Revelation 5
5
Ekalata muvunge nu Mwana-ng'onzi
1Naweni kalata muvunge mwikasa lyandilo lyakwe wino wisile pandulu; ekalatanye weyo wawalisilwe monsimonsi, wamatilizilwe ninamba mumasyo munenulambali. 2Swinya ndola umungeli wamaka wino wawilanga nizwi lyakupongomoka akuti, Nga weweni wino wazipila ukukambatula inamba ayiyule kalatanye wee? 3Ukuwa kutalolesile wumwi mwiyulu, nanti amunsi, nanti amunsi pansi-pansi, wino wanga ayiyule kalata muvunge weyo alole mukasi. 4Nalizile ichikalazi muno patalolesile wumwi wino wanga ayiyule ekalatanye weyo alole mukasi. 5Ngapano songo wenga pakwe wasongonye wawo anena ati, Utize uwalila. Silola! Ichimbwi chino chafuma mumwiko wakwe Yuda, umwizikulu-chizwi wakwe Davidi, weni wachimvya, weyonye awino angakambatula inamba pamasyo yayo munenulambali pano yasilizilwe avungulule kalata ayiyule.
6Ngapano ndola Umwana-ng'onzi ayimilile pakasi pandulu, yino yaliwilizizwe nivitumbulwa vyawumi vini nawasongo. Umwana-ng'onzi walolesile kuno amukomwe. Walinji nimpembe munenulambali naminso munenulambali, vino amizimu munenulambali iyakwe Leza yino yatumilwe munsi yonsi. 7Umwana-ng'onzi aya asenda kalata muvunge weyo mwikasa lyandilo ilyakwe wino wisile pandulu. 8Walile wachita wowonye, ivitumbulwa vyawumi vini nawasongo amakumi yawili nawani awaya awapona wafukime pankolelo pa Mwana-ng'onzi. Wonsi walinji namapango, nindweso zyakwe golide zino zizwile nuwusule wununchile, zino amapepo yawantu wakwe Leza. 9Awimbila nulwimbo lupya awati,
Wazipila ukusenda kalata muvunge umatulule inamba.
Amuno wakomilwe, nga muno amfwa yako
wakalila leza awantu,
wano wafuma mumyiko yonsi, awandimi zyonsi, awantu wansi zyonsi,
nawamiwili milekane-lekane wonsi.
10Waleka wawa awasimapepo ukuti wapyunjila Leza witu;
nukuwapa uwufumu wakupanzya. munsi
11Inyoka ndola, nga injivwa awangeli imyanda namyanda, ekaya wayile wakwe woliwo! Wimilile waliwilizizye indulunye yoyo, nivitumbulwa vyawumi vyoni, nawasongo, 12awimbila awasantula amazwi awati,
Umwana-ng'onzi wino wakomilwe wazipila
ukupochelela uwufumu, ninsawo, namano, namaka,
ukuchindikwa, uwukankala, nukulumbulwa!
13Ngapano njivwa ivitumbulwa vyamwiyulu vyonsi, nivyamunsi, nivyamunsi pansi-pansi, nivitumbulwa vyamwesumbi vyonsi—ivitumbulwa vyonsi monsi muno vyikala—aviwakwimbila vikuti,
Ukutumvya nukuchindikwa, uwukankala namaka, viwe
kwakwe wino apungime pandulu na ku Mwana-ngo'onzi
umuyayaya-we!
14ivitumbulwa vyawumi vini avitolelela aviti, Amen! Nawasongo awapona pansi awapakata.
Currently Selected:
Revelation 5: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
