Marko 12

Umulumbe wamwenichalo chamiti yavikomwa

(Mateyu 21:33-46; Luka 20:9-19)

1Yesu atalika awawanenela mumilumbe akuti, Kwalinji e sichilima wino walembesile imiti yavikomwa, apinda ulwamba aliwilizya, ayimba ichizinji chakufinila ivikomwa, azenga nuwulunga. Azumilizyania nawanji ukuti wi kale muchalo wawalya ivyamwenemo, wamulipa, weni alema umusinzo apita. 2Pampindi yavikomwa atuma umuzya wakwe kuwantunye wawo ukuti wakamupe ivisezwa vimwi. 3Awaliminye wawo awalema umuzya, awamuma awamunyosya nanti kumupa ivikomwa vimwi. 4Umwenichalo anyoka atuma umuzya winji; nawenye awaya awamuponkola pamutwe awamuchita uwuwinye. 5Umwenichalo atuma umuzya winji, awaya awamukoma; swinya awachita nawanji awavule uwuwi, awawuma nukukoma wamwi. 6Wino wasyazile ukuti umwenichalo amutume, amwanakwenye umukundwe. Pakupelelechezya, atuma umwanakwe kwewano wasunganga ichalo. Ati, Wandi wakachindike umwanane. 7Ukuwa awantunye wawo awanenana awati, Wee amwana wamwenichalo. Zanji, tumukome, nuwupyani wakwe wuwe awitu! 8Awalema umwana wamwenichalo awamukoma, awasumba ichala chamuwili wakwe kunzi yachalo.

9Nga Yesu awuzya ati, Ngafwandi umwenichalo chavikomwa alichita wuli? Aliyiza akome awantunye wawo ape awantu wanji ichalo. 10Wuzye nachawuzimanye mutawazya amawaliko matele yaa? ayakuti,

Iwe lino wakazenga walikana wati alyavye

lyolyonye alino lyanyosile aliwa aliwe lyenecho.

11Choo chafuma ku Mfumu e Leza;

ye, achakuzungusya wuli!

12Wanankolelo wawa Yuda awalonda ukulema Yesu, amuno wamanyile kuno wawumizile woliwonye umulumbe. Ukuwa muno watinanga iwumba, awamusya awapita.

Iwuzyo kuvyamisonko

(Mateyu 22:15-22; Luka 20:20-26)

13Awa Falisi wamwi nawantu wakwe Herodi awatumwa kwe Yesu ukuti wakamuteye namawuzyo. 14Awaya kweneko awati, Musambilizya, twamanya kuno ukasimichila, nanti kupechela chino awantu wakwelengania. Usitina umuntu nanti ndi awamwata-chi, ukuwa ukasambilizya awantu ukulonda kwakwe Leza mukusimichila. Ale tunene, Wuzye chawipa mwisundo litu ukusonka imisonko kumfumu yawa Roma? Wuzye tuwasonka pamwi pole?

15Ukuwa Yesu alola umuchenjelo wawo awatolelela ati, Ngamuno chani chino mukunteyela? Letani ulundalama, ndulole.

16Awamutwalila ulundalama longa nga awawuzya ati, Nga yoo ampumi yakwe weni, nizina lyakweni?

Awatolelela awati, Ampumi yamfumu nizina lyakwe.

17Achaleka Yesu ati, Fwandi panji imfumu vino avyakwe, navyo ivyakwe Leza panji Leza.

Awantu awamuzunguka nkaninye.

Iwuzyo kuvyakuzyulupuka

(Mateyu 22:23-33; Luka 20:27-40)

18Awa Saduki wamwi awaya kwe Yesu. (Wawonye awano watanji awantu watanga wazyulupuke.) 19Awati, Musambilizya, Musa watuwalichizile isundo lyoo ati, Nd'umuntu wafwa wasya umuchi, nanti kwata, umunyina as yale atwale umuchi alyakuti wangakwatila wino wafwa ikwata. 20Kwalinji awang'anda yonga munenulambali; uwakutalika atwala, afwa nanti kusya ikwata. 21Uwachitiwili asyala atwala umuchi nawenye afwa nanti kusya ikwata. 22Nuwachititatu awowonye, nawano wasyalanye: wonsinye munenulambali awang'anda yonga watwazile umwanachinye weyo awafwa nanti kwata. Pakupelelechezya, umwanachi afwa. 23Ale, ngafwandi ndi awafwe wonsi wiza wazyulupuka pawanda wakuzyulupuka kwawo, nga umwanachinye weyo aliwa wemuka weni? Vino walinji wemuka wonsinye wawo munenulambali.

24Yesu awatolelela ati, Ye, mwasowa wuli! Wuzye mwamanya chino mwasowela? Amuno mutamanya amawaliko matele nant'akumanya amaka yakwe Leza. 25Amuno pano awafwe wiza wazyulupuka waliwa ngati awangeli wamwiyulu, awonsi nawanachi wataliwatwalana. 26Ukuwa kuvyakuzyulupulwa kwawafwe: wuzye mutawazya amazwi mwekalata wakwe Musa ivyachimpuza chamulilo? Yawalikwa mwenemo ukuti Leza wanenile Musa ati, Ne Leza wakwe Abrahamu, e Leza wakwe Ayizeki, swinya ne Leza wakwe Jekapu. 27Choo chikusula kuno we Leza wawawumi, asi we Leza wawafwe. Mwaluvya nkaninye!

Isundo kulu

(Mateyu 22:34-40; Luka 10:25-28)

28Umusambilizya wamasundo wino wivwile kuno wakupanzyania walinji paponye. Alola kuno watolelela awa Saduki ichetenye, achaleka aya kwe Yesu amuwuzya ati, Nga alisundo-chi lino lyakula lyalusya yonsi?

29Yesu ati, Lyoo alino lyakula lyalusya yonsi. Aleni yivwani, mwe wa Israeli-mwe! Imfumu e Leza witu awili Mfumu wenganye-nsu. 30Uwakunda Imfumu e Leza wako numwezo wako wonsi, numuzimu wako wonsi, namano yako yonsi, namaka yako yonsi. 31Nilyachitiwili alyakuti, Uwakunda umuwuyo ndivino wayikunda. Pasi isundo linji ilusye yaa yawili.

32Umusambilizya wamasundo anena Yesu ati, Wasimichila, Musambilizya! Wavwanga molimonye, e Leza awili Mfumu wenganye-nsu. pasi winji nkandi weliwe-nsu. 33Umuntu wazipila ukukunda Leza numwezo wakwe wonsi, namano yakwe yonsi namaka yakwe yonsi; mbali nukukunda awawuye ndivino wayikunda. Ukutontela amasundonye yaa yawili kwakula kwalusya ukufima inzuwi zyanyama nukochela Leza inzuwi pileza.

34Yesu alola kuno umusambilizya wamasundonye weyo watolelezile namano, achaleka amunena ati, Usi ukutali nu Wufumu wakwe Leza.

Pansizi pakwe chonye-choo wonsinye awapenyezya ukuwuzya Yesu amawuzyo.

Iwuzyo kuvyakwe Mesaya

(Mateyu 22:41-46; Luka 20:41-44)

35Walile Yesu akusambilizya mung'anda yakwe Leza awuzya iwuzyo ati, Ngamuno chani chino awasambilizya wamasundo wakutanji Mesaya aliwa amwanakwe Davidi? 36Davidi winjilizilwe nu Muzimu Wutele ati,

Imfumu e Leza wanenile imfumu yane ati,

Yikala paa kwisaka lyane ilyandilo,

nsuke mbike awalwani wako pansi pamatamba yako.

37E Davidi-nye nalwakwe wamwitanga akuti Mfumu; ngafwandi swinya Mesaya angawa alikwata lyakwe Davidi wuli?

Lewukanji awasambilizya wamasundo!

(Mateyu 23:1-36; Luka 20:45-47)

Iwumba kulu lyateyelezizye kwe Yesu nichimwemwe. 38Walile pano akuwasambilizya ati, Chenjelanji nawasambilizya wamasundo, wano wakalonda ukupita mumyinjilo mitali ukuti walamukwa numuchinzi mumasyo yakukazizya; 39swinya wakalonda ivilimba vizima mung'anda zyakupepela namasyo mazima pavyakulya vyakuyitopwa. 40Wakatondowezya awanachi wafwilwe awalume awapoka ing'anda zyawo, nga awayilanjizya namapepo yawo amatali. Ukusundwa kwawo kuliwa akwakalanda owe!

Ukufima kwamwanachi mufwilwe umulume

(Luka 21:1-4)

41Walile pano Yesu ayisile mupipi nichisengulilo chang'anda yakwe Leza alolechesya vino awantu wasumbilanga indalama mwenemo. Awachindame awavulenye wasumbizile indalama mvule; 42ukuwa umwanachi mufwilwe umulume aya asumbila utukopala tutichi tuwili, tuna nche twalinji wengwee wenga. 43Ayita awasambilizi wakwe apaliponga awanena ati, Nkuwanena nkuti umwanachi mufwilwe umulumenye wee wasumbila mumbokosi walusya wonsi. 44Amuno wonsi wasumbizile mwenemo kukutavuzya kwawo; ukuwa weni kukusowelwa kwakwe, wasumbila mwenemo vyonsinye vino walinji navyo —vyonsinye-pyu vino angawombela.

Currently Selected:

Marko 12: WWN82

Highlight

Copy

Compare