Revelation 4
4
1Pansizi ndola ichilolwa chinji, naweni ichisakati chili kwasi mwiyulu. Njivwa nizwi lino lyalizile ngati ankangang'ombe, lino nivwile napakutalika aliti, Zanga koo, nandinjize nkulanjizye vino vyandi vipone pansizi. 2Napaponapapo e Muzimu ambwila. Mwiyulunye momo mwalinji indulu, nawumwi ayisile penepo. 3Impumi yakwe yalangalilanga ngati amawe yawuzi wukulu amawenzuluchile; ponsinye ukuliwilizya indulunye yoyo palinji umulalafute wuno imilolechele walinji ngati aliwe langalile ilyakwe namafwa. 4Ukuliwilila indulunye yoyo, kwalinji indulu zinji amakumi yawili nazini, zino wasongo amakumi yawili nawani wano wazwite ivitiswe nutwamba twakwe golide wisile penepo. 5Pandulunye yoyo pafumile ukumesya kwantalala nukupanta mbali nichiwulumo. Palinji inkozyo munenulambali zino zyakanga pankolelo pandulunye yoyo; zino amizimu yakwe Leza munelambali. 6Pandulunye yoyo palinji chino chalinji ngati wesumbi wigalasi umusengame ngati aliwe lino likalangalila.
Ukuliwilila indulu, mumbali zyonsi kwalinji ivitumbulwa vini vino vyalinji naminso kunkolelo nakunsizi. 7Ichitumbulwa chakutalika chalinji ngati achimbwi; ichachitiwili ngati amwana wang'ombe; ichachititatu chalinji nimpumi ngati ampumi yamuntu; nacho ichachitini chalinji ngati anzwanga yino ikupapuka. 8ivitumbulwanye vyovyo vyonsi chonga-chonga chalinji namapa mutanda, yano yalinji naminso mukasi nakunzi. Yikakwimbila nanti kulechezya uwusiku numusanya: vikuti,
Umutele, umutele, umutele, a Mfumu e Leza wamaka yonsi,
wemuntu walinjipo, uchili ulipo, swinya uliyiza.
9Ponsinye pano ivitumbulwanye vyovyo vyoni vikwimbila indwimbo zyakuchindika nukutumvya nukusalifya wino ayisile pandulu, wino amumi umuyayaya-we, 10wasongonye wawo amakumi yawili nawani awapona pansi pankolelo pakwe wino akwikalanga pandulu, awamupakata wino ali nuwumi wamuyayaya-we. Awasumba utwamba twawo pansi pandulunye yo yo awati,
11We Mfumu Leza witu! Wewenye awemuntu
uwukankala, numuchinzi, namaka avyako.
Amuno awewenye welewula ivintu vyonsi
swinya muno akulonda kwako ivintu vyonsi vilipo swinya vili nuwumi.
Currently Selected:
Revelation 4: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
