Mateyu 11

Intumi zyakwe Yohani Kabatizya

(Luka 7:18-35)

1Ng'ukuti pano Yesu wamala ukukomelezya awasambilizi wakwe ikumi nawawili, afuma kweneko aya kukuyasambilizya nukuwila imbila nzima mutwaya twawo.

2Lelo Yohani Kabatizya walile wivwa mung'anda yavingololo imilimo yakwe Klistu, atuma awasambilizi wakwe wamwi kwe Yesu, awamuwuzya awati tunene. 3Wuzye awemuntu Yohani watili ukwiza, pamwi tuwalolela winji?

4Yesu atolelela intumi zino Yohani watumile ati, Pitanji mukanene Yohani ivintu vino mukwivwa swinya vino mukulola. 5Intonko zikupochelela ivyeni vyawo, wachikonta wakupita, awamambombo wakutelefwa, nawakutwi wakwivwa, nawafwe wakuzyulupulwa, nawasaluke wakuwililwa ilandwe zima. 6Awalongo awino atandi awazana ichakumupunuzya mwakwe nene!

7Awala wawo wapita, Yesu atalika ukunena amawumba ivyakwe Yohani ati, Nga mulumpalang'ang'a mwayile kwe Yohani mukutamba chani? 8Wuzye alisote lino umuza wukayingania? Wuzye mwayile mukutamba umuntu wino wazwite ivizwalo vinji? Awantu wano wakazwala ivyamwatanye wowo wakakwikala mumasano yazyamfumu. 9Aleni ngafwandi mwayiletamba chani? Wuzye mwayile mukulola umutumwa? Ukuwa nachawuzimanye, nkuwanena nkuti — mwaweni wino wakula walusya numutumwanye. 10Amuno e Yohaninye awino yawalichilwa yati, Imfumu e Leza wavwanga wati, Intumi yane yoo yino ndituma pankolelo pakwe wewe kukukumila inzila. 11Yizukanji chonye-choo! E Yohani Kabatizya wakula walusya wonsi wano walinji-po kali. Ukuwa wino amutichi mu Wufumu wamwiyulu awino wakula wamulusya. 12Ukufumilila pampindi yino Yohani wumanga imbila yilandwe zima ukufika nilelo Uwufumu wamwiyulu wukalwiswa nkaninye, nawantu wawipe wakalonda ukuwulema. 13Amuno amasundo yakwe Musa nawatumwa wonsi ukwizafika pampindi yakwe Yohani, wavwanganga ivya Wufumu wamwiyulu; 14achaleka ndimukulonda ukusuwila amazwi yawo, e Yohani-nye awili Eliya-nye, wino watanji aliyiza. 15Achaleka yivwani ndimuli namakutwi yakwivwila!

16Nga nayikolania nachani inkulonye yoo? Yakolana nawana wano wisile pamasyo yakukazizya. Iwumba lyonga likupunda awawuye likuti, 17Twawimbilizile ulwimbo lwawinga, ukuwa nanti kuchina! Twawimbilizile indwimbo zyamalosyo, ukuwa mutatela mulile! 18Amuno Yohani wizile nanti kuti awalya nanti akung'wa ipala, awantu wonsi awati, Ali numuzimu wuwipe! 19Umwanamuntu wizile awalya nukung'wa, awati, Lolani umuntu mumilichisye, eching'wipala, echiwuza wawasanguzi nawawembu! Ukuwa naponye amano yakwe Leza yalanjizwa mumilimo yakwe kuno ayakusimichila.

Utwaya tuno tutalinji nisuwilo

(Luka 10:13-15)

20Ngapano Yesu atalika ukukalipila utwaya tuno wachisile mwenemo ivizungusyo vyakwe ivikalambane, amuno awantu wamutwayanye toto wakanile ukutontolokwa kuluwembu lwawo. 21Ye, chilikuwipila wuli, we Korazini! Nawenye oko, we Betisaida! Ndachino ivyakuzungusya vino vyachisilwe mwakwe mwemwe vyanga vichitwe mu Ture na mu Sidoni, awantu wamwenemo ngali watontolosilwe kali awazwala amasanko, awayikunchila nitoyi awayilanjizya ukutontolokwa kuluwembu lwawo! 22Achaleka yizukanji, ukuti Leza alifwila Ture nu Sidoni inkumbu pawanda wipanzyo ukulusye mwemwe! 23Nawe, we Kapemahumi! Wuzye walondanga ukukula ukuti ufike mwiyulu? Ulisumbilwa pansi mwilungu lyamulilo! Ndachino ivyakuzungusya vino vyachisilwe mwakwe wewe vyanga vitele vyachisilwe mwe Sodomu, ngali akaya kakwe Sodomu kanga kalange kalipo ukufika nilelo! 24Achaleka fwandi yizukanga, kuno pawanda wipanzyo Leza alifwila Sodomu inkumbu ukulusye wewe!

Zanji kwenene mwandi mwize muzane ukupuza

(Luka 10:21-22)

25Pampindinye yoyo Yesu ati, Tata, Mfumu yamwiyulu namunsi! nkukusalifya amuno wafisile ivintunye vyoo kuwamano nakuwasambilile, ukuwa wavilanjizya kumintasambilila. 26Awenche, Tata, wachisile ivintunye vyoo nukulonda kwako ukukulu.

27Vyonsinye vyoo we Tata wampa, Pasi wumwi wino wamanya Umukwasi suka ndi a Mwana, nawensi wino Umwana walonda ukumuwumbulila.

28Zanji kwenene mwensi mwewantu mukukuwantika swinya mwang'wamilwa, nandi njize mbape ukupuza. 29Sendani ichikonkoli chane, swinya musambilile kwenene, amuno nechimyamya swinya newakuyichefya mumwezo; mwandi mwize muzane ukupuza. 30Amuno ichikonkoli chino nandi njize mbape, chitatala, nichisendo chino nandi njize mbatwike chapepuka.

Currently Selected:

Mateyu 11: WWN82

Highlight

Copy