Marko 7

Imisambilizizye yakwe watatakulu

(Mateyu 15:1-9)

1Awa Falisi nawasambilizya wamasundo wamwi wano wafumile kwe Yerusalemu wayile kwe Yesu awamuliwilizya. 2Awalola kuno awasambilizi wakwe wamwi walyanga ichakulya niviko—kuno akuli kuti, walyanga nanti kusamba kumakasa ndimuno awa Falisi walondelalanga avino awantu awachita.

3Amuno awa Falisi na wa Yuda wakonkanga imisambilizizye yakwe wayisikulu: watanga walye nkandi ndiwatela wasamba kumakasa yawo mumwata wuno wayana, 4swinya watalyanga ichakulya chimwi chino chafuma kuno wakakazizya nkandi ndi watela wachipwizya pakutalika. Swinya wakakonka

amasundo yanji amavule yano wasambilizwa, ndivino ukupwizya impindi, inyungu, nimbale zyamukuwa, nivitalanye mumwata wuzima.

5Achaleka awa Falisi nawasambilizya wamasundo awawuzya Yesu awati, Ngamuno chani chino awasambilizi wako wasinakupechela ukukonka imisambilizizye yino watatakulu wachisile, ukuwa weni wakulya niviko?

6Yesu awatolelela ati, Ye, vino Ayizeya watumilwe kwemwemwe ichete! Mwe wakachenjezya-mwe, ndimuno wawalichizilenye ati,

Leza akuti, A wantunye waa wakanchindika namazwi yawo,

ukuwa imyezo yawo ili ukutali nani.

7Chisi numulimo wumwi ukuti wamfukamila,

amuno wakasambilizya amasundo yano awantu wachita ayawa ngati amasundo yakwe Leza!

8Mukasya amasundo yakwe Leza amuwatontela imisambilizizye yawuntu.

9Yesu alandalila avwanga ati, Muli ninzila yamuchenjelo wakukankamulila isundo lyakwe Leza alyakuti mukonke imisambilizizye yinu. 10Amuno Musa wasunzile ukuti, Uwachindika eso nunyoko, nawensi wino wiza wakwelengula yisi nanti wenyina wazipila imfwa. 11Ukuwa mukusambilizyanga ukuti ndi umuntu ali nachimwi chino angavwa yisi nanti wenyina, ukuwa amuti, We Korbani (kuno akuli kuti, achakwe Leza), 12weni atela walufuma ukwavwa yisi nanti wenyina. 13Mumwatanye woo mwakwelengula izwi lyakwe Leza nimisambilizizye yinu yino mukasambilizyania. Kuli navinji ivivule ndivino vyoo vino mukachita.

ivintu vino vikakombezya umuntu

(Mateyu 15:10-20)

14Yesu ayita iwumba swinyanye awanena ati, Njivwani, mwensi, mumanyichisye. 15Kusi nachimwi chino chikakwinjila mumutu chino chingamukombezya. Ukuwa vino vikafuma, avino vikakombezya. [ 16Achaleka fwandi, yivwani ndimuli namakutwi!]

17Ala wasya iwumba winjila mung'anda, awasambilizi wakwe awamuwuzichisya ivyamulumbenye wowo. 18Yesu awanena ati, Mutachenjela ukulusye wanji. Wuzye musinakwiluka?

Kusi chimwi chino chikakwinjila mumuntu chino chingamukombezya, 19amuno chisikwinjila mumwezo wakwe ukuwa chikwinjilanga munda yakwe achinyoka achifuma kulonde. (Pakuvwanga wonye-woo, Yesu wawumbuzile kuno ivyakulya vyonsi vyayana ukulya.)

20Alandalila avwanga ati, Chino chikafuma mumuntu achino chikamukombezya. 21Amuno chino chikafuma mukasi, chikafuma mumwezo wamuntu, kukakwiza amelengania mawipe ayamukolelela kukuzenkenta, uwukapoka, uwuchikoma, 22uwuzelele, ukufunuka, nukuchita iviwipe ivyamisangomisango; ukuchenjezya, ikwelengulo, uwuzuwa, ichinenia, ichilumba, nuwuwelewele— 23iviwipe vyonsinye vyoo vikafuma mumuntu avimukombezya.

Isuwilo lyamwanachi

(Mateyu 15:21-28)

24Yesu akatuka aya munsi yino yapalamine nakaya kakwe Ture. Aya ayinjila mung'anda, nanti kulonda wumwi amanye ndi walinji kokonye; ukuwa naponye atavwamile. 25Umwanachi wino umwanakwe uwachanachi walwile umuzimu wuwipe, ayivwa ivyakwe Yesu aya kweneko nanti kuzinguluka afika apona pamanama yakwe. 26Umwanachinye weyo walinji alikandi, wakwatizilwe mu Foinisia munsi ya Siria. Alambilizya Yesu ukuti afumye umuzimu wuwipe mumwanakwe. 27Ukuwa Yesu atolelela ati, Tutele tupe awana ichakulya pakutalika; chisi achizima ukusenda ichakulya chawana ukusumbila imbwa.

28Umwanachi atolelela ati, Mulali, nimbwanye zikulyanga imvongonyo zino awana wakaponia pano wakulya!

29Ngapano Yesu amunena ati, Muno alitolelelonye lyoo pitanga kumwinu; umuzimu wuwipe wufumile mumwanako!

30Aya kumwawo aya azana umwanakwe alazile pachitala; molimonye umuzimu wuwipe wufumile ndimuno wanenezilwe.

Yesu apozya ekutwi mbali wiwi

31Yesu afuma munsi zino zyapalamine nu Ture aya apitingana mwe Sidoni aya kwesumbi wakwe Galileya, apita inzila yansi yatwaya ikumi. 32Wamwi awamutwalila umuntu wino walinji wepuli swinya wewiwi, awalambilizya Yesu akuti awike ikasa lyakwe pamulwalenye weyo. 33Achino Yesu amusenda wenga palwakwe, amufumya piwumba, aya asomfya iminwe yakwe mumakutwi yamuntunye weyo, aswila mati, akumvya ululimi lwakwe wino walinji wewiwi. 34Ngapano Yesu apunamila mwiyulu, afutayika ayisya umwezo, anena umuntu ati, Efafata, kuno akuli kuti, Yiyuka!

35Napaponapapo amakutwi yamuntu ayafunduka, nululimi lwakwe alusapuka, atalika ukuvwanga nanti ntazi. 36Ngapano Yesu awakomelezya wonsi ukuti watize wavwanga chochonye kumuntu wumwi, ukuwa ukuwakomelezya kuno wawalesyanga ukuti watize wanena wumwi, apano awantu weni awalusya ukusasya amazwi. 37Nawonsi wano wivwile awazunguka kutaluvile. Awati, Ye, akuchita ivintu vyazipa wuli! awasukumila wakuti, Akuleka nawakutwi wakwivwa, nawawiwi wakuvwanga!

Currently Selected:

Marko 7: WWN82

Highlight

Copy

Compare