Revelation 11
11
Wakalola wawili
1Ngapano impwa akamuti kakupimila kano kalinji ngati alitete lyololoke, inenwa ukuti, Katuka upime ing'anda yakwe Leza nakavuwanye, upende nawano wakupakata mung'anda yakwe Leza. 2Ukuwa utize upime amaluwanza yakulonde ayang'anda yakwe Leza. Nimisolo yeni utize upime amuno yapwa kumintamanya Leza, wano walilanga wakalyatanjila mukaya katele kumyezi amakumi yani nimyezi yiwili. 3Ndituma wakalola wane wawili, walange wazwite amasanko; wize wawizya amazwi yakwe Leza kumanda imyanda ikumi nayiwili namanda amakumi mutanda (1,260).
4Wakalolanye wawo wawili amiti yamingungu yiwili nivilemelo vyankozyo viwili vino vili pankolelo pa Mfumu e Leza wamunsi. 5Ndiwumwi wati awachise, umulilo wukafuma mum ilomo yawo awulovya awalwani wawo; achino ndi wamwi wakulonda ukuwachisa ye woliwonye walifwa. 6Wali namaka yakufundichila mupela alyakuti imvula itize iwatonya impindi yino wakuvwanga amazwi yakwe Leza. Swinya wali namaka kutuntopwezi twaminzi, ukutupilula uwazi; swinyanye wali namaka yakupunguluchizya izyampungo monsi ponsinye pano wakulondela.
7Walila ndiwiza wamala ukuwizya amazwi yawo, ichinyamana chino chikafuma mwizyolonjela chize chiwalwisye. Chiwachimvye chiwakome nukuwakoma, 8nivyala vyamiwili yawo vize vilale mumusolo wakaya kakulu, muno Imfumu yawo yapamantizilwe pawuchingane. Akayanye kako kali ngati we Sodomu, pamwi Ijeputi. 9Awantu walifuma munsi zyonsi, awamyiko milekane-lekane, nindimi ndekane, zyawantu nawantu, wize mukulola ivyala vyawo kumanda amakumi yatatu nipinda, ukuwa watalizumila ukuti wize wazikwe. 10Awantu wamunsi walisechela kumfwa yakwe wanye-waa wawili. Wize wazevyanukuzevya, watumilana nivyawila, amuno awantunye wawo wawili waletelezile awantu wamunsi ukuyimba kukulu. 11Yalile pano amanda yatatu nipinda yasila, umupo wawumi awufuma kwakwe Leza awinjila mwakwe woliwo, awakatuka awimilila; nintete nkulu azilema wonsi wano wawaweni. 12Ngapano awantunye wawo wowili, awivwa izwi kulu lino lyafumile mwiyulu, aliti, Aleni zanji koo! Awala pano awalwani wawo wakulola, weni awakwela mwiwingo awaya mwiyulu. 13Pakapindinye kako akupona ichizumanzi chisi chakutaka; ichipya chonga ichikumi ichakaya achononwa, awantu wano wakomilwe nichizumanzi wapenzilwe imyanda ikumi impindimunenulambali (7,000). Awantu wano wasyazile awawa kwitete, awatumvya uwukulu wakwe Leza wamwiyulu.
14Uwulanda wachitiwili wasila; ukuwa silola! Uwulanda wachititatu wandi wize nanti kuzimba.
Inkangang'ombe yachitimunenulambali
15Ngapano umungeli wachitimunenulambali alizya inkangang'ombe yakwe, nga mwiyulu amuwa amazwi makalambane yano yatanji, Kanonzi amaka yakupanzya insi aya Mfumu e Leza witu apaliponga nu Mesaya wakwe, weni aliwapanzya umuyayayawe! 16Ngapano wasongonye wawo amakumi yawili nawani wano wakwikalanga pandulu zyawo pankolelo pakwe Leza awapona wafukime pansi awalumbula Leza, 17awati,
We Mfumu Leza wamaka yonsi, wemuntu ulipo swinya walinjipo!
Tukukusalifya kuno watalika ukupanzya namaka yako amakulu.
18Imintamanya Leza yalakalisile, muno ukuvitwa kwako kwati kuwakwiza,
impindi yakupanzizya awafwe.
Ampindi yakulambula awawomvi wako awatumwa,
nawantu wako wonsi, wasongo nawatichi,
wonsi wano wakakutina.
Ayili mpindi yakulovezya wano wakakonona insi!
19Ing'anda yakupepela Leza mwiyulu iyiyulwa, nga imbokosi yilayano iloleka mung'anda yakwe Leza. Ngapano akuwa ukumesya kwamvula, nukung'anta kwaviwulumo, nichizumanzi, ninkuwa.
Currently Selected:
Revelation 11: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
