Marko 13
13
Yesu avwanga ivyakumongolwa kwang'anda yakwe Leza
(Mateyu 24:1-2; Luka 21:5-6)
1Ala pano Yesu akufuma mung'anda, umusambilizi wakwe ati, Silola, Musambilizya! Ye, amawe yaa nimizenjele yakwe vyolivyo vyazipa wuli!
2Yesu amutolelela ati, Mukulola ivizengwanye vyoo ivikulu! Kutalisyala iwe nanti lyonga-lyonga; yonsinye-pyu yalisumbwa pansi.
Ukuyimba namatamyo
(Mateyu 24:3-14; Luka 21:7-19)
3Yesu wisile pamwamba wamingungu, wulunga ning'anda yakwe Leza, kokonye akuno Peter nu Jemusi, nu Yohani, nga nu Andreya wayile kweweliwe kumbali. 4Awati tunene pano ivintunye vyoo vilipona, swinya utunene chino chilipona kukulanjizya kwampindi yino ivintunye vyonsi vilipona.
5Yesu ati, Chenjelani, atize wumwi ayize awachenjezye. 6Awavule waliwakwizila mwizina lyane, awati, Neweliwe! wachenjezya awavule. 7Mutize mwize muwatamika ndimwiza mwivwa imbilikiti yisumo yapalamila mwivwa namazwi yisumo ukutali. ivintunye vyonyevyoo vilila vile vipone, lelo visinakusula kuno insilo yapalamila. 8Insi zilisambuchilana ziwalwa, namawufumu yaliwachichizana. Kuliwa ivizumanzi konsinye, nivipowe. ivintunye vyoo viliwa ngati awulumila wampapo yakutalika.
9Namwenye chenjelani. Mulilemwa wawatwale kwipembo lyamilandu. Muliyumwa mung'anda zyakupepela, muliyimilila pankolelo pakwe wakapanzya napazyamfumu muno anene, pakuwalandila Ilandwe zima. 10Pakutalika Ilandwe zima lile lize lilandwe kumyiko yonsi. 11Nga ndiwiza wawalema wawatwala kwipembo, mutize mwize musakamale lyankani muti ngatwayavwanga chani; ndimpindi yafika, mwize muvwange chonsinye chino mulipwa. Amuno amazwi yano muliwavwanga yataliwa amazwi yinu; yalifuma ku Muzimu Wutele. 12Awantu waliwalemeka awanyina kumfwa, nawayisi wawantu waliwachita wowonye kuwana wawo; awana walipiluchila awakwasi wawo wawakoma. 13Muliwavitilwa nawantu wonsi muno anene. Ukuwa wino wiza wachimba wafika nakunsilo alitulwa.
Ukutinia kuwipe
(Mateyu 24:15-28; Luka 21:20-24)
14Mulilola ichakutinia chikulu chimilile pano chitazipila ukwimilila. (Wino akawazya: ndayiluke chino choo chikusula!) Ngapano wano wikala mwe Yudeya wize wasamalile kumyamba. 15Wino ali pamusonje wang'anda yakwe atize ayize awazinguluka pakwika ukuti akasende iviya vyakwe mung'anda. 16Umuntu wino ali kuvyalo atize ayize awele akasende umwinjilo wakwe. 17Yemwe, chililumila awanachi wano wali napanji wuli, nawano wakonsya utucheche! 18Pepanji kwe Leza ukuti ivintunye vyoo vitize vize vipone ichisiku! 19Amuno ukuyimba kwampindinye yo yo kuliwipa kulusye ndimuno insi yamanyila, ukufumilila kuluwandi pano Leza welewuzi, e insi ukufika nirelo, Swinya ukuyimba kwamwatanye ndiwowo kutalitela kuchitwe. 20Ukuwa Leza wachefya amanda; chino ndi atele atachita wowonye, wumwi atanga ayize apusuke. Ukuwa muno awasolwa wakwe, achaleka Leza wachefezya amandanye yayo.
21Achaleka ndiwumwi wiza wawanena wati Lolani, Mesaya wee koo! pamwi ndiwati, Lolani, weyo koko!—mutize mwize mumusuwile. 22Amuno kulikatuka wa Mesaya nawatumwa wawufi, Waliwachita ivimanyilo nivizungusyo alyakuti wangachenjezya nukusovya awasolwa wakwe Leza, ndichingachitwa. 23Chenjelani! nawanena vyonsi lyankani.
Ukwiza kwa Mwanamuntu
(Mateyu 24:29-31; Luka 21:25-28)
24Ukuwa nditamyo lyamandanye yayo liza lyasila ilanzi lilifita, numwezi wutaliwala, 25nintanda zililakata zifume mwiyulu, namaka yamwiyulu yaliyinganwa muno yikala. 26Ngapano Umwanamuntu aliloleka, ayize mumawingo namaka makulu nuwukankala. 27Ayize atume awangeli wakwe muvikonchi vini ivyansi ngayize awunganike awasolwa wakwe Leza ukutalichila kuno insi yafumilila ukufika nakuno yapakula.
lsambilizyo lyamukunyu
(Mateyu 24:32-35; Luka 21:29-33)
28Lekani umukunyu wuwasambilizye isambililo. Ziwala ndi insamba zyawa antontentonte namafwa yalemba, amumanyanganye amuti aminjililo yapalamila. 29Awowonye, muwala ndi mwalola ivintunye vyonsi, amumanyanganye amuti impindi yanenenchela ukwiza. 30Yizukanji choo! ivintunye vyoo vyonsi vilipona pano awantu wankulonye yoo watani wafwe wonsi. 31Iyulu ninsi vilizimanjika; ukuwa amazwi yane yatalizimanjika.
Pasi wino wamanya uwanda nanti ampindi
(Mateyu 24:36-44)
32Ukuwa kweni, pasi nanti wenga wino wamanya ukwiza kwawanda wowonye nanti ampindinye—nanti awangelinye awamwiyulu, nanti a Mwananye; nkandi Umukwasi wenganye-nsu awino wamanya. 33Lolelanji, muchenjele, amuno mutamanyile ukwiza kwampindi. 34Chiliwa ngati amuntu wino wafuma pakaya kakwe walema umusinzo wasya walasika awawomvi wakwe, wawapa wenga-wenga umulimo wakuchita; anene nukasunga wampongolo ukuti awalolela. 35Achaleka fwandi lolelanji, amuno mutamanyile pano umwening'anda angizila—nche amanguzi, pamwi uwusiku pakasi, pamwi pakwe mukolwe, pamwi umutondotondo. 36Alyakuti ndi angiza pano mutamanyile, atize azane muponechile. 37Chino nkuwanena kanonzi, nkuwanena mwensinye: nkuti, Lolelanji!
Currently Selected:
Marko 13: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
