Revelation 1
1
1Ekalata wee wawalikwa mwenemo ivintu vino Yesu Klistu wawumbuzile. ivintunye vyoo we Leza wamupile, ukuti alanjizye awawomvi wakwe Leza vino vyandi vilile vipone nanti kuzimba, Klistu walanjizizye Yohani umuwomvi wakwe ivintunye vyoo pano watumile umungeli wakwe kweweliwe. 2Yohani avwanga vyonsi vino waweni, alondolola amazwi yano yafumile kwe Leza nga nukusimichila kuno kwawumbuzilwe nu Klistu. 3Uwalongo awino akawazya ekalatanye wee, swinya awalongo wano wakateyelezya amazwi yawutumwanye woo mbali nukutontela vino vyawalikwa mwekalatanye wee! Amuno impindi yanenenchela pano vyonsinye vyoo vyandi vipone.
Umulamu kumawungwe yi Kleziya munenulambali
4We Yohani awino watumile umulamu wakwe kuma Kleziya munenulambali ayamunsi ya mwe Asia ati.
Ukulotwa numutende viwe avinu vifume kwe Leza, wino ali po, wino walinjipo, wino swinya aliyiza, vifume nakumizimu munenulambali pankolelo pandulu yakwe, 5vifume nakwakwe Yesu Klistu, ekalola wakusimichila, umwanamonsi ekatote wino wazyulupuzilwe kumfwa, wino swinya wateka imfumu zyamunsi.
Watukunda, swinya watukulula kuluwembu nimfwa yakwe 6watuteka muwufumu wakwe waleka twawa swe wasimapepo ukuti tuwapakata e Leza wino amukwasi wakwe. Uwukankala namaka viwawa kwe Yesu Klistu umuyayaya! Amen.
7Silolani, akwiza namawingo! Awantu wonsi walimulola, nawano wamulasilenye. Awantu wamyiko yonsi walimulosya. Molimonye avino chiliwa! Amen.
8Ne Alfa nu Omega (akuli kuti nentaliko swinya nekupelelechezya), avino Imfumu e Leza Wamaka yonsi wino alipo, wino walinjipo, wino swinya aliyiza wataka.
lchilolwa chakwe Klistu
9Ne Yohani, umunyonko, nemuntu nasanzinkana namwe mwakwe Yesu, swinya twasanzinkana swensi mukuyimba, namuwufumu wakwe Yesu namukuzizimichizya. Nasumbizilwe muchilila chino chikakitwa Patimosi muno akuwizya izwi lyakwe Leza nukusimichila kuno Yesu wawumbuzile. 10Pawanda wa Mfumu Umuzimu awumbwila, njivwa izwi kalambane, lino lyalizile ngati ankangang'ombe likuvwanga kunsizi yane likuti, 11Ale walika chino ukulola, nga utume kalata ku ma Kleziya munenulambali: yano yali mwe Efeso, na mwe Semirina, mwe Peregamumi, Tiyatira, Sardise, Filadelifiya, na mwe Laodikiya.
12Impiluluka ukuti ndole wino wamvwanzyanga. Ndola ivilemelo vyankozyo munenulambali izyakwe golide. 13Mukasi muvilemelo vyankozyo mwimilile chimwi chino chalolekanga ngati amulawa, chizwite umwinjilo chitambazizye chifisizye mumatamba, numupango wakwe golide wuliwizizye ichifuwa chakwe. 14Inyele zyakwe zyalinji antiswe ngati ameya matiswe, pamwi ngati wesusuwe, naminso yakwe yamekukanga ngati amulilo; 15amatamba yakwe yazikimilanga ngati amukuwa wuno wengululwa mwilungu uwuchumule, izwi lyakwe lyalilanga ngati achipoma chikalambane ichaminzi. 16Walemile intanda munenulambali mwikasa lyakwe ndilo, nga nulupanga lukole konsikonsi alufuma mumulomo wakwe. Impumi yakwe yawazile ngati apano ilanzi lyawa pamutwe papela. 17Inda namulola impona pamatamba yakwe ngati amuntu wino 'fwile. Alambalika ikasa lyakwe ilyandilo pakwe nene ati, Utize uwatina! Newakutalika swinya ne wakupelelechezya. 18Nemumi! Nafwile, ukuwa lola nemuni wamuyayayawe. Nanyata imfwa ninsi yawafwe. 19Achaleka, ale, walika ivintunye vyoo vino ukulola, navino vilipo kanonzi, navino vilipona pansizi. 20Yoo ayili nkama yino intanda munenulambali zino ukulola mwikasa lyane ilyandilo ikusula, nga nivilemelo vyankozyo munenulambali ivyakwe golide: intanda munenulambali awangeli wamawungwe yi Kleziya munenulambali, ivilemelo vyankozyo munenulambali ama Kleziya munenulambali.
Currently Selected:
Revelation 1: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
