Colossians 1
1
1E kalata wee wafuma kwe Pauli, muno akulonda kwakwe Leza nasolwa ukuwa nemuwomvi wakwe Klistu e Yesu, swinya wafuma nakwe Timoti umwanawitu—
2Ku wantu wakwe Leza wane wali mu Kolose, awanawitu awasuwilwa mwakwe Klistu:
E Leza e Tata awawafwila inkumbu muwawa umutende.
Ipepo lyakusalifya
3Penye tukasalifya Leza Umukwasi wa Mfumu yitu e Yesu Klistu, ponsi pano tukuwapepela, 4amuno twivwa isuwilo linu mwakwe Klistu Yesu, nulukundo luno muli nalo kuwantu wakwe Leza wonsi. 5Pakutalichila pano Ilandwe lyakusimichila, Ilandwe Zima lizile kwemwemwe, mwivwile vino mungalolela mwenemo. Achaleka isuwilo linu nulukundo vyasimpa kwakwe chino mukalolela chino mwasengulilwa ichete mwiyulu. 6Ilandwe Zima likaleta ivizima vyakwe Leza nukusatila munsi yonsi, ndivino lili mwakwe mwemwe ukufumilila pawanda wuno mwatalisile ukwivwa ivyankumbu-nkumbu zyakwe Leza amusuka amumanyichisya muno zyawela. 7Mwasambilizile chonye choo ukufuma kwe Epafurasi, umukundwe witu swinya umuwomvi apaliponga naswe, wino amuwomvi musuwilwa wakwe Klistu muno asweswe. 8Watunenile ulukundo luno Muzimu wawapa.
9Muno achonye-choo naswenye tukawapepala penye, ukufumilila pane twivwile vino muli. Tukawalenjela kwakwe Leza ukuti awizuzye namano yakulonda kwakwe, apaliponga ninjelu nukwiluka kuno Umuzimu wakwe wukapa. 10Apano mungakwikala ndimuno Imfumu ikalondela, muwachita penye ukulonda kwakwe. Mwize muwakoma ivikomwa mumulimo wonsi uwuzima, swinya muwakula mumano yakumanya Leza. 11Muwawomeswa namaka yonsi yano yakafuma muwukankala wakuchindamikwa kwakwe, alyakuti muwazizimichizya kwakwe vyonsi nuwuchimyamya. 12Muwasalifya umukwasi, nichimwemwe, wino waleka mwazipila ukupochelela vino Leza wawichila awantu wakwe muwufumu wuwale. 13Watutula mumaka yamfinzi watwinjizya ulumi muwufumu wa Mwanakwe umukundwe, 14mwakwe wino twakululwa, kuno akuli kuti, uluwembu lwitu lwatetelwa.
Imiwele yakwe Klistu nimilimo yakwe
15Klistu welikolano lyakwe Leza muntalolwa. Wekatote umwanamonsi, wino wakula walusya ivyelewulwa vyonsi. 16Amuno mwakwe weliwenye amuno Leza welewulila ivintu vyonsi mwiyulu namunsi, vino vikalolwa nivintalolwa, apaliponga namaka yamizimu, wakapanzya, nizyandulu, nga namawufumu. Mwakwe weliwe amuno Leza welewulizile ivintu vyonsi pyu swinya weliwenye awili mwenecho wakwe vyonsi. 17Weni walinji-po pano ivintu vyonsi vyachilinji, nga muno vyonsi vyalemenkana kwakwe weliwe vyasimpa mumasyo yawo. 18Awili katwe wamuwili wakwe, lino ali Klezia; awili nsulo yawumi wamuwili wakwe; wekatote umwanamonsi wino wazyulupuzilwe kumfwa, alyakuti weliwenye alange wenankolelo pavintu vyonsi. 19Amuno kwalinji akulonda kwakwe Leza umwenecho ukuti mu Mwanakwe amuno muwe imiwele iyenecho iyakwe Leza. 20Mu Mwananye, amuno Leza wapanzizizye ukuwunganika ponga ivintu vyonsi kwakwe weliwe. Leza waleta umutende mumfwa ya Mwanakwe pawuchingane, wapetulila ivintu vyonsi kwakwe weliwe, ivyamunsi moo nivyamwiyulunye.
21Kali-kali mwalinji ukutali nu Leza swinya mwalinji mwewalwani wakwe amuno mwachitanga ivintu viwipe namelangania mawipe. 22Ukuwa kanonzi, muno amfwa ya Mwanakwe iyakumuwili, Leza waleka mwana mweviwuza vyakwe, alyakuti muwe mwewalungamane, awatele, nanti kasinza, pankolelo pakwe weliwe. 23Achino mwazipila ukulandalila mwisuwilo nukusimpisya mulufula 100, nanti kuti muwatelentenga muvulunganie ukulolela kuno mwalinji nako pano mwivwila Ilandwe Zima. Alilandwe zimanye lyoo alino nenenye ne Pauli nawa nemuwomvi wakwe lyolilyo—ilandwe zimanye lyoo lino lyawililwa awantu wonsi munsi.
Imilimo yakwe Pauli mwi Klezia
24Kanonzi nkuzevya mukuyimba kwane muno amwemwe. Amuno mukuyimba kwamuwili wane amuli muno nkumalilichizya ukuyimba kuno kwasyazile kwe Klistu kuno wayimbilanga umuwili wakwe, lino ali Klezia. 25Nani nasolwa nu Leza ukuwa nemuwomvi wi Klezia lyakwe wino wampa umulimonye woo uwakuwachitila ivizima. Umulimo wenechoamulimo wakuwizya Ilandwe zima, 26lino lyalinji ankama kunkulo nkali iyawalawa wonsi, ukuwa kanonzi e Leza walisokolola kuwantu wakwe. 27Ilango lyakwe Leza lili awonye-woo: ukuwumbulila awantu wakwe inkama, inkamanya yoo ayawuzi wukulu kuwantu wamyiko yonsi. Inkama yakuti: Klistu ali mwakwe mwemwe, kuno akulikuti, muliyankana ukuchindamikwa kwakwe Leza. 28Achaleka tukawizya Klistu kuwantu wonsi. Tukawasochela nukuwasambilizya, namano yonsi, alyakuti tukwemele umuntu wensi kwakwe Leza akulile mwakwe Klistu afike pakafiko. 29Ukuti avino chiwe, nkazunkuntika mbali nukulwisya namaka yonsi yano Klistu akapa, ayano nkuwombela.
Currently Selected:
Colossians 1: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
