Revelation 6
6
Inamba
1Ngapano indola Umwana-ng'onzi wamatulula pamasyo yano pasilizilwe inamba, ngapano njivwa ichitumbulwa chonga ichavitumbulwa vyovyo ivyawumi vini chavwanga nizwi lino lyivwisile ngati akupanta kwamvula, aliti, Zanga! 2Injinula minso ndola kavwalo mutiswe. Wino wakwelezile pekavwalo walemile uwulapwa, swinya wapilwe akamba. Alompoka ngati wekachimvya kukuyachimvya.
3Ngapano Umwana-ng'onzi amatulula pamasyo yachitiwili; nga injivwa ichitumbulwa chachitiwili chavwanga chati, Zanga! 4Ekavwalo winji umuwenzu, atunka. Wino wakwelezile kavwalonye weyo wapilwe amaka yakutalika isumo munsi, ukuti awantu wakomana; wapilwe ulupanga lukulu.
5Ngapano Umwana-ng'onzi amatulula pamasyo yachititatu; nganjivwa ichitumbulwa chachititatu chati, Zanga! Injinula minso ndola kavwalo mutifi. Wino wakwelezile pekwavwalonye weyo walemile enamwezyo wachelelezyo chakung'wama mwikasa lyakwe. 6Injivwa chimwi chapunda ngati alizwi lino likufuma mukasi muvitumbulwa vini ivyawumi. Chikuti, intowa yangano ayachilambu chawanda wonga, nintowa zitatu izyankumba azyachilambu chawanda wonga. Ukuwa utize uyonone amafuta yamungungu nipala!
7Ngapano Umwana-ng'onzi amatulula pamasyo yachitini; ngapano njivwa ichitumbulwa chawumi ichachitini chati, Zanga! Injinulaminso indola kavwalo muwutuluchile. 8Izina lyakwe wino wakwelezile penepo walinji we Mfwa, nukuzimu kwakonsile mupipi-pipi, Vyapilwe amaka yachipya chachitini ichansi, alyakuti viwakoma nimpanga nichinkumbili, nindwala, nivikalanta vyalonde.
9Ngapano Umwana-ng'onzi amatulula pamasyo yachitisano. Nga ndola mwivungululu yakavuwa imizimu yakwe wano wakomilwe muno wawizyanga izwi lyakwe Leza wano swinya walinji nuwukalola wakusimichila. 10Awapongomoka nizwi kulu awati, We Mfumu Leza wamaka yonsi, wemutele nukusimichila! Wuzye pandi pazimbe ukufika mpaka-kwi apakuti upanzye awantu wamunsi uwasunde muno watukomile? 11Wonsinye wapilwe imyinjilo mitiswe; nukuwanena ukuti watele wapuze katichi, itele impendwa yawawomvi wawuye nawanyina wano walikowa ndivino woliwo wakomilwe ifike.
12Ngapano ndola Umwana-nang'onzi wamatulula pamasyo yachitimutanda. Kwalinji echononi wachizumazi, nilanzinye nalyo alifita, ngati amwenda wutifi uwuvwalambane, numwezi awuwenza awuwa-che, awuwa ngati awazi; 13intanda aziwalakata pansi ngati avitungulu vyamaku vino vikapona kumuti pano umuza wapunga. 14Iyulu alizimanjika ndivino kalata wakuvunga akavungwa, nimyambanye nivilila vyonsi avisowa napano vyalyata. 15Ngapano imfumu zyamunsi, wakateka nawamusika wakulu wavita, awachindame nawamaka, nawantu wanji wonsi, awazya nawanagwa, awaya awavwama muzyaninga namuvipokopoko vyamumyamba. 16Awanena imyamba nawamfuzi wakuti, Tuponelani mutufise kuminso yakwe wino apungime pandulu nakukuvitwa kwa Mwana-ng'onzi. 17Amuno uwanda wukulu uwakuwavitilwa wiza, ngaweni angasimpa?
Currently Selected:
Revelation 6: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
