Mateyu 25
25
Umulumbe wakwe wamwali ikumi
1Pawandanye wowo Uwufumu wamwiyulu wulikolana nawamwali ikumi wano wasenzile inyale zyawo awaya mukusunkania siwinga. 2Wasano awakwe woliwo walinji awatumpe, swinya wasano walinji awachenjele. 3Awatumpe wasenzile inyale zyawo ukuwa nanti kusenda namafuta yanji. 4pano awakazyana wachenjele wasenzile amafuta yanyale mumisazi yawo. 5Ala siwinga wazimba ukufika, awakazyana awasipula awaponechela.
6Kwatezile kwawa awusiku pakasi pano wivwile inkuta yakuti, Siwinga wee wiza! Zanji mwize mumusunkanie! 7Awakazyana wawo ikumi awaziwuka awayania inyale zyawo. 8Ngapano awakazyana watumpe awanena awakazyana wachenjele awati. Tupani amafuta yinu yamwi, amuno inyale zitu zikuzimuchila. 9Awakazyana wachenjele awakana awati, Tutanga tuwape, amuno tusi namafuta yano yangatukwila ngayawakwile namwe. Yanji kuno wakakazya amafuta mukayiaklile mwewenecho. 10Achaleka awakazyana watumpe wawo awaya mukukala amafuta, awala vino waya mukukala, siwinga afika. Awakazyana wano wayisenginie awinjila apaliponga nusiwinga kuchakulya chawinga, nichisakati achiyalwa.
11Pansizi awakazyana wawuye awafika, awati. Tatakulu, tatakulu twiyulile twinjile! 12Ukuwa siwinga awatolelela ati, Nachawuzimanye ntawamanyile.
13Lolelanji, amuno mutamanya uwanda nanti ampindi.
Umulumbe wawawomvi watatu
(Luka 19:11-27)
14Chiliwa ngati amuntu wino walondanga ukufuma pakaya aleme umusinzo; wisile awawomvi wakwe asya wawalasika pansawo yakwe. 15Apa wensi ukulingana namaka yakwe: apa wumwi indalama imyanda ikumi impindi zisano (5,000), nawinji amupa imyanda ikumi impindi ziwili (2,000), numuwuye imyanda ikumi (1,000). Alema umusinzo awapita. 16Umuwowomvi wino wapochelezile indalama imyanda ikumi impindi zisano (5,000), aya mukusandulula azanila swinya indalama zinji ndizyozyonye (5,000). 17Nawe wino wapochelezile indalama ikumi impindi ziwili, aya azanila swinya zinji ndizyozyonye (2,000). 18Ukuwa umuwomvi wino wapochelezile indalama imyanda ikumi (1,000) apita aya ayimba ichizinji, azichila indalama zyakwe yisikulu momonye.
19Ukuwa apala pazimba eyisikulu wawantunye wawo awela, awazya indalama nawawomvi wakwe. 20Umuwomvi wino wapochelezile indalama imyanda ikumi impindi zisano (5,000), aya atula nindalama zinji ndizyozyonye (5,000). Ati, Wampile indalama imyanda ikumi impindi zisano, ukuwa, Lola! Naya nonjelezya zinji ndivino zino wampile. 21Yisikulu amunena ali, Wachita ichete, wemuwomvi muzima umusuwilwa! Walinji wemusuwilwa pandamala ntichi, kanonzi nandi nkulasike pandamala mvule. Zanga tuwazewela apaliponga! 22Ngapano umuwomvi wino wapochelezile indalama imyanda ikumi impindi ziwili (2,000), afika ati, Wampile indalama zyoo, ukuwa Lola tatakulu! naya nonjelezya zinji ndivino zino wampile (2,000). 23Yisikulu amunena ati, Wachita ichete, wemuwomvi musuwilwa! Walinji wemusuwilwa pandalama ntichi, kanonzi nandi nkulasike pandalama mvule. Zanga tuwazewela swensi! 24Ngapano umuwomvi wino wapochelezile indalama imyanda ikumi (1,000) afika ati, Tatakulu nakumanya kuno watala; ukasinza kuno utatanda, swinya ukasezya kuno utasumba imbeyu. 25Achaleka muno antete nayile mvuchila indalama zyako pansi, Lola! Indalama zino wampile zyoo. 26Yisikulu amunena ati, Ye, wechikata chikulu wuli! Ndiwamanyile kuno nkasinza kuno ntatanda, swinya nkasezya kuno ntasumba imbeyu, 27ngachani chino utayile usengula indalama zyane ku banki? Peni nanga njize mpochelele. zyonsi apaliponga nazino zyonjelezwa pano niza. 28Achaleka kanonzi, mupokani indalama mupe wino ali nindalama imyanda ikumi impindi ikumi (10,000). 29Amuno wensi wino alinavyo, alipwa ivivule, viwalafuka nukulafuka; ukuwa wino asi navyo, nachino ali nachonye chilipokwa kweweliwe. 30Nichiwelewelenye choo! Chisumbilani kunzi mumfinzi nkulu; kokonyenye akuno chiwalila nukulumania amino.
Ipanzyo lyakupelelechezya
31Alila pano Umwanamuntu wiza kukutema uwufumu, apaliponga nawangeli wakwe, alipungama pandulu yachifumu, 32imyiko yawantu wonsi munsi waliwungana pankolelo peweliwe. Apano aliwapawunkania mumawumba yawili, ndivino umuchemi akapawula ing'onzi kumbuzi: 33ayize awike ing'onzi kwendilo nazyo imbuzi kwekamani. 34Ngapano Imfumu iyize inene awantu wano wali lwakwendilo ati, Mwewantu wano wapepwa nu Mukwasi wane: zanji! Zanji mwize mupochelele uwufumu wuno wayanizwa mwemwe ukufumilila kuluwandi lwansi. 35Pano inzala yandumile mwandezile, napano ulusala lwandumile mwampile aminzi ing'wa; nalinji nemweni amumpochelela mung'anda zinu, 36chintakwa amunzwika; nalwile amuntetesya, muvingololo, amwiza amunsyungula. 37Ngapano awalungamane wize wamutolelele wati, Ngawandachi Mfumu pano twakuweni inzala ikulumile atukulela, nant'alusala lukulumile atukupa ung'wa? 38Ngawandachi wuno twakuweni wemweni atukupochelela mung'anda zitu, nanr'achintakwa, atukuzwika? 39Ngawandachi pano twakuweni wemulwale nant'amuvingololo, atwiza atukusyungula? 40Imfumu iyize itoleleleiti, Nachawuzimanye nkuwanena nkuti, pano mwachitizile wenga uwawatichinye waa awanawitu, mwanchitizile nenenye!
41Ngapano ayize anene nawakwikasa lyakwe kamani ati, Mfumilani paa, mwewantu mwatipwa nu Leza! Muye kumulilo wamuyayaya wuno wayanizwa Satana nawangeli wakwe! 42Pano inzala yandumile mutandezile, napano ulusala lwandumile mutampile aminzi yakung'wa; 43nalinji nemweni amukana ukumpochelela mung'anda zinu, chintakwa nanti kunzwika; nemulwale namung'anda yavingololo nanti kumpechela. 44Ngapano nawo wize wamutolelele wati, Ngawandachi Mfumu, pano twakuweni inzala ikulumile, nanti'alusala lukulumile, nant'amweni, chintakwa, nanti pamwi wemulwale, nant'amung'anda yavingololo, atukana ukupechela? 45Ngapano Imfumu iyize iwatolelele iti, Nachawuzimanye nkuwanena nkuti, Pano mwakanile ukuchitila wumwi uwawatichinye waa, anenenye anemuntu mwakanile ukunchitila. 46Wanye-waa waliya kukusundwa kwamuyayaya; ukuwa awalungamane weni waliya kuwumi wamuyayaya.
Currently Selected:
Mateyu 25: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
