Marko 6

Awakana Yesu pa Nazareti

(Mateyu 13:53-58; Luka 4:16-30)

1Yesu afuma mumasyonye yayo aya kukaya kakumwawo, nawasambilizi wakwe awamukonka. 2Pawanda wakusolezya atalika ukusambilizya mung'anda yakupepela. Awantu wano walinji mung'anda yakupepela wavuzile, awala wamwivwa awazunguka. Wakuti, Nga wafumya vyoo vyonsi kwi? Ngamano-chi yano wapwa? Nga ivyakuzungusyanye vyoo akuchita wuli? 3Wuzye asi wekawaza wamiti, umwanakwe Mariya, umunyina Jemusi, Josesi, Yuda, nu Simoni? Wuzye inkazi zyakwe zisikwikala monye-moo? Achaleka awamukana.

4Yesu awanena ati, Umutumwa as isowelwa umuchinzi suka ndi amukaya kawo, namunko zyakwe nichiwanza chakwe,

5Kokonye kweni atatela achite ivizungusyo vimwi, suka vino wawisile amakasa yakwe pawalwale watichi wano wapozizye. 6Yesu azunguka nkaninye muno waweni kuno awantu watalinji nisuwilo.

Yesu atuma awasambilizi ikumi nawawili

Yesu awapitapita mutwaya, alanga akusambilizya awantu. 7Ayita awasambilizi ikumi nawawili awaya kweweliwe. Awatuma wawili-wawili. Awapa maka yakuchimvizya imizimu miwipe 8awakomelezya ati, Mutize muwasenda akantu kamwi mumusinzo winu suka ndansonzo yakusintilila; mutize muwasenda nanti akakulya, nanti achakupempela, nanti alundalama lumwi mumyuwa yinu. 9Muwazwala indyatu ukuwa nanti kusenda amalaya yawiliyawili. 10Anyoka awanena ati, Konsinye kuno wawapochelela, amwikalanga mung'andanye yoyo amusuka amwiza amufuma mwenemo pano mukufuma mukayanye kako, 11Ukuwa ndimwaya mukaya wakana ukuwapochelela pamwi wakana ukuwivwa chino mukutaka, amupitanga amusya mwakunta itukumbu lino lili kumatamba yinu. Chochonye chiwe achimanyilo kwewoliwo!

12Achaleka awaya mukuwizizya awantu ukuti watontolokwe kuluwembu lwawo. 13Awawinga imizimu miwipe mivule, swinya awapaka awantu wavule amafuta awawapozya.

Imfwa yakwe Yohani Kabatizya

(Mateyu 14:1-12; Luka 9:7-9)

14Paponye imfumu Herodi ayivwa vyovyonye vyonsi, amuno ukulumbililwa kwakwe Yesu kwivwisilwe insi yonsi. Awantu wamwi watanji, Yohani Kabatizya wazyulupuka! Achaleka amakanye yaa yali mweweliwe.

15Nawo wanji watanji, We Eliya. Wanji watanji, Amutumwa, ali ngati amutumwa mukali.

16Walile pano Herodi wivwa ati, We Yohani Kabatizya! wino namuputuzile umutwe, awino azyulupusile! 17E Herodi-nye nalwakwe awino wakomelezizye ukuti Yohani alemwe, alemwa ayiyalilwa muvingololo. Herodi wachisile chonye-choo muno we Herodiya, wino watwazile, chingatenga walinji wemuka Filipu umunyina. 18E Yohani Kabatizya wanenanga Herodi penye akuti, Chisi achizima ukuti ungatwala muka munyonko!

19Achaleka Herodiya amuvililichila awalonda ukumukoma, ukuwa apotwa muno we Herodi. 20Herodi watinanga Yohani amuno wamanyile kuno Yohani walinji amuntu muzima umutele, achaleka awamuchinjilila. Walondanga ukumwivwa, chingatenga wachintuchilanga ndiwamwivwa.

21Pakupelelechezya Herodiya azana ulongo. Chalinji apawanda wankwatwa yakwe Herodi, pano wisile inkombe zyonsi inkulu, nawamusika wavita, nawenitwaya twamunsi ya mu Galileya, kuchakulya. 22Umwanachkazyana wakwe Herodiya aya kweneko awachina, asechelesya Herodi naweni wano walinji kweneko. Achaleka imfumu yawuzizye umukazyana iti, Wuzye ungalonda chani? Nandi nkupe chonsinye chino ukulonda. 23Imfumu ilapa ivilapo vivulenye iti, Nkulayilizya ukukupa chonsinye chino walonda, nanti akukwankania ichipya chansi yanenye pakasi ngakupanga.

24Achaleka umukazyana afuma aya awuzya nyina ati, Wuzye nkalonde chani?

Nyina amutolelela ati, Ichimutwe chakwe Yohani Kabatizya.

25Umukazyana asamalila kumfumu nanti kuzimba afika ati, Nkulonda umpe ichimutwe chakwe Yohani Kabatizya mulweso kanonzinye kaa!

26Imfumu iwa namalanda nkaninye; ukuwa muno avilapo vino walafile pankolelo pawantu wonsi, achimupota ukukana. 27Napaponapapo atuma ichita ukuya leta umutwe wakwe Yohani. Ichita achipita, achiya kung'anda yavingololo, achiputula umutwe wakwe Yohani; 28achisendela palweso achipa umukazyana, nawe apa nyina. 29Awasambilizi wakwe Yohani awala wivwa wowonye, awaya awasenda ichala chamuwili wakwe Yohani awaya awazika munkungwe.

Yesu alela awantu imyanda ikumi impindi zisano (5,000)

(Mateyu 14:13-21; Luka 9:10-17; Yohani 6:1-14)

30Awasambilizi awanyoka awaya kwe Yesu, awaya awamunena vyonsi vino wasambilizizye. 31Kwalinji awantu-na-wantu wano wayanga kwe Yesu achipota nu Yesu-nye nawasambilizi wakwe ukuti wawe nimpindi yakulya. Achaleka awanena ati, tuyani tufuntuke tufume paa, tuye ku masyo yanji

swenga kuno mungaya mukapuze katichi. 32Achaleka awapita muwato palwawo awaya kuno kutalinji awantu.

33Awantu wavule awawalola kuno wakupita, awawamanya nukuwamanya; achaleka awafuma mutwaya tons inye awakolela awapita pansi awatanjilila Yesu nawasambilizi wakwe ukufika. 34Ala vino Yesu wafuma muwato, alola iwumbanye lyolyo ikulu, ichilanda achimulema pano wawalola, amuno walinji ngati ang'ozi nsowe umuchemi. Atalika awawasambilizya ivintu vivule. 35Alila lyatemba, awasambilizi wakwe awaya kwe Yesu awamunena awati, Lyatemba, namoo amumavunje. 36Leka awantu wapite, waye mumpunda namutwaya twamupipi wakayikalile ivyakulya.

37Yesu awatolelela ati, Mwemwenye wapani ichakulya.

Awawuzichisya awati, Wuzye ukasi sweswenye tukakale ichakulya chandalama imyanda yiwili (200). 38Achaleka nawe Yesu awawuzichisya ati, Ngamuli nimbulungwa zyachakulya zinga? Yanji kalolani.

Awala waya walola awamunena awati, Imbulungwa zisano ninswi ziwili.

39Yesu anena awasambilizi wakwe ukuti wapawunkanie awantu wonsi mumpuka mumpuka wikale pansi pisoteo 40Achaleka awantu awikala pansi mumikololo, mumpuka zyawantu umwanda nizyawantu amakumi yasano. 41Ala Yesu watola imbulungwa zyozyo zisano ninswi ziwili, apunamila mwiyulu, asalifya kwe Leza. Aputulania imisumba apa awasambilizi wakwe ukuti wape awantu. Anyoka ayankania inswi ziwili ayankania awantu. 42Awantu wonsi awalya awikuta. 43Awasambilizi wakwe awizuzya ivitundu vyachakulya chino chasyazile ikumi naviwili. 44Awantu wano walile ichakulya walinji imyanda ikumi impindi zisano (5,000).

Yesu apita paminzi

(Mateyu 14:22-33; Yohani 6:15-21)

45Napaponapapo Yesu aleka awasambilizi wakwe awinjila muwato awakolela ukuya ku Betisaida, kumbalama zinji izyakwe sumbi, pano weni wasyazile akunena iwumba ukuti lipite. 46Ala walayana nawasambilizi wakwe, akwela umwamba aya mukupepa. 47Amanguzi uwato walinji pesumbi pakasi, nawe Yesu walinji wenga kuchituntu. 48Yesu alola kuno awasambilizi wakwe watamikanga pakusika uwato, amuno umuza wawalungime; achaleka kumachacha mwepwi aya kuwasambilizi wakwe, alanga akupita paminzi papela. Awa ngati akasi awapitilile. 49Ukuwa awamulola akupita paminzi. Awelengania awati, Ichitumbu! awapunda. 50Amuno walile wamulola awatina wonsi.

Napaponapapo Yesu awavwanzya ati, Simpani! Anene, mutize muwatina! 51Aya ayinjila muwato wuno walinji mwenemo, numuza awutekana. Awazambilizi wakwe awazunguka kutaluvile, 52amuno watilusile chino imisumba yoyo yasuzile; waposilwe ukumanya.

Yesu apozya umulwale mu Genesareti

(Mateyu 14:34-36)

53Awalamba sumbi awaya munsi ya Genesareti, awanyepelela uwato, 54Awala vino wafuma muwato, awantu awamanya Yesu nanti kuzimba, 55Achaleka awasamalila munsi yonsi awamutwalila wano walwile awawanyamula pavitala vyawo, wamutwalilanga konsinye kuno wamwivwile. 56Konsinye kuno Yesu walinji, mutwaya tutichi, nutukulu, namuzyampundanye, a awantu watwalanga awalwale pamasyo yakukazizyanye awalambilizya Yesu ukuti awazumilizye ukuti ivyo awalwale wangakumvya nanti amuko wamwinjilo wakwe; nawonsi wano wakumvizye kumwinjilo wapozile kundwala zyawo.

Currently Selected:

Marko 6: WWN82

Highlight

Copy

Compare