Philippians 4
4
Ivyakukomelezya
1Achaleka, wanawitu—ye vino nawakunda, ye impindi yakula wuli nanti kulolana! Mwewantu mukansansamusya, mwewantu natumbila!—wakundwe wane, wanawitu, mwazipila mwimilile-ndi mu Mfumu.
2Aleni wamayo-mwe, we Yuodia nawe we Sinteki, nazina, nkuwalambilizya ukuti muwe numwezo wonga wawunyina mu Mfumu. 3Nawenye, wemusuwilwa wunji, nkasi ukuti uwakwavwilizya awanachinye waa; amuno wapyunganga nani kutaluvile ukuwizya Ilandwe zima, apaliponga nu Klementi nawawomvi wawuye wanji, wane amazina yawo e Leza wawalika mwekalata wawumi.
4Sivyo amulanga mukazevya mu Mfumu penye. Nkunyochelela nkuti, Zevyanji!
5Muwe numutembo kuwantu wonsi. Imfumu e Leza akwiza nanti kuzinguluka. 6Mutize muwapangamala chimwi, ukuwa mumapepo yinu yonsi muwalambilizya Leza ukuti awape chino mwasowelwa, amulanga mukumulenga nimyezo yakusalifya. 7Ngapano umutende wakwe Leza wuno walusya amelengania yawuntu, wuwachinjilila imyezo yinu namelengania yinu, mwakwe Klistu Yesu.
8Wanawitu, ichakupelelechezya, nkuti lekani imyezo yinu ikunjilile kuvintu vizima vino vyazipila ukuwanzwa: ivintu vyakusimichila, ivyakuchindamikwa, ivilungamane, iviswepe, iviyembe, ivyilumbo zima. 9Chitanji vino mwasambilizile kwenene, vino navwanganga navino nachitanga. Ngapano Leza wino akapa umutende awawa namwe.
Ukusalifya kuvyawila
10Yemwe, vino nkazevya mu Mfumu! Ye impindi yakula wuli pano mwalinji
nulongo lwakunsayila—nsinakuti mwatezile mwaleka ukunsayila—ukuwa mutalinji nulongo. 11Nsinakuvwanjila choo muno nche nkwelengania ukuti mwandechelezya; amuno namanya ukutima navino indi navyo. 12Namanya ukusowelwa, nukutavuzyanye. Namanya inkama yoo, alyakuti konsinye kuno indi, swinya mumpindi zyonsinye, ndatima, nanti ndinjikusi pamwi indi ninzala, pano nkutavuzya napano nasowelwa. 13Ndiwa namaka yakuchitila vyonsi mumaka yakwe Klistu wino akambomya.
14Ukuwa mwachisile ichetenye pano mwanjavwilizizye mukuyimba kwane. 15Namwenye mwe wa Filipi mwamanya ichetenye kuno pano nafumile ku Makedonia, pamanda yakutalichila ayakuwizya Ilandwe zima, ali Klezia linunye lyonga-nsu alino lyanjavwanga; alili lyolyonye lino lyasanzinkine nani kuvyakupochelela nivyakusowezya. 16Nche mwanjavwizye impindi ziwilizyonsi, pano nalinji mu Tesalonika. 17Asi amuno nkulonda ukupochelela ivyawila; ukuwa amuno nkulonda ukuzana ivyakulunduluka. 18Achaleka kakalata kako akakuwamanyisya vyonsi vino mwampa—ye, mwampa vyavula wuli! Nsinakusowelwa ichintu chimwi amuno kanonzi Epafrodito wandetela ivyawila vinu vyonsi. Vili ngati a wusule wununchile uwakufimila Leza, inzuwi yino ikamusechelesya ayipochelela. 19Nga nu Leza wane, wino ali nukutavuzya konsi mwakwe Klistu Yesu, wandi awape vyonsi vino mwasowelwa. 20Kwakwe Leza witu Umukwasi kuwe ukuchindamikwa umuyayaya. Amen.
Umulamu wakupelelechezya
21Mulamuke awantu wakwe Leza wonsi wano awakwe Klistu Yesu, Awanawitu wane tulinawo koo wakuwalamuka. 22Awantu wakwe Leza wonsi wano wali koo wakuwalamuka, nkani-nkani wano wakakwikala mwisano lyamfumu, nawonye wakuwalamuka.
23Sivyo Imfumu e Yesu Klistu awafwila inkumbu mwemwe mwensi.
Currently Selected:
Philippians 4: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
