Mateyu 14

Imfwa yakwe Yohani kabatizya

(Marko 6:14-29; Luka 9:7-9)

1Impindinye yoyo e Herodi imfumu ya mu Galileya, ayivwa ukulumbililwa kwakwe Yesu. 2Anena wasongo ati, Wee we Yohani-nye ekabatizya wazyulupuka kuwafwe. Achaleka amaka yakwe wamuzimu yakuchitwa mwakwe weliwe.

3Amuno Herodi wakomelezizye ukuti Yohani alemwe, amunyepa amuwika mung'anda yavingololo. Wachisile wowonye muno we Herodiya, emuka Filipu umunyina. 4Muno Yohani kabatizya wamunenanga akuti, Chisi achizima ukumutwala! 5Herodi walondanga ukuti akome Yohani, ukuwa atina awa Yuda, amuno watanji Yohani amutumwa.

6Ukuwa awula uwanda wankwatwa yakwe Herodi wafika, umwanakwe Herodiya umwana-mwanachi awachina muluwungo. Herodi asechela nkaninye 7achaleka walayilizizye nkaninye mbali nichilapo ukumupa chonsinye chino walonda!

8Walile waya wivwa chino nyina walondanga aya alenga ati, Mpa kanonzinye kaa umutwe wakwe Yohani kabatizya mulweso!

9Imfumu iwa namalanda, ukuwa muno akulayilizya kuno walayilizizye pankolelo pakwe wonsi wano wisilwe, 10atuma awaya awaputula umutwe wakwe Yohani mung'anda yavingololo muno walinji. 11Umutwe wakwe awutwalwa palweso awupwa kumukazyana, nawe awutwala kwenyina. 12Awasambilizi wakwe Yohani awaya, awasenda ichala, awamuzika; nga awaya awalongola kwe Yesu.

Yesu alela awantu imyanda ikumi impindi zisano (5,000)

(Marko 6:30-44; Luka 9:10-17; Yohani 6:1-14)

13Yesu ala wivwa amazwinye yaa, afuntuka kweneko apita muwato aya kumayonde ukuvwame. Ayala amawumba yivwa, awasya atwaya twawo, awamukonka awapita pansi. 14Yesu afuma muwato, alola iwumba kulu ichilanda achimulema mumwezo, apozya awalwale wawo.

15Amanguzi yayonye awasambilizi wakwe awaya kweweliwe awati, Kwila nakoo amumayonde. Leza awantu wapite mutwaya wakayikalile ichakulya.

16Ukuwa Yesu awanena ati, Watanga wapite, Mwemwenye wapani ichakulya walye.

17Awamutolelela awati, Swenji tuli nimisumba yisano ninswi ziwili.

18Yesu ati, Ndetelani vyovyonye koo. 19Anena amawumba ukuti yikale pansi pisote; atola imisumba yoyo yisano ninswi ziwili, apunamila mwiyulu apepa kwe Leza. Amenyania apa awa sambilizi nawo awapa awantu. 20Awalya wonsi awikuta. Awasambilizi awasenda vino awantu walile avisyala imise ikumi nayiwili. 21Wano walile kwela walinji imyanda ikumi impindi zisano (5,000) nanti kuwazizya apaliponga nawanachi nawana.

Yesu apita paminzi

(Marko 6:45-52; Yohani 6:15-21)

22Yesu apimpizya awasambilizi wakwe ukuti winjile muwato, wakolele kumbalama kwesumbi, muno weni wasyazile akunena awantu ukuti wasalangane. 23Ala wanena amawumba yapita, akwela mumwamba palwakwe aya mukupepa. Akula kwila, alanga ali wenganye kweneko; 24pampindinye yoyo uwato watezile wuli apatalinye mwesumbi, wasunchilanga kumang'wimbi, amuno ichimuza chawalesyanga ukupita. 25Kumachacha mwepwi, Yesu aya kwewoliwo, alanga akupita paminzi. 26Awala awasambilizi wamulola akupita paminzi awatina kutaluvile. Awati, Achitumbu! Awakuta iyapamutwe muno antete.

27Ukuwa Yesu awavwanzya zuwazuwa ati, Anene, mutatina!

28Peter asimpuka avwanga ati, Mfumu, ndinawuzyenye awewe, nena njize kwewewe paminzi.

29Yesu amutolelela ati, Zanga! Achaleka Peter afuma muwato awapita paminzi akuya kwe Yesu. 30Ukuwa ala walola ichimuza, atina, atalika ukusiwila muminzi. Apunda ati, Mfumu, ntula.

31Yesu afika ati nukutambalika ikasa lyakwe amulema ati, Oko wewisuwilo tichi-we! Ngamuno chani chino ukuvwilika?

32Awinjila muwato wonsi, numuza awutekana. 33Awasambilizi wano walinji muwato awafukamila Yesu awati, Awenche we mwanakwe Leza!

Yesu apozya awalwale mwe Genesareti

(Marko 6:53-56)

34Awala walamba sumbi waya kunsi ya Genesareti, 35kuno awantu wayile awamumanya. Achaleka awatuma munsinye yoyo iyamumbalama ukuti awantu wano walwile watwalwe kwe Yesu. 36Awamulambilizya ukuti sivyo azumilizye awalwale wakumvye nanti amuko wamwinjilo wakwe wutupu; wonsi wano wakumvizye awapola,

Currently Selected:

Mateyu 14: WWN82

Highlight

Copy