Mateyu 12

Iwuzyo kuvyawanda wakusolezya

(Marko 2:23-28; Luka 6:1-5)

1Palanga patani pazimbe nkani Yesu apita muvyalo vyankumba pawanda wakusolezya. Inzala yalumile awasambilizi wakwe, achaleka awatalika ukufyanula inkumba awapukusa wakulya. 2Ukuwa awa Falisi awala walola wowonye, awanena Yesu awati, Lola, awasambilizi wako wakuchila isundo litu wakufyanula inkumba pawanda wakusolezya!

3Yesu awatolelela ati, Wuzye mutawazya chino Davidi wachisile pampindi yoyo pano inzala yamulumile nawano walinji nawo? 4Winjizile mung'anda yakwe Leza, nga Davidi-nye nawantu wakwe awalya ichakulya chimichile ichakwe Leza, chingatenga lyalinji alisundo kwakwe woliwo kuno watazipizile ukulya ichakulya chochonye—chalinji achakulya chakwe wasimpepo watupu. 5Pamwi wuzye mutawazya mumasundo yakwe Musa kuno mumanda yakusolezya yonsinye wasimapepo wakachila isundo lyavyawanda wakusolezya mung'anda yakupepela, ukuwa naponye nanti kuti wawe numulandu? 6Ukuwa nkuwanena nkuti, paa palichimwi chino chakula chalusya ing'anda yakupepela. 7Amawaliko matele yakutanji, Nakunda inkumbu, inzuwi zyanyama pole. Nd'achino mwanga mumanye chino chonye-choo chikusula, mutanga muwasumbichila wano wasi numulandu. 8Amuno Umwanamuntu awili mweni wanda wakusolezya.

Umuntu wikasa kwinyane

(Marko 3:1-6; Luka 6:6-11)

9Yesu afuma paponye aya ayinjila mung'anda yawo iyakupepela. 10Momonye mwalinji umuntu wumwi wino wakwinyine ikasa. Momonye swinya mwalinji nawantu wamwi wano walondanga ukupa Yesu umulandu wakuchita chino chitayana; achaleka awamuwuzya awati, Wuzye achiwipe mwisundo litu ukupozya pawanda wakusolezya?

11Yesu awatotelela ati, Nga chili wuli ndiwumwi uwakwe mwemwe ing'onzi yakwe yaponela muchizinji pawanda wakusolezya? Wuzye atanga ayileme ayifumye mwenemo? 12Ngafwandi wuli umulawa wino walusya ing'onzi uwuzi! Acheleka fwandi, isundo litu lyatuzumilizya ukwavwilizya wumwi pawanda wakusolezya. 13Ngapano Yesu anena umuntu ati, Tambalika ikasa lyako.

Atambalika ikasa lyakwe, alipola, aliwa ichete ndivino iwuye. 14Ukuwa awa Falisi awafuma awakwamba ukuti wakome Yesu.

Umuwomwi musolwa nu Leza

15Yesu ala wamanya inkama yawo, afuntuka kweneko; awantu wavule awamukonka. Apozya awalwale wonsi, 16awasunda ukuti watize wamuwumbule kwewanji, 17alyakuti chino Leza wavwanjizile mumutumwa Ayizeya chifiswe ichakuti,

18Wee amuwomvi wane wino nati nsola,

ekankundwa wane, mwakwe wino nkusechela nkani.

Ndiwika Umuzimu wane peweliwe,

ayize awumbule ipanzyo lyane kuwantu wonsi.

19Ataliwa nimipanzi nanti akupundisya,

nanti akupunda nizwi kulu mumisolo.

20Atalikonyola itete fwantike,

nanti akuzimya umunyeta wuno wukusuka.

Alilanga alandalizile asuke alete umutende;

21nawantu wonsi wize wamusuwile.

E Yesu nu Belizabuli

(Marko 3:20-30; Luka 11:14-23)

22Ngapano awantu wamwi awatwalila Yesu umuntu wino walinji antonko swinya wiwi amuno walinji numuzimu wuwipe. Yesu apozya umuntunye weyo, awavwanga, awalola nukulola. 23Amawumba yonsi ayazunguka ayati, Wuzye nche atanga alange amwanakwe Davidi?

24Ukuwa awa Falisi awala wivwa awati, Chino chikuloleka kuno akufumya imizimu miwipe amuno kapanzya wawo e Belizabuli awino akumupa amaka yakuchitila wowonye.

25Ala Yesu wamanya amelengania yawo awanena ati, Uwufumu wonsi wuno wukapawunkana awuwalwisyania wusilandila. Nakaya konsinye nanti achiwanza chino chikayipawunkania achiwalwisyania chikasangana. 26Achaleka muwufumu wakwe Satana, ndi ichipya chonga chikulwisya ichiwuye, ye kuli ukupawunkana nukusalangana nanti kuzimba! 27Yesu ati, Mukuti nkuwinga imizimu miwipe muno Belizabuli awino akampa amaka yakuchitila wowonye. Aleni fwandi, ngamwenji weweni wino akapa awantu winu amaka yakuwinjila imizimu miwipe? Awantu winunye wano mukatungulula wapanichisya kuno mwewachawufi! 28Ng'o a Muzimu wakwe Leza awuno wukumpanga amaka yakuwinjila imizimu miwipe, chino chikupanichisya ukuti Uwufumu wakwe Leza walala wiza pakwe mwemwe.

29Pasi umuntu wumwi wino angamongola ing'anda yamuntu mukaza wane asende insawo yakwe nkandi ndiwatela wanyepa umukazawane: peni apano angonona ing'anda yakwe.

30Wino asi nani achipondo; nawino asinakukonganika nani ye akusampania. 31Achaleka nkuwanena nkuti: uluwembu lonsi numusamu vilitetelwa kuwantu; ukuwa ukusamula e Muzimu Mwimichile kutalitetelwa. 32Nawensi wino wiza wavwanjila Umwanamuntu uluwi alitetelwa; ukuwa wensi wino wiza wavwanjila e Muzimu Mwimichile uluwi atalitetelwa—nanti ampindinye yoo nanti ayino ikwiza.

Umuti nivikomwa vyakwe

(Luka 6:43-45)

33Ndi ukulonda ukuwa nivikomwa vizima, wazipila uwa numuti wuzima; ndi uli numuti wuwipe ungawa nivikomwa viwipe. Amuno umuti wukamanyichilwa kuvikomwa vyakwe, 34Mwenzoka-mwe—nga mungavwanga ivizima wuli pano mwewawipe? Amuno umulomo wukavwanga vino vili mumwezo. 35Umuntu muzima akafumya ivintu vizima mumboto yakwe inzima; numuntu muwipe akafumya ivintu viwipe munsawo yakwe imbipe,

36Nkuwanena choo nkuti, Pawanda wipanzyo umuntu wensi aliyiluwululila ivyamazwi yakwe ayavye yano wavwanga. 37Amuno ulipanzizwa kumazwi yakonye, uzanwe kuno usi nakasinza pamwi uli numulandu.

Awafalisi awalonda ukuti walole amayele

(Marko 8:11-12; Luka 11:29-32)

38Ngapano awasambilizya wisundo wamwi na wa Falisi awavwanga awati, Musambilizya, tukasi tulole kuno ukuchita amayele.

39Yesu apunda ati, Yee, wawipa wuli awantu wankulo yoo wano watamanya Leza! Nga mukumbuzizya ivyamayele chani? Nakana! Suka ndi achamayele yakwe Yona umutumwa. 40Amuno ndivino Yona wisile munda yanswi nkulu amanda yatatu ayamusanya nuwusiku, avino nu Mwanamuntunye aliyikala pansi mumusili amanda yatatu ayamusanya nuwusiku. 41Pawanda wipanzyo awantu wa ku Ninive waliwakatuchila wawalongole, amuno walanga wivwa ukuwila kwakwe Yona awatontolokwa kuluwembu lwawo; swinya nkuwanena nkuti panye paa pali ichintu chinji ichikulu ukulusye Yona, 42Pawanda wipanzyo imfumukazi alifumilila kambazwa ayize awakatuchile awalongole, amuno wapisile umusinzo azinguluka insi mbali kukwivwa imisambilizizye yamano yakwe Solomoni; nakanonzinye paa pali ichintu chinji, chino chakula chalusya nu Solomoni-nye!

Ukunyoka kwamuzimu wuwipe

(Luka 11:24-26)

43Ukuwa umuzimu wuwipe wukula wafuma mumuntu, awuwapita wukulungana mulumpalang'ang'a wukuvwamba amasyo yakupuza. Ukuwa ndiwapotwa ukuzana apakupuza, 44ngapano awuti, Nandi nyochele kung'anda yane kuno nafumilizile. Nga awula wanyochela kweneko awuya awuzana mulimya, amupyele amuyanie. 45Ngapano awupita awuya awusenda imizimu yinji munenulambali yino yawipisya yawulusya, ifika iyinjila iwakwikala mwenemo. Nga imyikalile yakupelechezya yamuntunye weyo iwipa ilusya niyakutalika. Avino chiliwa nakunkulonye yoo imbipe.

Enyina wakwe Yesu nawanyina

(Marko 3:31-35; Luka 8:19-21)

46Ala pano Yesu achili akuvwanga nawantu, enyina nawanyina awafika. Awimilila palonde, awalonda ukuti wavwange nu Yesu. 47Nga umuntu wumwi amunena ati, Lola, enyoko nawanyonko wimilile palonde, wakulonda ukuvwanga nawe.

48Yesu atolelela ati, Nga mayo weweni? Nawanawitu awaweni? 49Asonta ikasa lyakwe pawasambilizi wakwe ati, Lolani! Waa awali wamayo nawanawitu! 50Amuno wensi wino akuchita ukulonda kwakwe Tata wamwiyulu, awili mwanawitu, awili nkazi yane, awili mayo.

Currently Selected:

Mateyu 12: WWN82

Highlight

Copy