inkangang'ombe yakwe. Nga injivwa ichongo chikufuma mumafunku yakavuwa kakwe golide kano kalinji pankolelo pakwe Leza. 14Izwi alivwanga kumungeli wachitimutanda wino walinji ninkangang'ombe aliti, Sapula awangeli wani wano wanyepwa paluzi lukulu e Yufureti! 15Awangelinye wawo woni awasapulwa; wayanizizwe ukuti pampindinye yoyo, pawandanye uwamwezinye wowo numwakanye wowo wize wakome ichipya chonga ichachititatu ichawalawa wonsi. 16Inenwa impendwa yawavita wano wakakwelela pakwe wakavwalo: walinji imyanda namyanda mintapendwa (200,000,000). 17Muchilolwa chane ndola wakavwalo nawano wakwelezile penepo: walinji nivyakuchinga pavifuwa iviwenzu ngati amulilo, ivifituluchile ngati aliwe langalile ifituluchile, niviwenzuluchile ngati akuwenzuluchilawenzuluchila. Imitwe yakwe wakavwalo yalinji ngati amitwe yavimbwi, yino mumilomo yawo mwafondomosile umulilo, nichusi, niviwenzuluchile. 18Awalawa wachipya chonga ichakwe vitatu wakomilwe nivifwanganye vyovyo vitatu: umulilo, nichusi, nga niviwenzuluchilenye vyovyo vino vyafondomokanga ukufuma mumilomo yakwe wakavwalo. 19Amuno amaka yakwe wakavwalo yali mumilomo, nakumisinda yawo. Imisinda yawo ili ngati anzoka, ili nimitwe, yino wakachisila awantu.
20Awalawa wano wasyazile, wano watakomilwe nivifwanga, watatela waleke ukuchita vino woliwonye nalwawo welewuzile. Watatela waleke ukupepa wamuzimu wawipe namakolania yakwe golide, nayakwe silivara, nayamukuwa, namawe, nimiti, vino visi naminso yakulolela, nanti amakutwi yakwivwila, nanti amanama yakupitila. 21Awantunye wawo watatela watontolokwe nanti akuwuchikoma wawo, nanti akupanda-panda, nukuzenkenta kwawo, nanti awung'o.
Currently Selected:
Revelation 9: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
