Revelation 21
21
Iyulu 'pya ninsi 'mpya
1Ngapano ndola iyulu 'pya ninsi 'mpya. Iyulu lyakutalika ninsi yakutalika avisowa napano vyalyata, nawe sumbi azimanjika. 2Nga ndola akaya kimichile, e Yerusalemu mupya akwika pansi akufuma mwiyulu kwakwe Leza, ayinwe ngati wenawinga wino akazwalila pakuya sunkania umulume. 3Injivwa izwi kalambane likuvwanga likufuma pandulu, likuti, Kanonzi akaya kakwe Leza kawa muwantu mukasi! Wandi awakwikala nawo, nawo wandi wawe awantu wakwe. E Leza-nye nalwakwe wandi awawa nawo, nawe wandi awe we Leza wawo. 4Wandi awapyele aminsozi yonsi muminso yawo. Kutaliwa imfwa swinya, amalanda yataliwapo, nant'akulila, nant'awulumilanye. ivintu vikali vyasowa napano vyaya.
5Ngapano wino wikala pandulu avwanga ati, Kanonzi napilula ivintu vyonsi kuwupya! Anyoka anena ati, Walika chonye-choo, amuno amazwinye yaa ayakusimichila, swinya amasuwilwa. 6Nga ati, Chasila! Nenji ne Alfa swinya ne Omega, entaliko nimpelelechezya. Wino ali nulusala, ndimupa aminzi yakung'wa uwila yize yafume mukantopwezi kaminzi yawumi. 7Wensi wino wiza wachimvya alipochelela vyonye-vyoo kwenene; ndiwa ne Leza wakwe, nawe awe amwanane. 8Ukuwa wachantete, ninkomi zyawantu, nawanyengwa mbipe, nawachikoma, nawazelele, nawano wakakwetetuka awachita amanjelengwe, nawano wakalumbula amakolania, nawachawufi wonsi, amasyo yawo amwesumbi wino aka pya numulilo swinya akwakanga nivintu viwenzuluchile ivinunke, yino ayilimfwa yachitiwili.
E Yerusalemu mupya
9Wenga uwawangeli wawo munenulambali, wano walinji nindweso munenulambali zino zizwile nimpungo munenulambali, ayiza kwenene ati, Ale zanga koo njize nkulanjizye nawinga, emuka Mwana-ng'onzi. 10Emuzimu ambwila, umungelinye weyo ansenda antwala papela pamwamba wutali nkani. Andanjizya Yerusalemu, akaya kimichile, kakwika pansi ukufuma mwiyulu lyakwe Leza. 11Kakuzikimila nuwukankala wakwe Leza. Akayanye kako kazikimilanga ngati aliwe lilangalile ilyawuzi wukulu ngat'achintu chimwi ichiwenzuluchile swinya ngat'aligalasi. 12Akayanye kako kalinji nilinga kulu itali, nimpongolo ikumi naziwili nawangeli ikumi nawawili wano walinji awasongo wazyampongolonye zyozyo. Pazyampongolonye zyozyo pawalisilwe amazina yazyanko ikumi naziwili izya wa Israeli. 13Kwalinji impongolo zitatu mumbali zyonsi, koo nakoo! Zitatu kapela, zitatu kambazwa, zitatu kambazwa kanji, swinya zitatu kasika. 14Ilinga lyakayanye kako lyazenzilwe pamawe ikumi nayawili peyano pawalisilwe amazina yawapositile wa Mwana-ng'onzi ikumi nawawili.
15Umungeli wino wamvwanzizye walinji ninsonzo yakwe golide iyakupimila akaya nimpongolo zyakwe koliko nga nilinga. 16Akayanye kako kalingine monsi-monsi, muwutali na mu wupapatale. Umungeli weyo apima akaya ninsonzo yakwe akafika amayilosi imyanda ikumi nayisano (1,500) muwutali, kalingine muwupapatale na muwutalinye. 17Umungeli anyoka ayelelezya ilinga alifika imikono umwanda wonga namakumi yani nimikono yini (144) uwutali wilinga ndimuno awantu wakapimila. 18Ilinganye lyolyo lyazenzilwe namawe yamwi amawenzuluchile, akaya keni kazenzilwe nu golide mwengulule wino waswefile ngati aligalasi. 19Amawe yalufula lwilinga lyakaya yayemvizwe nimisago yonsi iyamawe malangalile ayawuzi wukulu. Iwe lyamulufula lwakutalika lyalinji aliwenzuluchile, ilyachitiwili lyalinji alifituluchile, ilyachititatu aliwenzu izikimile, ilyachitini alyakwe namafwa ilangalile. 20Ilyachitisano alyamawala, ilyachitimutanda aliwenzu ilangalile, ilyachitimunenulabali aliwenzu ngati alutondwa, ilyachitikananimonsi aliwe zikimile, ilyachitimufundikambali aliwe tiswe ifufutuchile, ilyachitikumi aliwe tiswe ilyamawala, ilyachitikumi nalyonga alitifi ndivino iyulu lyamusanya, ilyachitikumi nayawili alitifi ndivino iyulu lyawusiku. 21Impongolo ikumi naziwili zyalinji azyamawe mawulungane amalangalile; impongolo yonga-yonga yazenzilwe niwe langalile lyonga. Umusolo wakaya watakasilwe nugolide mwengulule wino walangalilanga ndivino igalasi.
22Mukaya mukasi ntaweni ing'anda yakupepela Leza, amuno ing'anda yakupepela yakayanye kako Amfumunye Umulali, e Leza wamaka yonsi nu Mwana-ng'onzi. 23Akayanye kako katanga kawafwa nukulonda ilazi nanti amwezi ukuti viwawala mwenemo, amuno uwukankala wakwe Leza wukawala mwenemo, nu Mwana-ng'onzi aluli lukozyo lwakaya. 24Awantu wamukaya waliwapita mukuswepa kwakaya nimfumu zyamunsi ziliwatwala imboto yawo mukayanye kako. 25Impongolo zyakayanye kako ziliwawa kwasi nanti kwiyala nawanda; zitaliwakwiyalwa amuno mwenemo mutaliwawa uwusiku. 26Uwukulu nimboto zyamyiko yawantu viliwaletwa mukayanye kako. 27Ukuwa ichintu chino chakombela chitaliwakwinjila mukaya kakonye nant'amuntu wumwi wino akachita ivyakusonzya insoni nant'awino akawipa uwufi atanga ayinjile mwenemo. Nkandi wano amazina yawo yawalikwa mwekalata wa Mwana-ng'onzi uwawawumi awano weni wanginjila mukayanye kako.
Currently Selected:
Revelation 21: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
