Marko 14

Ukusopelela Yesu

(Mateyu 26:1-5; Luka 22:1-2; Yohani 11:45-53)

1Kwatezile kwasyala amanda yawili ukuti kuwe ichakulya chakupitililwa chakwe buledi wino asi numutawa. Wasimapepo wakulu nawasambilizya wamasundo wavwambanga nikama yakulemela Yesu mumuchenjelo ukuti wamukome. 2Awati, Tutize tuchite choo pampindi yachakulya, amuno pamwi nche awantu wangachita imponzela.

Yesu apakwa amafuta pa Betane

(Mateyu 26:6-13; Yohani 12:1-8)

3Walile pano Yesu ali mu Betane mung'anda yakwe Simoni weyo uwamambombo; ala pano akulya, akuya umwanachi wino walinji numusazi wamafuta yifungo nunchile ayawuzi wukulu, amazima kutaluvile. Afika akoma umusazi, ayitila amafuta pamutwe wakwe Yesu. 4Awantu wamwi wano walinji paponye awavitwa, awanenana wakuti, Ngamuno chani chino amafutanye yaa ayifungo zima yononelwa? 5Yanga yakazwe indalama ukulusye imyanda yitatu (300) indalama zipwe kuwasaluke! Awakwinuluka umwanachi ichiwipewipe.

6Ukuwa Yesu ati, Mulekani! Ngamuno chani chino mukutamizya umwanachi weyo? Achizima nkaninye chino wanchitila. 7Mulilanga muli nawasaluke penye, ponsinye pano mukulonda ukuwachitila chimwi mungawachitila. Ukuwa nenji ntalilanga indi namwe pe. 8Wachita ichete; witizile ifungo nunchile kumuwili wane ukuyania lyankani kukuzikwa. 9Achaleka kanonzi, yizukani choo! Konsinye kuno Ilandwe zima lyandi liwatandwa, munsi yonsi, chonyechoo chino umwanachi wachita chiliwalandwa chiwe achakumwizuchila.

Yuda azumila ukukutilila Yesu

(Mateyu 26:14-16; Luka 22:3-6)

10Ngapano e Yuda Iskarioti, wenga uwawasambilizi ikumi nawawili, aya kwewasimapepo wakulu ukuti akawalemeke Yesu. 11Wasimapepo wasechezile nkaninye pakwivwa chino Iskarioti wavwanzile, awamulayilizya ukumupa indalama. Achaleka Yuda awavwamba impindi nzima iyakukutilila Yesu.

Yesu alya ichakulya chakupitililwa nawasambilizi wakwe

(Mateyu 26:17-25; Luka 22:7-14, 21-23; Yohani 13:21-30)

12Pawanda wakutalika wachakulya chino chisi numutawa, pawanda wuno awanang'onzi wachakulya chakupitililwa wakomilwe, Awasambilizi wakwe awamuwuzya awati, Wuzye akwinye kuno ukasi tukakusenganizizye ichakulya chakupitililwa?

13Yesu atuma awasambilizi wakwe wawili awalayilila ati, Yanji mukaya, mwandi mukasunkane numuntu wino asenzile aminzi munsembo. 14Mumukonke mpaka kung'anda yino wandi akinjile, nga munene umwening'anda muti, Umusambilizya akuti, Nga ing'anda yane ilikwi muno nandi ndile ichakulya chakupitililwa nawasambilizi wane? 15Weliwenye nalwakwe wandi akawalanjizye ing'anda nkulu iyapapela, injemvye insenganie momonye amuno mukatusenganizizye.

16Awasambilizi awafuma, awaya awinjila mukaya, awaya awazana ivintu vyonsi ndimuno wanenezilwe; awayania ichakulya chakupitililwa.

17Akula kwila e Yesu aya nawasambilizi wakwe ikumi nawawili. 18Awala vino wakulya, Yesu ati, Nkuwanena choo nkuti: wumwi uwakwe mwemwe wandi ankutilile—wumwi wino akulya apaliponga nani.

19Awasambilizi awaluwaluwa awatalika ukumuwuzya wenga-wenga wakuti, Wuzye molimonye ukutaka nene?

20Yesu atolelela ati, Awumwi uwakwe mwemwe uwikumi nawawili, wino akusomfya nani itozi mulweso. 21Umwanamuntu wandi afwe ndimuno amawaliko mate le yatachila; ukuwa akalanda kasikolo kumuntunye weyo wino wandi akutilile Umwanamuntu! Changa chizipe ndi umuntunye weyo atanga akwatwe!

Ichakulya cha Mfumu

(Mateyu 26:26-30; Luka 22:15-20; 1 Wakorinte 11:23-25)

22Awala vino wakulya, Yesu atola ichakulya, apepa asalifya, amontola, apa awasambilizi wakwe, Ati, Tolani mulye, woo amuwili wane.

23Anyoka atola ulupindi, asalifya kwe Leza, awapa; wonsi awang'wela mwakwe lolilo. 24Yesu ati, Woo awazi wane wuno wazwila awavule, uwazi wane uwilayano lyakwe Leza. 25Ntalitela ing'we vyoo swinya ukwizafika pawanda wuno nding'wa ivipya mu Wufumu wakwe Leza.

26Ngapano awimbila ulwimbo awaya kumwamba wamingungu.

Yesu awumbula kuno Peter wandi amukane

(Mateyu 26:31-35; Luka 22:31-34; Yohani 13:36-38)

27Yesu ati, Mwensinye-pyu mwandi musamale munsye, amuno amawaliko matele yavwanga yati, Leza alikoma umuchemi nga uwufyo wang'onzi wusalangane. 28Ukuwa pano nazyulupulwa ndiwatanjilila ukuya ku Galileya.

29Peter atolelela ati, Nenji pole ntalitela nkusye chingatenga wonsi wangasamala!

30Yesu anena Peter ati, Yizuka choo!

Wala pano mukolwe atani alamule impindi ziwili uwusikunye woo, watela wankana katatu wati utamanyile.

31Peter atolelela namaka yonsinye ati, Ntalitela mvwange inti ntakumanyile, nanti ndi nkufwanye apaliponga nawe!

Awasambilizi wonsi awavwanjila ndimuno Peter-nye wavwanjizile.

Yesu awapepa mu Getisemani

(Mateyu 26:36-46; Luka 22:39-46)

32Yesu aya nawasambilizi wakwe ku Getisemani, ngapano Yesu anena awasambilizi wakwe ati, Mwenji yikalani panye-paa pano naya mukupepa.

33Ngapano asenda Peter, nu Jemusi, nga nu Yohani apita nawo. Amalanda nuwulumila avimuponela, 34awanena ati, Navunkuntuka mumwezo namalanda kutaluvile; nsi namaka. Yikalani panye-paa muwalolela.

35Apitilila katichi, apona afukime, apepa ati, Ndachino chingachitwa, impindinye yoyo impitile ukutali. 36Apepa ati, Oko we Tata! Tata! Wenji ivintu vyonsi vingachitwa. Funtusya ulupindinye 100 kwenene. Ukuwa ukulonda kwane pole, nkandi ukulonda kwako.

37Ngapano anyochela kuwasambilizi wawo watatu, azana waponechile, anena Peter, ati, Simoni su'ponechile? Ngamuno chani chino utanga ulange ukulola nanti akampindi katichi? 38Awanena wonsi wotatu ati, Lolelanji, swinya muwapepa alyakuti mutize muponele mukwelezwa. Umuzimu weni wukulonda, ukuwa umuwili weni watonta.

39Swinyanye Yesu aya mukupepa, alanga akutaka amazwi yaliyonganye. 40Anyochela kuwasambilizi wakwe swinya azana waponechile; waposilwe ukulola. Awasowa nichakutolelela.

41Anyoka aya impindi yachititatu, awanena ati, Wuzye muchili muponechile mukupuza? Ampela! Impindi yafichila! Silolani, kanonzi Umwanamuntu walemekwa mumakasa yawawembu. 42Katukani, tuyani. Umuntu wino wiza mukunkutilila weyo!

Ukulemwa kwakwe Yesu

(Mateyu 26:47-56; Luka 22:47-53; Yohani 18:3-12)

43Walile pano Yesu achili akuvwanga, e Yuda umusambilizi wawachitikumi nawawili, afika. Walinji niwumba lyawantu wano wasenzile izyampanga nizyanduku, watumilwe nawasimapepo wakulu, nawasambilizya wamasundo, nawasongo. 44Kakutilila wapi le iwumba ichimanyilo ati, Umuntu wino naya namukukula ye awili weyonye wino mukulonda. Mumuleme mumusende atafyondomoka.

45Ala Yuda wafika, napaponapaponye aya kwe Yesu afika ati, Musambilizya! Amukukula. 46Achaleka awalema Yesu awamunyepa achikala achiri-ndi. 47Ukuwa wumwi wino wimilile asomola ulupanga akoma umuzya wakwe simapepo mukulu, amusenga ikutwi. 48Ngapano Yesu anena wano wayile mukumulema ati, Wuzye mwizile nizyampanga nizyanduku mukundema, ngati nesimilandu? 49Ngavino nikalanga mung'anda yakwe Leza penye muno nasambilizyanga, ukuwa nanti kuti mundeme. Ukuwa amawaliko matele yeni yalile yafiswe.

50Ngapano awasambilizi wonsi awamusya awasamala.

51Umulumendo wumwi, wino wazwite ichizwalo chitelepe, wakonsile Yesu. Awalonda ukuti wamuleme, 52ukuwa asamala tupu, asya wakankamula ichizwalo.

Yesu ayimilila pipanzyo

(Mateyu 26:57-68; Luka 22:54-55, 63-71; Yohani 18:13-14, 19-24)

53Ngapano awasenda Yesu awamutwala kung'anda yakwe simapepo mukulu, kuno wasimapepo wakulu, nawasongo, nga nawasambilizya wamasundo wawungine. 54Peter wakonsile lwapatali aya ayinjila mumusolo wang'anda yakwe simapepo mukulu. Ayikala nawasikalili, alanga akota umulilo. 55Wasimapepo wakulu niwumba lyonsi awavwamba uwukalola wakusinila Yesu, alyakuti wamukome; ukuwa nanti apakutiwawuzane. 56Wakalola wavule awawipizya Yesu, ukuwa uwukalola wawo nanti kukolana.

57Wamwi awimilila awawipizya Yesu wakuti, 58Twamwivwile akuti, Namongola ing'andanye yoo iyakwe Leza yino awantu wazenga, mumanda yatatu nzenge yinji yino itazengwa nawantu. 59Naponye uwukalola wawantunye wawo, wutakoline.

60E simapepo mukulu ayimilila pankolelo pakwe wonsi awuzya Yesu ati,

Wuzye usinakutolelela chimwi kwevino wakukulongola?

61Ukuwa Yesu alanga amyalile nanti kutolelela chimwi. Swinyanye simapepo mukulu anyoka amuwuzya ati, Wuzye we Mesaya, Umwanakwe Leza mupepwe?

62Yesu atolelela ati, Neweliwenye, swinya mwensinye mulilola Umwanamuntu ayisile kwikasa lyandilo lya wa Maka Yonsi, akwiza namawingo yamwiyulu!

63Simapepo mukulu weyo alepulania ivizwalo vyakwe ati, Tutanga tuwafwa nukulonda uwukalola wunji! 64Mwayivwila imisiku yamazwi yakwe. Ngamukuti wuli?

Wonsinye awumila umulimonga awati, Chimusinizile kali, ndalele akomwe.

65Wamwi awatalika nukumuswilila amati, awamuvwimba paminso awamuma; awamunena wakuti, Zimbula wino wakuma! Nawasilikali awamusenda awamupama.

Peter akana Yesu

(Mateyu 26:69-75; Luka 22:56-62; Yohani 18:15-18, 25-27)

66Peter wachilinji ali mumusolo pano umuwomvi wakwe simapepo mukulu umukazyana wayile apalamila. 67Walile walola Peter akota umulilo, amulolechesya nkaninye ati, Nawewenye, walinji nu Yesu waku Nazareti.

68Ukuwa akana ati, Ntamanyile... nanti akwiluka ntilusile chino ukutaka, afumila kumulyango; napaponapapo mukolwe ati nukulamula.

69U mukazyananye weyo amulola swinya atalika ukunena wano wimilile ati, Wee awumwi wakwe woliwo! 70Swinyanye Peter akana.

Apala pazimba katichinye wano wimilile awasinila Peter awati, Utanga uwafwa nukukana uwati usi wewakwe woliwo, amuno nawewenye wafuma ku Galileya.

71Apano Peter atalika ukulapa akuti, Fwandi ndinkuwipa uwufi ndi. Leza ansunde! Umuntunye wee wino mukutaka ntamumanyile nanti katichi!

72Napaponapapo mukolwe ati nukulamula impindi yachitiwili, ngapano Peter ayizuka vino Yesu wamunenile ati, Apakuti mukolwe alamule kawili watela wankana katatu wati utamanya. Atuluka awalila.

Currently Selected:

Marko 14: WWN82

Highlight

Copy

Compare