Revelation 17
17
Echilende chilalwe-lalwe mukulu
1Ngapano wenga uwawangeli munenulambali wino walinji nindweso munenulambali ayiza kwenene afika ati, Zanga koo, njize nkulanjizye muno chilende mukulunye weyo wandi asundilwe, akaya kakulunye kako kano kazengwa papipi ndinduzi mvule. 2Izyamfumu zyamunsi zyazelelukanga nuchilende mukulunye weyo, nawantu wamunsi awakolwa muno wang'wa ipala lyawuzelele wakwe.
3Emuzimu ambwila, nga umungeli antwala mumavunje. Nga kweneko ndola umwanachi ayisile pachinyamana chiwenzu chino chalinji namazina mawipe yano yawalisilwe pecholicho: ichinyamananye chocho chalinji nimitwe munenulambali nimpembe ikumi. 4Umwanachinye weyo wazwite iviwenzu niviwenzu-che, wavwimbine niviyembo vyakwe golide, namawe malangalile, amazikimile. Mwikasa lyakwe walemile ulupindi lwakwe golide luno lwizwile ivyamuselu nivyawunyali, ivyawuzelele wakwe. 5Pamutwe wakwe pawalisilwe izina lyamunkama ilyakuti, e Babeloni mukulu, enyina wakwe wachilende nawachilalwe-lalwe wamunsi. 6Ngandola umwanachinye weyo akozikwe nuwazi wawantu wakwe Leza, nuwakwe wano wakomilwe muno wasuwilanga Yesu.
Nalile pano nalola umwanachinye weyo inzunguka nkaninye. 7Umungeli ambuzya ati, Nga wazunguchila chani? Nandi nkunene chino inkama yamwanachinye weyo ikusula nga nichinyamananye chocho chino chimusenzile, ichinyamana chino chili nimitwe munenulambali nimpembe ikumi 8Ichinyamana chino uweni chalinji achipuma, lelo chitalandalila: chati chiwafuma mwizyolonjela chize chiye chikakomwe. Awantu wano wikala munsi wano amazina yatawalikwa mwekalata wawapuma pano insi yachilinji itani iyelewulwe, wonsinye walizunguka pano walola ichinyamananye chocho. Amuno chatezile achiwa achipuma, lelo chitalandalila, lelo chililoleka swinya.
9Chino chikulonda ivyamano nukwiluka achoo! Imitwe munenulambali, amyamba munenulambali, imyamba yino umwanachinye weyo ayisile penepo. 10Swinya imyambanye yoyo amfumu munenulambali: zisano izyakwe zyolizyo zyapona, wenga achili wateka, nga nawe umuwuye atani ayize; alila pano wiza-wiza ale ayize ayikale impindi ntichi. 11Nga nacho ichinyamananye chocho chino chatezile achiwa achipuma, lelo nanti kulandalila, chochonye achino amfumu yachitikananimonsi yino yakonka zyozyo munenulambali, waya kukukomwa.
12Impembe ikumi zino uweni amfumu ikumi zino zitani zitalike ukuteka, lelo zilipwa amaka yawufumu ziteke uwufumu akapindi katichi apaliponga nichinyamananye chocho. 13Wonsinye waa wapanga aminso pachintu ichilichonga, wakupanga ichinyamana amaka yawo swinya awaleka achiwa namaka. 14Waliwalwa nu Mwana-ng'onzi; lelo Umwana-ng'onzi nawano wawita, wano wawasola, awasuwilwa wano wakamukonka, waliwachimvya, amuno Amulali wawalali, swinya Amfumu yazyamfumu.
15Umungeli anyoka anena ati, Aminzi yano uweni, pano chilalwe-lalwe ayisile awantu wansi zyonsi, awalekanelekane, awamiwili milekane-lekane, nindimi ndekane-lekane. 16Impembe ikumi zino uweni nga nichinyamanye chocho, vilipata chilalwe-lalwe; vize vimupoke chonsi chino ali nacho asyale tupu; walilya umuwili wakwe, swinya wamoche numulilo. 17Amuno Leza wawisile mwakwe woliwo ukuchita ukulonda kwakwe, alyakuti wachite numwezo wonga pakupa ichinyamana amaka yawo ayakutechela, yasuke amazwi yakwe Leza yasimpe molimo.
18Umwanachinye wino uweni, akaya kakulu kano kanyata kateka izyamfumu zyamunsi.
Currently Selected:
Revelation 17: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
