Jude 1
1
1E kalata wee wafumile kwe Yuda, umuwomvi wakwe Yesu Klistu, swinya umunyina wakwe lemusi—
Kwe wano witwa nu Leza, wane wakundwa nu Leza e Tata nukuchinjililwa nu Yesu Klistu.
2Sivyo inkumbu numutende, nulukundo viwavula mwakwe mwemwe.
Awasambilizya wawufi
3Wakundwe wane! Nalondesyanga ukuwawalichila mwemwe ivyikomolwa lino tuli nalyo swensi, ukuwa kanonzi napatichizwa ukuti mbawalichile ivyakuwachinchizya alyakuti muwalwila isuwile lino Leza walala watupa wapa awantu wakwe lyankani. 4Amuno kuli wachinzinkania wamwi wane wakusochelela mwakwe sweswe chimyamya, wane wakanyonganika amazwi mazima aya nkumbu zyakwe Leza witu awawa nutupemezyo twawukwelengusi wawo, mbali nukukana Yesu Klistu, e Tatakulu wenganye-nsu, Imfumu. Kali-kali amazwi matele yawumbuzile ivyakusundwa kwawo.
5Chingatenga mwamanya vyoo vyonsi nkulonda ukuwizusya vino Imfumu yafyusizye awa Israeli iwafumya munsi ya Ijeputi, ukuwa anyoka alovya wane watasuwizile. 6Yizukani kuno nawangelinye wano wakanile ukwikala mumasyo yawo, ukuwa awayasya: wanyepwa niminyololo yape wasumbilwa mumfinzi nkulu pansi, pano Leza wawawika kukulindilila uwanda wukulu uwakusundwa kwawo. 7Yizukani vino chalinji kwe Sodomu nu Gomora, nutwaya tuna twaliwilizizye, tuna awantu wamwenemo wachitanga ndivino awangelinye nawo wachitanga uwuzelele wusi wakutaka swinya nukuzelelulana awonsi watupu: wali mukuyimba kwape ukwamumulilo wuntazima alyakuti wonsi walole ngawachenjele.
8Mumwata ndiwonye-woo, awantunye waa wali namelengania yano yakaleka wakuwembuchila imiwili yawonye; wakakwelengula ipanzyo lyakwe Leza awasalawula uwukankala wawamwi yulu. 9Nanti we Mikaeli-nye umungeli mukulu atetela achite wonye-woo. Pano wapokotanga nu Satana, pano wapanzyanianga wino angasenda ichala chamuwili wakwe Musa, Mikaeli atatela ayelezye ukukwelengula Satana namazwi yantusi, ukuwa watili, Ndi Imfumu ayino ikukalipile! 10Awantu waa weni wakakwelengula imyata yawu Leza yino watayimanya ukuwa awachita imyata yawunyama zyalonde, yino wayimanya, yoyonye ayino ikawalovya. 11Yemwe, akalanda kasikolo! amuno wakonka imyata yakwe Keni. Muno andalama wakawifya ndivino Balamu wachisile. Wasanguka ndivino Kora wasangusile nukulowa walowa ndivino Koranye walowa. 12Awantunye waa wakola inzyoto lyaviko lino lili muchakulya chinu ichawunyina, chino wakulanga wakuzuma nanti nsoni. Awalanga wakuyilela palwawo. Wali ngati amawingo yano yakasendwa numuza nimvula ikana ukutonya. Wali ngati amiti yino isikoma ivikomwa napampindi yaminjililonye, wali ngati amiti yino yanyunkulwa nimisisi yafwa nukufwa. 13Wali ngati amang'wimbi yakwe sumbi, yano yakafuluka pachituntu alisyala itotofulutupu; avino nawonye pano wakasamalila ku milimo yawo imiwipe awasyala awasonzwa insoni. Wali ngati antanda zino zikayelunkana, zino Leza waziyanizya amasyo yakwikala mumfinzi nkulu iyamuyayaya.
14We Enoki-nye, uwankwatwa yachitimutanda kwakwe Adamu wino kali watumilwe ivyakwe woliwo ati, Silolani! Imfumu iliyiza nawangeli watele imyanda namyanda, 15mukwizapanzya wonsi, nukusunda awawembu wane wakana ukulonda kwakwe Leza wakachita imilimo miwipe, nawonsi wane wakavwanjila Leza inkota namazwi yikwelengulo!
16Awantunye waa wakakwinuluka penye mbali nukusumbichila wanji; wakachita ukulonda kwawo ukuwipe; awalanga wakuyiwanzya, mbali nukutumpika wanji namazwi yamuchenjelo kukufisya ukulonda kwawo.
Uwusoche namasambilizyo
17Ukuwa yizukani, viwuza vyane! Muwakwizuka vino awapostile wa Mfumu yitu e Yesu Klistu wawanenile kali. 18Wawanenile awati, Mumanda yakupelelechezya, awantu waliyiza wize wawasoweka, muno wakakonka inzila zyawo imbipe, 19Awantu wamwatanye woo awano wakaleta ukupawunkana, wakwemwa nukulonda kwamiwili yawo, wasi nu Muzimu. 20Ukuwa mwenji, viwuza vyane, landalilanji muwasimpisya mwisuwilo lyamuzilo. Pepelanji namaka ya Muzimu Mwimichile, 21yisunganji muleke Leza awawakunda, pane mukulindilila ukwiza kwa Mfumu yitu e Yesu Klistu ukuti ayize awafwile inkumbu awape uwumi wamuyayaya.
22Muwafwila inkumbu wane wakuvwilika; 23muwawatula, amuwipula mumulilo. Ee welanji nawanji inkumbu, mbali nukutina Leza ukuwa muwapata nivizwalo vyawonye, vino vyakombela nuluwembu lwawo uluwipe.
Ipepo lyakutumvya
24E Leza awino ali namaka yakuwasunga kukupona nukuwaleta much imwemwe chawukankala wakwe nanti nzyoto. 25Achino kwakwe weliwe wenganye-nsu, wino watutula mwakwe Yesu Klistu Imfumu yitu, kuwe ukuchindamikwa nuwukankala nuwufumu namaka, ukufumilila kali nukufika nakanonzi nukuya kunkolelo umuyayaya. Amen.
Currently Selected:
Jude 1: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
