Mateyu 13

Umulumbe wakwe katanda

(Marko 4:1-9; Luka 8:4-8)

1Pawandanye wowo Yesu afuma mung'anda aya kumbali yakwe sumbi, aya ayikala pansi awasambilizya. 2Akuwungana iwumba kulu kweweliwe achaleka ayinjila muwato ayikala mwenemo, iwumba lyonsi alyimilila pachituntu. 3Awavwanjila ivintu vivule mumilumba. Akuti.

Lolani umuntu wumwi wayile mukutanda. 4Ala vino akutanda imbeyu muchalo, yimwi iponela mumbali yanzila, inyunyi aziya aziyisola. 5Yimwi iponela pemfuzi, pano patalinji umusili wuvule. Napaponapapo imbuyu iti nukumela, amuno pansi patalinji umusili wuvule. 6Alila ilanzi lyakwela alyocha imbeyu, ngamuno imisisi itinjizile pansi imbeyu ikala. 7Imbeyu yimwi iponela mumyunga, imyunga ikula iyifina, 8Ukuwa mbeyu yimwi iponela pamuvundo, icha nukucha yimwi umwanda, yimwi amakumi mutanda, nayinji amakumi yatatu.

9Nga Yesu alechelezya namazwi yakuti, Yivwani, nd'achino muli namakutwi!

Chino Yesu wumilanga imilumbe

(Marko 4:10-12; Luka 8:9-10)

10Ngapano awasambilizi awaya kwe Yesu awamuwuzya awati, Ngamuno chani chino ukumila imilumbe pano ukuwanena?

11Yesu awatolelela ati, Chapwa kwakwe mwemwe ukumanya ivifisame vya Wufumu wamwiyulu, ukuwa weni chitapwa. 12Amuno wensi wino ali nachimwi aliyonjelezwa, alyakuti ayize awe nivivule; ukuwa wino asi nachimwi, nakano ali nakonye kalipokwa kwakwe weliwe. 13Muno achonye-choo achino nkuwumila imilumbe: wakalola, ukuwa awalanga wakulola ichitumbula-mpanzi, wakakwivwa, ukuwa wasikwivwichisya nant'akwiluka wasikwiluka. 14Achaleka kwakwe woliwo uwutumwa wakwe Ayizeya wafiswa wuno wati,

Ukwivwa kweni mulilanga mukwivwa, ukuwa nanti kuti mwiluke;

muliwalola ukuwa achitumbulampanzi chitupu,

15amuno awantunye waa wasi namano,

namakutwi yawo yafundika,

naminso yawonye yaziwata.

Amuno pamwi nche, aminso yawo yangalola,

namakutwi yawo yawakwivwa, nukwiluka wakwiluka,

nga wapetuchile kwenene, avino Leza wataka,

wati, Ngapano mbapozye.

16Ukuwa mwenji, mwewalongo wuli! Aminso yinu yakalola namakutwi yinu yakakwivwa. 17Yizukanji choo! Awatumwa wavulenye nawantu wavule awakwe Leza walondesyanga nkaninye ukulola vino mweme mukulola, ukuwa watatela wavilole, swinya walondesyanga ukwivwa vino mukwivwa ukuwa watatela wivwe.

Yesu alondolola umulumbe wakwe katanda

(Marko 4:13-20; Luka 8:11-15)

18Aleni, teyelezyani chino umulumbe wakwe katanda wukusula. 19Wonsi wano wakula wivwa amazwi ya Wufumu nanti kwiluka wakolana nimbeyu yino yaponezile mumbali yanzila. Umuwipe akwizanga asompola amazwi yano yatandwa mwakwe woliwo. 20Imbeyu yino yaponezile pakwe mfuzi awali wano wakapochelela amazwi nichimwemwe napaponapaponye pano wivwa. 21Ukuwa nanti kuwa nimisisi mwakwe woliwo, swinya nanti kulandalila. Ukuwa ayala amatamyo nuwuyimvi vyakatuka muno amazwinye yayo, awalechelezya nanti kuzimba. 22Imbeyu yino yaponezile mumyunga awali wano wakula ndiwivwa amazwi, ukusaya kwampindinye yoyo nukukundisya insawo akufina amazwi, awikala nantikucha. 23Nimbeyuyino yatanzilwe mumuvundo awali wano wakula wivwa amazwi awiluka: awacha nukucha, wamwi umwanda, wamwi amakumi mutanda, wamwi amakumi yatatu.

Umulumbe wanswaswa

24Yesu anyoka awumila umulumbe wunji ati, Uwufumu wamwiyulu wakolana numuntu wino watanzile imbeyu nzima muchalo chakwe. 25Walanga pano awantu waponechile uwusiku, umulwani aya atanda kalolo munkumba, apita. 26Yalanga pano imbeyu yakula yafumya imitwe, inswaswa azimela. 27Awawomvi wamwenichalo awaya kweyisikulu awamunena awati, Tatakulu, watanzile imbeyu nzima muchalo chako; nga inswaswa zyamela wuli? 28Atolelela ati, Amulwani wumwi ayizile wachita chonye-choo, Awawuzya yisikulu awati, Wuzye ukasi ukuti tukipile inswaswa? 29Akana ati, Awe, amuno mungala pano mukwipila inswaswa munyunkulile apaliponga ninkumba. 30Lekani inkumba ninswaswa vikulile apaliponga yasuke yawe amasika, ngapano njize nene wakasinza inti, Pakutalika mutele munyunkule inswaswa muzinyepe mumyanzi muzisumbile mumulilo; ngapano musinze inkumba mulonge munkoma yane.

Umulumbe wambeyu yamuti

(Marko 4:30-32; Luka 13:18-19)

31Yesu anyoka awumila umulumbe wunji ati, Uwufumu wamwiyulu wakolana nimbeyu yamuti, yino umuntu akatanda muchalo chakwe. 32Ayili mbeyu yino yachepesya yalusya imbeyu zyonsi, ukuwa ikula yakula, ikula ilusya imiti yonsi. Achiwa achimuti chikulu, ninyunyi aziya azizenga ivisalanzo munsamba zyakwe woliwo.

Umulumbe wamutawa

(Luka 13:20-21)

33Swinyanye Yesu awumila umulumbe wunji ati, Uwufumu wamwiyulu wakolana numutawa. Umwanachi akasenda umutawa awuvundunkania nuwusu wamumpakwilo, awusuka umunya wonsi awututumuka.

Chino Yesu wumilanga imilumbe

(Marko 4:33-34)

34Yesu wanenelanga amawumba yawantu ivintunye vyoo mumilumbe; atawanenanga ichintu chimwi nanti kuma umulumbe. 35Wachitanga wonye-woo alyakuti chifiswe chino chavwanzilwe numutumwa ukuti,

Pano nkuwanena ndiwavwanjila

mumilambe;

ndiwawanena ivintu vino vitamanyikwa ukufumilila kuluwandi lwansi.

Yesu alondolola muno umulumbe wanswaswa wuyizile

36Nga Yesu asya amawumba ayinjila mung'anda. Awasambilizi wakwe awaya kweweliwe awamunena awati, Tunene chino umulumbe wanswaswa wukusula.

37Yesu awatolelela ati, Umuntu wino watanzile imbeyu 'nzima a Mwanamuntu; 38ichalo ansi; imbeyu nzima awantu wamu Wufumu; nazyo inswaswa awantu wawipe awa Muwipe; 39nawe umulwani wino watanzile inswawsa we Satana. Nako ukusinza ayili nsilo yampindi, nawo wakasinza awangeli. 40Achaleka ndivino inswaswa zikakonganikwa azyochwa mumulilo, avino chiliwa pansilo yampindinye yoyo: 41Umwanamuntu alituma awangeli wakwe wize wakonganike mu Wufumu wakwe wonsi wano wakawembusya awantu wakwe, wawunganike nawawembu wanji wonsi, 42wize wawasumbile mwilungu lyamulilo, wize walila nukulumania amino. 43Ngapano awantu wakwe Leza wize wawale ndivino ilanzi mu Wufumu wamonsi wawo. Achaleka fwandi ndimuli namakutwi, yivwani!

Umulumbe wansawo mfisame

44Uwufumu wamwiyulu wakolana ninsawo mfisame muchalo. Achaleka walile umuntu wayizana, ayifisa. Ichimwemwe achimulema aya asumba vyonsi vino walinji navyo, anyochela aya akala ichalo,

Umulumbe wawukasi wawuzi wukulu

45Swinyanye Uwufumu wamwiyulu wakolana nukakala wino wavwambanga uwukasi wawuzi wukulu. 46Ala wazana wuno wuyine nkani aya asumba vyonsi vino walinji navyo, aya akala uwukasi wamwatanye wowo.

Umulumbe wikonde

47Swinyanye Uwufumu wamwiyulu wakolana nikonde lino lyasumbizilwe mwesumbi, ikonde lino likalema inswi zyamisango-misango. 48Alila lizula awalondo awalikwemela kuchituntu, awikala pansi awankana inswi. 49Avino chiliwa kunsilo yampindinye yoyo: awangeli waliya monsi-monsi wawunganike awawembu wawafumye muwalungamane, 50wize wawasumbile mwilungu lyamulilo. Kuliwa inkuta nukulumania amino.

Ukusimichila kupya nukukali

51Yesu awawuzya ati, Wuzye mwiluka vyonsinye vyoo?

Nawo awatolelela awati, Eta twiluka. 52Achaleka awatolelela ati, choo chikusula ukuti umusambilizya wisundo wensi wino wiza wawa amusambilizi wa mu Wufumu wamwiyulu wakolana numwening'anda wino akufumyanga ivintu vipya nivikali munkoma yakwe.

A wakana Yesu mwe Nazareti

(Marko 6:1-6; Luka 4:16-30)

53Walile pano Yesu wamala ukuvwanga imilumbenye yoo, afuma kweneko 54anyochela kukaya kakumwawo, aya awasambilizya mung'anda yawo iyakupepela, nawonsi wano wamwivwanga awazunguka wakuti, Nga amanonye yaa wayafumya-kwi? Awawuzya awati, Nga ivizungusyo vyoo vyeni avizungusyo-chi? 55Wuzye asi amwanakwe kawaza wamiti? Wuzye asi amwanakwe Mariya, swinya wuzye asi amunyina Jemusi, nu Jozefu, nu Simoni nu Yuda? 56Wuzye inkazi zyakwe zyonsi zisikwikala monye-moo? Ngafwandi wafumya vyonsi vyoo kwi? 57Achaleka awamukana.

Yesu awanena ati, Umutumwa akachindikwa konsinye suka ndi amukayda kapamwawo namuwantu wachiwanza chakwe. 58Atachisile ivyakuzungusya vivule kweneko amuno watalinji nisuwilo.

Currently Selected:

Mateyu 13: WWN82

Highlight

Copy