Marko 1

Ukuwizya kwilandwe zima ukwakwe Yohani Kabatizya

(Mateyu 3:1-12; Luka 3:1-18; Yohani 1:19-28)

1Lyoo alilandwe zima ilyakwe Yesu Klistu, uMwanakwe Leza. 2Lyatalichizile ndimuno lyawalichilwa numutumwa Ayizeya:

Leza akuti, Lolani intumi yane;

yino nandi ntume pankolelo pakwe mwemwe kukuyania inzila yako.

3Izwi lyakwe wumwi likupunda mulumpalang'ang'a, likuti,

Yaniani ekumba wa Mfumu e Leza;

molole ninzila yakwe iyakupita mwenemo!

4Achaleka Yohani walolesile mulumpalang'ang'a, awabatizya awantu swinya nukuwawilila Ilandwe zima, ilyakuti, Tontolokwani kuluwembu lwinu mubatizwe nukubatizwa, mwewantumwe, apano Leza awatetele kuluwembu lwinu. 5Wonsi wano wafumile mwe Yudeya nawano wafumile mukaya kamwe Yerusalemu wayile mukwivwa Yohani. Awazumila amawembuko yawo awabatizya nukuwabatizya muluzi mwe Yordani.

6Yohani wazwalanga ivizwalo vyameya yangamila, numupango wamukwela mumutembeleko wakwe; walya. nga makanta nuwuchi wamulonde. 7Wawumbulilanga awantu akuti, Umuntu wino asyalichile penene wakula wandusya; wino ntazipila nanti akwinama ukusapula indyatu zyakwe. 8Nkuwabatizya naminzi, ukuwa weni aliwawabatizya nu Muzimu Mwimichile.

Ukubatizwa kwakwe Yesu nukwelezwa kwakwe

(Mateyu 3:13—4:11; Luka 3:21-22; 4:1-13)

9Apala pazimba katichi Yesu afuma mwe Nazareti, wamwe Galileya, aya abatizwa nu Yohani mwe Yordani. 10Napaponapapo ala vino wazuwuka muminzi alola iyulu likwiyuka nu Muzimu wukwika pakwe weliwe ngati ankunda. 11Nizwi alifuma mwiyulu aliti, Wemwanane ekankundwa wane. Nkusechela nawe nkaninye.

12Napaponapapo Umuzimu awuleka aya mulumpalang'ang'a. 13Aya ayikala kokonye amanda amakumi yani, alanga akwelezwa nu Satana. Ninyama zyalondenye zyalinji kokonye, ukuwa awangeli awaya kweneko awamupyunjila.

Yesu ayita awalondo wani

(Mateyu 4:12-22; Luka 4:14-15; 5:1-11)

14Walile pano Yohani wiyalilwa muvingololo, Yesu aya ku Galileya mukuwizya Ilandwe zima ilyakwe Leza. Ati, 15Impindi yafichila, nu Wufumu wakwe Leza wapalamila! Tontolokwani kuluwembu lwinu musuwile Ilandwe zima!

16Ala pano Yesu akupita mumbali yakwe sumbi wakwe Galileya, alola awalondo wawili, e Simoni numunyina e Andreya, wakulema inswi nikonde mwesumbi. 17Yesu awanena ati, Nkonkani, nandi njize mbasambilizye uwulondo wakulema awantu. 18Nanti kuzinguluka awasya amakonde yawo awamukonka.

19Ala vino wapita katichi alola swinya awang'anda yonga wawili, e Jemusi nu Yohani, awanakwe Zebediya. Walinji muwato wawo wakuyania amakonde. 20Ala Yesu wawalola awita; awasya yisi e Zebediya muwato apaliponga nawantu wano walalisilwe, weni awakonka Yesu.

Umuntu wino walinji numuzimu wuwipe

(Luka 4:31-37)

21Awaya kukaya kakwe Kapemahumi, nga pawanda wasabata Yesu aya mung'anda yakupepela atalika ukusambilizya. 22Awantu wano walinji mwenemo awazunguka kumisambilizizye yakwe. Weni atalinji ndivino awasambilizya wamasundo; ukuwa weni wasambilizyanga namaka.

23Mung'andanye yoyo iyakupepela akwiza umuntu wino walinji numuzimu wuwipe apunda nkaninye ati, 24Nga ukasi utuchite chani, we Yesu wamwe Nazareti? Siwiza tonona? Nkumanyile: wentumi ntele iyakwe Leza!

25Yesu akalipila umuzimu ati, Myalala, ufume mumuntu!

26Umuzimu wuwipe awuyingania umuntu ichilumelume, nga apunda afwina nkaninye, awufuma mwakwe weliwe. 27Awantu wonsi awazunguka awatalika nukuvwanzyania wakuti, Ngachonyechoo achani? Wuzye amisimbilizizye mipya? Umuntunye wee alinamaka yakusundila imizimu miwipe, imutontela nukumutontela!

28Achaleka Ilandwe lyakulumbililwa kwakwe Yesu akukwila munsi ya Galileya monsi nanti kuzimba.

Yesu apozya awantu wavule

(Mateyu 8:14-17; Luka 4:38-41)

29Awafuma mung'anda yakupepela awalungama kumwawo kwakwe Simoni nu Andreya; awapita apaliponga nu Jemusi nu Yohani. 30Enyinavyala Simoni walwile inzekema alala pachitala, achaleka walanga pano Yesu wafika awamunena ivyandwala. 31Aya kumulwale, amulema ikasa, amukatusya. Inzekema imutaya atalika awawapyunjila.

32Akula kwila, pano ilanzi lyinjila, awantu awatwalila Yesu awalwale wonsi wano walwile imizimu miwipe. 33Awantu wonsi awawungana pamulyango. 34Yesu apozya wonsinye wano walwile indwala zyamisango-misango afumya imizimu miwipe yonsi. Amyalalika imizimu miwipe, amuno yamumanyile.

Yesu awawizya mu Galileya

(Luka 4:42-44)

35Uwacha mwepwi, pano ilanzi litani litunke, Yesu akatuka afuma mung'anda. Afuma mukaya aya ukuvwame, awapepa kweneko. 36Ukuwa Simoni nawawuye awaya mukumuvwamba; 37awala wamuzana awati, Wonsinye wakukuvwamba.

38Ukuwa Yesu awatolelela ati, Tuyani kunji mutwaya twamumbali. Nakonye nkawizye Ilandwe zima, amuno achino nizizile.

39Achaleka wapisile munsi ya Galileya monsi, alanga akuwizya mung'anda zyakupepela mbali nukufumya imizimu miwipe.

Yesu aswefya uwamambombo

(Mateyu 8:1-4; Luka 5:12-16)

40Uwamambombo aya kwe Yesu, afika asokowala, amulambilizya ukuti amutule. Ati, Ndachino ukulonda, unganswefya.

41Ichilanda achilema Yesu, atambalika ikasa lyakwe amulema. Ati, Nkulonda, Telepa! 42Napaponapapo amabombo ayafuma kumuntu aswepa. 43Ngapano Yesu akalipila umuntu aleka apita nanti kuzimba. 44Ati, Yivwa, utize ukanene wumwi. Ukuwa yanga kwesimapepo uleke akakuchechete; ngapano ufime inzuwi zino Musa wakomelezya, kukulanjizya kwewonsi kuno kanonzi waswepa.

45Ukuwa umuntu apita asasya Ilandwe monsinye. Nachawuzimanye, wavwanjichisizye nkaninye chino chalesizye nu Uesu ukuya mukaya ichilola. Ukuwa, alanga ali wenga ukuvwame, awantu wavule awaya kweweliwe awafuma monsinye.

Currently Selected:

Marko 1: WWN82

Highlight

Copy

Compare