Revelation 7
7
Awa Israeli imyanda ikumi impindi umwanda wonga namakumi yani nimpindi zini (144,000)
1Pansizi pakwe vyoo ndola awangeli wani wimilile pamafunku yansi yani, wakulesya imiza yini iyamunsi, alyakuti umuza wutize wuwapupa munsi, nanti akupupa pesumbi, nanti akumuti wumwi. 2Nga ndola umungeli winji akwiza akufuma kapela asenzile ninamba yakwe Leza mumi. Apunda kuwangeli-nye wawo wani, wano Leza wawapile maka yakononela insi nusumbi, nizwi kalambane. 3Umungeli-nye weyo avwanga ati, Mutize monone insi nanti wesumbi, nanti amiti, tusuke tuwike ivimanyilo vyanamba pawawomvi wakwe Leza witu pampumi zyawo. 4Inenwa impendwa yakwe wano wawisilwe ichimanyilo pampumi zyawo walinji imyanda ikumi impindi umwanda wonga namakumi yani nimpindi zini (144,000), awamyiko yonsinye iyawa Israeli. 5Awamwiko wakwe Yuda wano walinji nichimanyilo chanamba, walinji imyanda ikumi impindi ikumi lyonga naziwili (12,000), kumwiko wakwe Rubeni imyanda ikumi impindi ikumi naziwili (12,000),nakumwikowakwe Gadi imyanda ikumi impindi ikumi naziwili (12,000), 6nako kumwiko wakwe Asheri imyanda ikumi impindi ikumi naziwili (12,000), kumwiko wakwe Nafutali imyanda ikumi impindi ikumi naziwili (12,000), kumwiko wakwe Manase imyanda ikumi impindi ikumi naziwili (12,000), 7kumwiko wakwe Simeoni imyanda ikumi impindi ikumi naziwili (12,000), kumwiko wakwe Levi imyanda ikumi impindi ikumi naziwili (12,000), kumwiko wakwe Isakari imyanda ikumi impindi ikumi naziwili (12,000), 8kumwiko wakwe Zebuloni imyanda ikumi impindi ikumi naziwili (12,000), kumwiko wakwe Jozefu imyanda ikumi impindi ikumi naziwili (12,000), nakumwiko wakwe Benjemani imyanda ikumi impindi ikumi naziwili (12,000).
Iwumba 'kulu
9Pansizi pevyonye-vyoo njinula minso, indola iwumba kulu—lino pasi umuntu nanti wenga wino wanga apende awantunye wawo! lyalinji aliwumba lyawantu nawantu, wamyiko namyiko, awansi ndekane lekane, nindimi nandimi, wimilile pankolelo pandulu ya Mwana-ng'onzi, wazwite imyinjilo mitiswe, swinya walemile insamba zyatunchindu mumakasa yawo. 10Awapongomoka awapunda awati, Ukutulwa kwitu kukafuma kwe Leza, wino wapungama pandulu na ku Mwana-ng'onzi. 11Nawangeli wonsi, nawasongo, nivitumbulwa vyawumi vyoni awimilila awaliwilizya indulu. Ngapano awapona wafukime pankolela pandulu awakumvya nimpumi zyawo pansi awapakata Leza, 12awati, Amen! Ukutumvya, nuwukankala, namano, nukusalifya, numuchinzi, namaka, nukukazawana, avyakwe Leza witu amanda nuwinji umuyayaya-we! Amen!
13Songo wenga ambuzya ati, Nga awantu wawo wano wazwite imyinjilo mitiswe awaweni, nga wafumile-kwi? 14Intolelela inti, Ntawamanyile, mulali. Uwamanyile awewe. Anena ati, Awantunye waa awano wafyuka kuwuyimvi wukulu nkani. Wapwizya imyinjilo yawo muwazi wa Mwana-ng'onzi waleka yaswepa. 15Achaleka wimilile wapungama pandulu wandi awawachinjilila ninkandawa yampumi yakwe. 16Watalitela swinya walumwe nulusala nant' anzala, nant'alilanzi, nant'achilungula vitalitela viwoche; 17amuno Umwana-ng'onzi awino an pakasi pandulu, aliwa amuchemi wawo, awawakolelela kutuntopwezi twaminzi yawumi; swinya Leza aliwapyela aminsozi yonsi muminso yawo.
Currently Selected:
Revelation 7: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
