Revelation 22
22
1Umungeli anyoka andanjizya uluzi lwaminzi yawumi luno lwalangalilanga ngati aligalasi. Lwafumile kundulu yakwe Leza ni ya Mwanang'onzi. 2Lwatantalanga mukasi mumusolo wakayanye kako. Mumbali zyonsi izyaluzinye lolo mwamezile umuti wawumi. Wuno wukakoma ivikomwa impindi ikumi naziwili mumwaka wonga, lyonga wila mwezi; nayo amafwa yamutinye wowo ayakupozezya imyiko yawantu. 3Chino chatipwa nu Leza chitanga chizanwe mukayanye kako.
Indulu yakwe Leza ni ya Mwanang'onzi ayino iliwa mwenemo, nawawomvi wakwe waliwamulumbula. 4Waliwalola impumi yakwe, nizina lyakwe liliwalikwa pampumi zyawo. 5Kutaliwa uwusiku nawanda, achino watanga wawafwa nukulonda ulukozyo nant'amusanya, amuno Imfumu e Leza awino aliwa akuwala kwawo, waliwateka ndivino imfumu zikateka umuyayaya-we.
Ukwiza kwakwe Yesu
6Ngapano umungeli anena ati, Amazwinye yaa ayakusimichila swinya amasuwilwa. Swinya Amfumu e Leza awino akupanga Umuzimu wakwe kuwatumwa, atuma umungeli wakwe ukuti alanjizye awawomvi wakwe chino chandi chifike chipone nanti kuzimba.
7Lolani e Yesu akuti, Nakwiza nanti kuzimba. Awalongo awano wakatontela amazwi yawutumwa ya mwekalatanye wee!
8Nenenye nalwane ne Yohani nivwa swinya nayilolela ivintunye vyoo. Nalile pano naleka ukuvivwa nukuvilola, imfukama pamanama yamungelinye weyo wino wavindanjizizye inti mulumbule. 9Ukuwa anena ati, Utandumbula nemuwomvi muwuyo, swinya nemuwomvi wawanyonko awatumwa, nawonsi wano watontela amazwi yamwekalatanye wee. Lumbulanga Leza! 10Anena ati, Utize ufise amazwi yawutumwa wamwekalatanye wee ukuti yawe an kama, amuno impindi yapalamila yino vyoo vyandi vipone. 11Wino amuwipe, ndale awipange wowonye, nawe wino wakandamilwa, ndakandamilwange wowonye, nawensi wino amuzima ndale awachita ivizima wowonye.
12Yesu akuti, Teyelezyani, nkwiza nanti kuzimba, nandi ndete ivilambu vyakupa wilamuntu, ndetele wilamuntu ndimuno wachitila. 13Nenji ne Alfa swinya ne Omega, newakutalika swinya ne wakupelelechezya, ne ntaliko swinya nensilo.
14Awalongo awano wakapwizya imyendayawo iswepa, achino wazumilizwa ukulya ivikomwa vyamuti wawumi, ngaswinya nukwinjila pampongolo yamukaya kako. 15Lelo kunzi yakaya kakonye kuli awanyengwa mbipe nawano wakakwetetuka ivyamanjelengwe, nawazelele, nawachikoma, nawano wakalumbula amakolania, nawachawufi, mumuvwango namumilimo.
16Anenenye ne Yesu nalwane ntumile umungeli wane ukuti ayize awalandile ivintunye vyoo mu ma Kleziya. Newachifumo chakwe Davidi; nelutanda luwale ulwamutondo-tondo.
17Emuzimu nu Nawinga wakuti, Zanji koo. Nawensi wino akwivwa chonye-choo ndavwange ati, Zanji. Nawensi wino ali nulusala; ayize apochelele aminzi yawumi uwila, ndakulonda.
Ukupelelechezya
18Nenenye ne Yohani nalwane nkusochela wilamuntu nkaninye wino akwivwa amazwi yawutumwa wa mwekalatanye wee! Nkuti, Nd'umuntu wumwi wonjelezya chimwi kweyoliyo, ye Leza nawe aliyonjelezya impungo zyakusundwa kwakwe zino zyatakwa mwakwe kalatanye wee. 19Swinya nd'umuntu wumwi wafumya chimwi kumazwi yawutumwa wamwekalatanye wee, nawe Leza alifumya kwakwe weliwe ivikomwa vyamuti wawumi vino wanga apwe, amufumye namukayanye kaa akimichile, vyonsi vino vyatakwa mwekalatanye wee.
20Wino akupanichisya kuvintunye vyoo akuti, Nachawuzimanye molimo! Nkwiza kanonzinye kaa.
Ndavino chiwe, Zanga, we Mfumu Yesu!
21Sivyo Imfumu e Yesu awawafwila inkumbu wonsi!
Currently Selected:
Revelation 22: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
