Marko 8

Yesu alela awantu ikumi impindi zini (4,000)

(Mateyu 15:32-39)

1Apala patani pazimbe, iwumba linji ikulu aliwungana. Awala wasowa ichakulya, Yesu ayita awasambilizi wakwe awanena ati, 2Ichilanda chandema nkaninye kuwantu waa, amuno wikala nani amanda yawa yatatukanonzi wasi nichakulya chimwi. 3Ndinawataya ukuti wapite kuzyamwawo wangafwa ulupwe pano wakupita, amuno wamwi wafuma ukutali.

4Awasambilizi wakwe awamuwuzya awati, Nga akwinye mulumpalang'ang'anye moo kuno awantu wangafumya ichakulya chakulela awantu waa wonsi?

5Yesu awawuzya ati, Ngamuli nimisumba yinga iyachakulya?

Awamutolelela awati, Tuli nimisumba munenulambali.

6Anena iwumba ukuti lyikale pansi. Ngapano atola imisumba yoyo munenulambali, asalifya kwe Leza, amenyania, apa awasambilizi wakwe ukuti walele iwumba; awasambilizi awachita wowonye. 7Swinya walinji ninswi ntichi. Yesu asalifya anena awasambilizi wakwe ukuti wape awantu. 8Wonsi awalya awikuta—nche walinji imyanda ikumi impindi zini (4,000). 9Nga awasambilizi wakwe awizuzya imvongonyo zino zyasyazile ivitunda munenulambali. Yesu aleka awantu awapita, 10napaponapapo ayinjila muwato nawasambilizi wakwe awaya muvipya vyakwe Dalamanuta.

Awa Falisi awalonda ukulola ichizungusyo chimwi

11Awa Falisi wamwi awaya kwe Yesu awapanzyania nawe. Walondanga ukumuteya, achaleka awamuwuzya ukuti achite ichizungusyo chimwi ichakulanjizya ndi Leza ali nawe. 12Yesu afutayika anyosya umwezo ati, Ngamuno chani chino inkulonye yon ikulonda ichizungusyo? Awanena ati, Awe, nakana! Ntandi ndanjizye inkulonye yon ichimanyilo ndi choo.

13Awasya, ayinjila muwato, alyakuti aye kumbalama zinji izyakwe sumbi.

Umutawa wawa Falisi nuwakwe Herodi

(Mateyu 16:5-12)

14Awasambilizi wiwilizile ukusenda ichakulya chivule, walinji numusumba wonganye-nsu muwato. 15Yesu awasochela ati, Muwachenjela, nkaninye numutawa wawa Falisi numutawa wakwe Herodi.

16Awatalika awapanzyania wonganye wakuti, Yesu wavwanjila choo muno tusi nichakulya chimwi.

17Yesu amanya chino wavwanganga, achaleka awawuzya ati, Ngamuno chani chino mukupanzyania muno musi nichakulya chimwi. Wuzye mutani mumanye nanti akwiluka mutani mwiluke? Wuzye muchili mutani muwe namano? 18Ngavino muli naminso—ngachani mutanga muwalola? Muli namakutwi—ngachani chino mutanga mwivwe? Wuzye musinakwizuka 19pano namontozile imisumba yisano kuwantu imyanda ikumi impindi zisano (5,000). Nga ivitundu vyamvongonyo vino vyasyazile vyizwile vinga?

Awatolelela awati, ivitundu ikumi naviwili.

20Napano namontozile imisumba munenulambali kuwantu imyanda ikumi impindi zini (4,000) wuzye peni ivitundu vyamvongonyo vino vyasyazile vyalinji vinga?

Awatolelela awati, ivitundu munenulambali.

21Awawuzya ati, Wuzye muchili mutani mwiluke?

Yesu apozya intonko mwe Betisaida

22Awaya kwe Betisaida, kuno wamwi watwazile intonko kwe Yesu awamulambilizya ukuti ayikumvye. 23Yesu alema intonko ayikolelela awafuma mukaya. Ala Yesu waswilila amati muminso yantonko, awika amakasa yakwe peweliwe amuwuzya ati, Wuzye ukulola chimwi?

24Umuntu apunama ati, Eta, nalola awantu, ukuwa wakuloleka ngati amiti yino ikuzyelenguka.

25Yesu anyoka awika amakasa yakwe paminso yantonko. Paponye peni umuntu alolechesya nkaninye, aminso yakwe ayapola, alola ivintu vyonsi ichete. 26Yesu aleka apita kumwawo mbali nukumukomelezya ukuti, Atize anyochele mukaya.

Peter awumbula ivyakwe Yesu

(Mateyu 16:13-20; Luka 9:18-21)

27E Yesu nawasambilizi wakwe awaya mutwaya twamwe Kesariya Filipi. Awala pano wali pamusinzo awuzya awasambilizi wakwe ati, Nenani wuzye awantu wakutanji neweni?

28Awamutolelela awati, wamwi wakutanji we Yohani Kabatizya, nawo wanji wakutanji we Eliya, pano wanji wakutanji wewumwi uwawatumwa.

29Awawuzya swinya ati, Ngamwenji mukutanji neweni?

Peter atolelela ati, We Mesaya. 30Ngapano Yesu awakomelezya ati, Mutize muwanena wumwi ivyane.

Yesu avwanga nivyakuyimba kwakwe nimfwa yakwe

(Mateyu 16:21-28; Luka 9:22-27)

31Ngapano Yesu atalika ukusambilizya awasambilizi wakwe ati, umwanamuntu wandi alele ayimbe kutaluvile, wasongo, nawasimapepo wakulu, nawakasambilizya wamasundo wamukane. Akomwe, ndamanda yasila yatatu azyulupuke. 32Awanena ichetenye. Achaleka Peter asenda Yesu kumbali atalika awamukalipila. 33Yesu apiluluchila kuwasambilizi wakwe, akalipila Peter. Ati, Tina pano, we Satana. Ati, Amelengania yako amelengania yawuntu, yasi aya wu-Leza!

34Ngapano Yesu ayita iwumba nawasambilizi wakwe. Ati, Ndi wumwi akasi ayize kwenene, wazipila ayiwilila umwenecho, asende uwuchingane wakwe ankonke. 35Amuno wensi wino akulonda akutula uwumi wakwe aliwulovya; ukuwa wensi wino akulovya uwumi wakwe muno anene swinya muno alilandwe zima aliwuzana. 36Wuzye umuntu angawotoka chimwi ndiwawa ninsi yonsi ukuwa walovya uwumi wakwe? Ng'o, nanti katichitichi! 37Pasi chimwi chino umuntu angakawunkania nuwumi wakwe. 38Amuno wensi wino wafwila nene insoni, namazwi yane, mumpindinye yoo imbipe iyawuntamanya Leza, nawenye Umwanamuntu alimufwila insoni pano wiza-wiza mukuchindamikwa kwa Monsi wakwe nawangeli wakwe awatele.

Currently Selected:

Marko 8: WWN82

Highlight

Copy

Compare