Mateyu 27
27
Awatwala Yesu kwe Pilato
(Marko 15:1; Luka 23:1-2; Yohani 18:28-32)
1Akula kwacha mwepwi wasimapepo wakulu nawasongo wawa Yuda awakwamba ivyakwe Yesu ukuti wamukome. 2Awamunyepa niminyololo, awamusenda, awamutwala kwe Pilato, ekapanzya wawa Roma.
lmfwa yakwe Yuda
(lmilimo 1:18-19)
3Ala pane e Yuda wino wakutilizile Yesu walola kuno wanyepwa, atontolokwa anyosya indalama ntiswe amakumi yatatu apa wasimapepo wakulu nawasongo, ati, 4Nawembuka pakukutilila umuntu wino asi nuluwi ukuti akomwe!
Ukuwa awamutolelela awati, Ngatwati wuli? Chocho achako!
5Yuda avwintila indalama mumasyo mimichile awasya; aya ayinyonga.
6Wasimapepo wakulu awaya awasola indalama awati, Indalama zyoo azyawazi, swinya mwisundo litu chitayana ukuziwika muchisengulilo chang'anda yakwe Leza. 7Awala wazumilizyania kwe chonye-choo, awaya awasumba indalama awakala ichalo chakwe nakamata, ayawa amalalo yakuzichila aweni. 8Achaleka akansinye kako kakakwitwa ukuti, Achalo chawazi ukufika nilelo.
9Ngapano chino chavwanzilwe numutumwa Jeremiya achifiswa ichakuti, Wasenzile indalama ntiswe amakumi yatatu, indalama zino awa Israeli wazumilizinie ukumukala, 10awaya awakala ichalo chakwe nakamata, ndimuno Imfumu e Leza wakomelezezizye.
Pilato awuzya Yesu amawuzyo
(Marko 15:2-5; Luka 23:3-5; Yohani 18:33-38)
11Yesu ayimilila pankolelo pakwe kapanzya amunena ati, Wuzye wemfumu ya wa Yuda?
Yesu atolelela ati, Wataka molimonye. 12Ukuwa kweni, Yesu nanti kuvwanga chimwi kwevino wasimapepo wakulu nawasongo wamulongozile.
13Ngapano Pilato amunena ati, Wuzye usinakwivwa ivintunye vyoo vyonsi vino wakukulongola?
14Ukuwa Yesu nanti kutolelela izwi limwi, achaleka kapanzya azunguka nkaninye.
Yesu apanzizwa imfwa
(Marko 15:6-15; Luka 23:13-25; Yohani 18:39—19:16)
15Penye pampindi yachakulya chakuyitopwa kapanzya walinji numwata uwakusapula uwamuvingololo wumwi wino iwumba lyalonda. 16Pampindinye yoyo kwalinji uwamuvingololo wumwi umumanyikwe nkaninye wino witwanga ilyakwe Yesu Barabasi. 17Achaleka lyalile pano iwumba lyawungana, Pilato awawuzya ati, Wuzye mukulonda mbasapulile weni? Wuzye pamwi mukulonda mbasapulile Yesu Barabasi pamwi e Yesu wino akakwitwa ilyakwe Klistu? 18Wamanyilenye-nto kuno walemesile Yesu kweweliwe muno awuzuwa.
19Walile pano Pilato ayisile mung'anda yakupanzizya, umuchi amutumila amazwi yakuti, Utize uchite umuntu weyo chimwi wino asi nuluwi, amuno muchilota chino ndosile uwusiku mpungine nkaninye muno amuntunye weyo.
20Wasimapepo wakulu nawasongo awapatichizya amawumba ukuti wanene Pilato awasapulile Barabasi aleke Yesu akomwe. 21Ukuwa kapanzya awawuzya ati, Wuzye weweni pakwe waa wawili wino mukulonda mbasapulile?
Awatolelela awati, E Barabasi!
22Pilato anyoka awawuzichisya ati, Ngafwandi e Yesu wino akakwitwa ilyakwe Klistu muchite chani?
Awatolelela awati, Mupamantile pawuchingane!
23Ukuwa Pilato ati, Ngawachita mulandu-chi?
Ngapano awatalika ukupongomoka namazwi makulu wakuti, Mupamantile pawuchingane!
24Ala Pilato walola wowonye, ichakuchita achimupota, ati nche kungapona imponzela, nga asenda minzi, as amba kumakasa yakwe pankolelo paminso yiwumba ati, Nsinakasinza kuvyakukomwa kwamuntunye wee! Achinu mwewenecho!
25Iwumba lyonsi alitolelela aliti, Ndi uwazi wuwe pakwe sweswe napawanawitu!
26Ngapano Pilato awasapulila Barabasi; atola Yesu amuvwapula awalemeka ukuti wakamupamantile pawuchingane.
Awavita awakwalangania Yesu
(Marko 15:16-20; Yohani 19:2-3)
27Ngapano ivita vyakwe Pilato avisenda Yesu avimutwala mwisano, iwumba lyonsi alimuwunganila. 28Awamuzula ivizwalo awamuzwika umwinjilo wuwenzu. 29Ngapano awaluka akamba kamyunga awamuzwika kumutwe, awamulemeka ninsonzo mwikasa lyakwe ilyandilo; nga awasokowala pansi pankolelo pakwe weliwe awamwalangania wakuti, Ndi imfumu ya wa Yuda iwe nuwulanzi wutali! 30Awamuswilila, awasenda ninsonzo awamuponkola nayo pamutwe, awala wamala ukumwalangania, 31awamuzula umwinjilo awamuzwika umwenda wakwe. Ngapano awamufumya awaya kukumupamantila pawuchingane.
Yesu apamantilwa pawuchingane
(Marko 15:21-32; Luka 23:26-43; Yohani 19:17-27)
32Awala pano wafumila kunzi awasunkania umuntu wino wafumile ku Kureni wino witwanga ilyakwe Simoni, weyonye awino awamupatichizya ukusenda uwuchingane wakwe Yesu. 33Awaya kumasyo yano yakwitwanga Goigota, lino likusula ukuti, amasyo yipanga. 34Paponye awamupa ipala lino lyasanzinkine nivilule ukuti ang'we; naponye walile welezya, akana ukung'wa.
35Awamupamantila pawuchingane ngapano awankana ivizwalo vyakwe mukupenda. 36Ngapano awikala paponye awalanga wakumulola. 37Pamutwe wakwe awawika ichimanyilo chino chawalisilwe penepo vino wamwambanga wakuti, Wee we Yesu Imfumu ya wa Yuda. 38Ngapano awapamantila Yesu apaliponga nawang'o wawili pamawuchingane, wumwi lwakwe ndilo numuwuye lwakwe kamani.
39Awantu wano wapitanga penepo awapunzya imitwe yawo nukufondomola intusi awatuka Yesu wakuti: 40Wenji ungamongola ing'anda yakwe Leza unyoke uyizenge swinya mumanda yatatu! Sale yitule, nd'achino we Mwanakwe Leza! Yika ufume pawuchingane!
41Awowonye nawasimapepo wakulu nawasambilizya wamasundo nawasongo awamwalangania wakuti, 42Watulanga wanji ukuwa weni chamupota! Wuzye asi a Mfumu ya wa Israeli? Nd'achino angika afume pawuchingane kanonzinye kaa, peni tungamusuwila! 43Wasuwila mwe Leza nukuti a Mwanakwe Leza. Aleni, tutele tulole, vino Leza wandi amutule!
44Nawang'onye wano wasayisilwe apaliponga nawe awamutuka.
Imfwa yakwe Yesu
(Marko 15:33-41; Luka 23:44-49; Yohani 19:28-30)
45Alila ilanzi lyafika pamutwe papela imfinzi ikoma munsi yonsi, ilanga ikomile mpaka pano ilanzi lyatonta. 46Nche kwela pano ilanzi lyasenuka, Yesu akuta nizwi kulu ati, Eli, Eli, lemasabaktani? Kuno akuli kuti, Leza wane, Leza wane, ngawansila chani?
47Awantu wamwi wano wimilile paponye awivwa awati, Akwita Eliya! 48Wumwi uwakwe woliwo asamala nanti kuzimba, aya asenda pamba amutimpika mwipala, amuwika kunsonzo kunsongo, ayelezya ukupa Yesu ukuti ang'we.
49Ukuwa wanji awati, Techela, tulole ndi Eliya wandi ayize amutule!
50Swinyanye Yesu alila nizwi kulu, aputuka afwa.
51Ngapano ichimwenda chakuchinga chino chachinzilwe mung'anda yakwe Leza achilepuka pawili, ukufumilila papela mpaka pansi. Insi iyingana, wamfuzi awalepunkana, 52ninkungwe azyiyuka, nawantu wakwe Leza awavule wano wafwile awazyulupulwa. 53Awasya inkungwe; ngapano Yesu wazyulupuka kumfwa awaya kukaya katele; kuno awantu wavule wawaweni.
54Ala musika wavita apaliponga nawavita vyakwe wano walindililanga Yesu walola ichizumanzi nivintu vinji vyonsi vino vyaponile, awawa kwitete awati, Nachawuzimanye wee walinji a Mwanakwe Leza!
55Awanachi wavulenye walinji kokonye, walolanga lwapatali, wawonye awano wakonsile Yesu ukufuma ku Galileya, wamwavwanga. 56Pawanachinye wawo palinji e Mariya wa ku Magadala, nu Mariya enyina wakwe Jemusi nu Jozefu, nga nunyina wawanakwe Zebediya,
Ukuzikwa kwakwe Yesu
(Marko 15:42-47; Luka 23:50-56; Yohani 19:38-42)
57Akulakwila, umuntu wumwi umuchindame afika wino wafumile ku Arimatiya izina lyakwe walinji we Jozefu, wino swinya walinji amusambilizi wakwe Yesu. 58Aya kwe Pilato amulenga ichala chamuwili wakwe Yesu. Pilato akomelezya ukuti wamupe, 59Nga Jozefu asenda ichala achivwimba numwenda wupya uwutalepe, 60aya azika munkungwe yakwe, yino watezile wafolonkonta mwemfuzi. Nga akunkulusizya iwe kulu pankungwe nga apita. 61E Mariya wa ku Magadala nga nu Mariya winji wisile paponye, wulunga ninkungwe.
Ukulindilila inkungwe
62Uwacha Pachiwelusi-wasimapepo wakulu na wa Falisi awasunkana nu Pilato 63awati, Tatakulu, twizuka kuno chawufi weyo pano walinji amumi watili, Ndizyulupulwa kuwafwe ndikwapita amanda yatatu. 64Achaleka fwandi, komelezya ukuti inkungwe isungwe ukwizafika nuwanda wachitititatu, alyakuti awasambilizi wakwe watize wamwiwe, nga wanena awantu wakuti, Azyulupuzilwe kuwafwe. Uwufinye wowo uwakupelelechezya wungawipa wulutilizye nuwakutalika.
65Pilato awanena ati, Yanji kalindililanji inkungwe namaka yinu yonsi.
66Achaleka awapita awaya mukulindilila inkungwe yoyonye awamatilila ichimanyilo piwe nga wakalindilila awalanga wali paponye,
Currently Selected:
Mateyu 27: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
