Mateyu 26

Ukusopelela Yesu

(Marko 14:1-2; Luka 22:1-2; Yohani 11:45-53)

1Walile pano Yesu wamala ukusambilizya ivintunye vyoo, anena awasambilizi wakwe ati, 2Manyile kuno yala amanda yasila yawili kuwe ichakulya chakupitililwa, nu Mwanamuntu ayize alemekwe kukupamantilwa pawuchingane.

3Ngapano wasimapepo wakulu nawasongo wawa Yuda awawungana apaliponga mwisano lyakwe Kayafasi, esimapepo mukulu, 4awakwamba ukuti waleme Yesu munkama wamukome. 5Awati, Tutize tuchite choo pampindi yachakulya, amuno pamwi awantu wangachita imponzela.

Yesu apakwa amafuta pa Betane

(Marko 14:3-9; Yohani 12:1-8)

6Walile pano Yesu ali mu Betane mung'anda yakwe Simoni weyo uwamambombo, 7umwanachi wino walinji numusazi wamafuta ayifungo nunchile ayawuzi wukulu afika ayitila pamutwe wakwe Yesu ye ayisile pachakulya. 8Awasambilizi awalola wowonye, awavitwa, awati, Ng'uwononinye woo awachani? 9Amuno amafutanye yaa ayifungo nunchile yanga yakazwe indalama mvule zipwe kuwasaluke!

10Ala Yesu wamanya chino wavwanganga ati, Nga mukutamizya umwanachi wee chani? Achizima kutaluvile chino umwanachinye wee wanchitila. 11Mulilanga muli nawasaluke penye, ukuwa nenji ntalilanga indi namwe pe. 12Chino umwanachinye wee wanchitila wanjitila amafuta yifungo nunchile wanjanizya lyankani kukuzikwa kwane. 13Achaleka kanonzi, yizukanji chonyechoo! Konsinye kuno Ilandwe zima lyandi liwalandwa, munsi yonsi, chonyechoo chino umwanachi wachita chiliwalandwa chiwe achakumwizuchila.

Yuda azumila ukukutilila Yesu

(Marko 14:10-11; Luka 22:3-6)

14Ngapano wenga uwawasambilizi ikumi nawawili—wino witwanga ilyakwe Yuda Iskarioti— aya kwewasimapepo, 15ati, Wuzye mwandi mumpe chani ndi nawalemeka Yesu? Awamupendela indalama ntiswe amakumi yatatu awamupa. 16Ukufuma paponye Yuda awavwamba impindi nzima iyakuti aiemechele Yesu kwewoliwo.

Yesu alya ichakulya chakupitilila nawasambilizi wakwe

(Marko 14:12-21; Luka 22:7-14, 21-23; Yohani 13:21-30)

17Pawanda wakutalika uwachakulya chino chisi numutawa, awasambilizi wayile kwe Yesu awamuwuzya awati, Wuzye ukasi tukakuyanizye ichakulya chakupitililwa kwi?

18Nawe awatolelela ati, Yanji mukaya kumuntu wumwi etunga, mukamunene muti, Umusambilizya akuti, Impindi yane yafichila; nenenye nawasambilizi wane tukasi tuchitile ichakupitililwa mung'anda yako.

19Awasambilizi awachitila ndimuno Yesu wawanenezile, awayania ichakulya chakupitililwa.

20Akula kwila e Yesu nawasambilizi wakwe ikumi nawawili awikala awawalya. 21Awala vino wakulya Yesu ati, Nkuwanena nkuti wumwi uwakwe mwemwe wandi ankutilile.

22Awasambilizi awaluwaluwa awatalika ukumuwuzya wenga-wenga wakuti, We Mfumu, wuzye ukutaka nene?

23Yesu awatolelela ati, Wenga wino akusomfya nani apaliponga mulweso awino wandi ankutilile. 24Umwanamuntu wandi afwe ndimuno amawaliko matele yatachila, ukuwa akalanda kasikolo kumuntunye weyo wino wandi akutilile Umwanamuntu! Changa chizipe ndi umuntunye weyo atanga akwatwe!

25E Yuda, ekakutilila, avwanga ati, Nachawuzimanye wuzye anene, Musambilizya?

Yesu amutolelela ati, Wayivwanjila.

Ichakulya cha Mfumu

(Marko 14:22-26; Luka 22:15-20; 1 Wakorinte 11:23-25)

26Awala vino wakulya, Yesu atola ichakulya, apepa asalifya, amontola, apa awasambilizi wakwe ati, Tolani mulye; woo amuwili wane.

27Anyoka atola ulupindi, asalifya kwe Leza, awapa ati, Ng'wani mwenemo mwensi, 28woo awazi wane, wilayano lyakwe Leza, awazi wane wuno wazwila awavule kwitetelwa lyamawembuko. 29Ukuwa nkuwanena nkuti, Ntalitela ing'we vyoo swinya ukwizafika pawanda wuno nding'wa ivipya namwe mu Wufumu wa Monsi wane.

30Ngapano awimbila ulwimbo awaya kumwamba wamingungu.

Yesu awumbula kuno Peter wandi amukane

(Marko 14:27-31; Luka 22:31-34; Yohani 13:36-38)

31Ngapano Yesu awanena ati, Uwusikunye woo mwensinye mwandi musamale munsye, amuno amawaliko matele yavwanga yati, Leza alikoma umuchemi nga uwufyo wang'onzi wusalangane. 32Ukuwa pano nazyulupulwa mbatanjilile ukuya ku Galileya.

33Peter atolelela Yesu ati, Nenji pole ntalitela nkusye chingatenga wonsi wangasamala!

34Yesu anena Peter ati, Yizuka choo! Uwusikunye woo pano mukolwe atani alamule watela wankana katatu wati ntakumanya.

35Peter atolelela ati, Ntalitelamvwange inti ntakumanya, nanti ndi nkufwanye apaliponga nawe!

Awasambilizi wonsi awavwanjila ndimuno Peter-nye wavwanjizile.

Yesu awapepa mu Getisemani

(Marko 14:32-42; Luka 22:39-46)

36Yesu aya nawasambilizi wakwe kumasyo yano yakakwitwa Getisemani, awanena ati, Mwenji yikalani panye-paa pano nenji naya koko mukupepa. 37Asenda Peter nawanakwe Zebediya wawili. Amalanda nuwulumila avimuponela, 38nga awanena ati, Navunkuntuka mumwezo namalanda kutaluvile. Yikalani panye-paa muwalolela nani.

39Apitilila katichi, apona afukime, apepa ati, Oko we Tata, nd'achino chingachitwa, funtusya ulupindinye 100 kwenene! Ukuwa chino nene nkulonda pole, nkandi ukulonda kwako.

40Ngapano anyochela kuwasambilizi wawo watatu azana waponechile; nga anena Peter ati, Ngamuno chani chino mwensinye mwetatu mutanga mulolele nani akapindi katichi ndi kaa? 41Lolelanji, swinya pepanji alyakuti mutize muponele mukwelezwa. Umuzimu weni wukulonda, ukuwa umuwili watonta.

42Swinya Yesu aya mukupepa imp indi yachitiwili, ati, Oko we Tata, nd'achino ulupindinye 100 lutanga lufume ukuti nsuke ndung'we ukulonda kwako kuchitwe. 43Anyoka swinya azana awasambilizi waponechile; muno aminso yawo yang'wamile kutulo.

44Swinya Yesu afuntuka, apita aya mukupepa impindi yachititatu, akuvwanga amazwi ayaliyonganye. 45Ngapano anyoka kuwasambilizi ati, Wuzye muchili muponechile mukupuza? Silolani! Impindi yafichila iyakuti Umwanamuntu alemekwe mumakasa yawawembu. 46Katukani, tuyani tuwapita. Silolani, umuntu wino akunkutilila!

Ukulemwa kwakwe Yesu

(Marko 14:43-50; Luka 22:47-53; Yohani 18:3-12)

47Walile pano Yesu achili akuvwanga, e Yuda umusambilizi wachitikumi nawawili afika. Walinji niwumba kulu ilyawantu wano wasenzile impanga nizyanduku, watumilwe nawasimapepo wakulu nawasongo wawa Yuda. 48Kakutilila wapile iwumba ichimanyilo ati, Umuntu wino naya namukukula ye awili weyonye wino mukulonda. Mumuleme!

49Ala napaponapapo pano Yuda wafika atotomela ukuya kwe Yesu afika ati, Umutende wuwe nawe, Musambilizya, amukukula.

50Yesu atolelela ati, Chita zuwachino watunjila, wane!

Ngapano awafika awalema Yesu, awamunyepa achikala achiti-ndi, 51Wumwi wino walinji nu Yesu asomola ulupanga lwakwe akoma umuzya wakwe simapepo mukulu, amusenga ikutwi. 52Ngapano Yesu ati, Someka ulupanga lwako muchipata, amuno wonsi wano wakasenda impanga walifwila kulupanga. 53Wuzye utamanyile kuno nanga ndilile Tata ukuti ayize anjavwe, nanti kuzimba antumile imipanda yawangeli ukulusye ikumi nawawili? 54Ukuwa ndi nanga ndilile Tata wowonye, ngafwandi amawaliko matele yangafiswa wuli ukuti avino chiwe?

55Ngapano Yesu anena amawumba ati, Ngamuno chani chino mwiza nizyampanga nizyanduku kukwiza ndema, ngati nesimilandu? Ngavino nikalanga mung'anda yakwe Leza penye muno nasambilizyanga, ukuwa nanti kuti mundeme. 56Ukuwa choo chachitwa alyakuti amawaliko mate le yano yawalisilwe nawatumwa yafiswe.

Ngapano awasambilizi wonsi awamusya awasamala.

Yesu ayimilila pipanzyo

(Marko 14:53-65; Luka 22:54-55, 63-71; Yohani 18:13-14, 19-24)

57Wano walemile Yesu wamutwazile kung'anda yakwe Kayafasi, esimapepo mukulu, kuno awasambilizya wamasundo nawasongo wawungine. 58Ukuwa Peter wamukonsile lwapatali, ukuyafika mumusolo wang'anda yakwe simapepo mukulu. Ayinjila mumusolo ayikala pansi nawakalindilila, kukulola vino chandi chiwe. 59Wasimapepo wakulu niwungwe lyonsi awelezya ukuvwambilizya uwukalola wawufi alyakuti wakome Yesu; lelo watatela wawuzane, 60chingatenga awavule awakwe woliwo wayile awavwanga ivyakwe Yesu uwufi wutupu. Pakupelelechezya awantu wawili awaya pankolelo awati, 61Umuntunye wee watili, Ngamongola ing'anda yakwe Leza nyoke njizenge swinya mumanda yatatu.

62Esimapepo mukulu ayimilila anena Yesu ati, Wuzye usi nitolelelo limwi kukulongolwa kwamwatanye woo? 63Ukuwa alanga amyalile. Swinyanye simapepo mukulu amuwuzya ati, Mwizina lyakwe Leza mumi, kanonzi nkasi ulape: utunene ndi we Mesaya, Umwanakwe Leza.

64Yesu amutolelela ati, Wataka molimonye. Ukuwa nkuwanena nkuti, ukufumilila impindinye yoo nukufika kunkolelo mulilola Umwanamuntu ayisile lwakwikasa lyandilo lya Wamaka yonsi, swinya akwiza pamawingo yamwiyulu.

65Muno achonye-choo simapepo mukulu alepula ivizwalo vyakwe ati, Akutuka Leza! Tutanga tuwafwa nukuvwamba uwukalola wunji! Kanonzinye kaa, mwayivwila akuvwanga amazwi mawipe! 66Nga mukuti wuli?

Awatolelela awati, Wasindwa, swinya wazipila imfwa.

67Ngapano awamuswilila paminso awamuma nukumuma; nawo wano wamupamile namapi awati, 68Tumwa kwesweswe, we Mesaya utake wino wakuma!

Peter akana Yesu

(Marko 14:66-72; Luka 22:56-62; Yohani 18:15-18, 25-27)

69Ala pane Peter ayisile panzi mumusolo, apano umukazyana wumwi umuwomvi wakwe simapepo mukulu wayile kweweliwe ati, Nawewenye, walinji nu Yesu wa ku Galileya.

70Ukuwa akana pankolelo pakwe wonsi. Ati, Ntamanyile chino ukutaka, 71afuma aya kumpongolo yamusolo. Kokonye umukazyana winji umuwomvi amulola anena awantu wane walinji mumusolo ati, Walinji nu Yesu wakwe Nazareti.

72Swinya Peter akana ati, Nkulapa, umuntunye wee ntamumanya!

73Apala pazimba katichi awantu wane wimilile paponye awaya kwe Peter awati, Nachawuzimanye awewenye, naponye umuvwango wako wukukusinila!

74Ngapano Peter ati, Fwandi ndi Leza ansunde nd'a chino nkuvwanga uwufi! Paponye, numukolwe alamula! 75Nga Peter ayizuka chino Yesu wamunenile ati, Wala pane mukolwe atani alamule, wandi utele wankana katatu wati ntamumanya. Afumila kunzi alila ichikalazi.

Currently Selected:

Mateyu 26: WWN82

Highlight

Copy

Compare