Mateyu 28
28
Ukuzyulupuka kwakwe Yesu
(Marko 16:1-10; Luka 24:1-12; Yohani 20:1-10)
1Awula uwanda wakusolezya kwa wa Yuda wasila, vino kwati akuwacha uwanda wamulungu, e Mariya wa ku Magadala nu Mariya winji awaya kukulola inkungwe. 2Napaponapa po kwalinji ichizumanzi chikulu; umungeli wa Mfumu e Leza wisile afuma mwiyulu, aya atantazya iwe, ayikala penepo. 3Imilolechele yakwe walinji ngati wesusuwe. 4Wakalindilila walinji nintete nkaninye awawa ngati wafwile.
5Umungeli anena awanachi ati, Mutize muwatina. Manyile kuno mukuvwamba Yesu, wino wapamantizilwe pawuchingane. 6Asi paa; azyulupusile, ndimuno wavwanjizilenye. Zanji koo mulole pano walazile. 7Yangufyani kanonzinye, muye mukanene awasambilizi wakwe muti, Azyulupuzilwe kuwafwe, kanonzi wandi awatanjilile ukuya ku Galileya; akuno mwandi mukamulole! Yizukanji chino nawanena.
8Achaleka awasamala awafuma pankungwe, nintete mbali nichimwemwe chikulu, awasamala awaya awanena awasambilizi wakwe.
9Napaponapano Yesu awasunkania awanena ati, Umutende wuwe namwe. Awapalamila kwe Yesu, awalema amatamba yakwe, awamufukamila. 10Yesu awanena ati mutatina. Yanji kanenani awanji waye ku Galileya, akuno wize wandole.
Vino wakalindilila walongozile
11Awala pano awanachi wali pamusinzo, wakalindilila wamwi wano walindililanga inkungwe awanyochela kukaya awanena wasimapepo wakulu vyonsi vino vyaponile. 12Wasimapepo wakulunye wawo awawungana apaliponga nawasongo awachita inkama; awapa ivita indalama mvule, 13awati, Muwati awasambilizi wakwe wizile uwusiku wiwa ichala chamuwili wakwe pano muponechile. 14Ndi umulasi wivwa wonye-woo, twandi tumusechelesye asule.
15Wakalindilila awapochelela indalama awachitila ndimuno wawasambilizizye, Ukufika nilelonye-lyoo ayali mazwi yano awa Yuda wasasya.
Yesu aloleka kuwasambilizi wakwe
(Marko 16:14-18; Luka 24:36-49; Yohani 20:19-23; Imilimo 1:6-8)
16Awasambilizi ikumi nawenga awaya ku Galileya kumwamba kuno Yesu wawasontezile. 17Awala wamulola awamufukamila, chingatenga wamwi wavwilikanga. 18Yesu awapalamila awanena ati, Nawapa amaka yonsi mwiyulu namunsi. 19Achaleka yanji mukasambilizye imyiko yonsi muleke wawe awasambilizi wane: muwawabatizya mwizina lyakwe Tata, ni lya Mwana, ni lya Muzimu Mwimichile, 20muwawasambilizya wasunga vyonsi vino nawasunda mwemwe. Yizukanji! Nandi ndawa namwe-pe, ukufika nakunsilo yansi.
Currently Selected:
Mateyu 28: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
