3 John 1
1
1E kalata wee wawalisilwe nusongo wi Klezia.
Kwe Gayi umukundwe wane, wino nakundisya numwezo wonsi.
2Mukundwe wane, nkukupepela ukuti ivintu vyonsi viwapita ichete, swinya uwakwizya ulumi-ndi—vino nakumanya kuno wemusuwilwa mumuzimu, 3Nasechezile kutaluvile pano awanawitu wamwi wizile awavwanga ivyisuwilo lyako ilyakusimichila-ndivino ukakwikala mukusimichila penye. 4Pasi chimwi chino chikunsechelesya ukulusye ukwivwa kuno awanane wakwikala mukusimichila.
Ukuwanzwa kwakwe Gayi
5Mukundwe wane, wemusuwilwa nkaninye mumulimo wako wuno ukupyunjila awanyonko, naweninye. 6Wavwanga ivyalukundo lwako namwi Klezia lyachiwanza chako. Nkukulambilizya ukuti ulandalile ukuwavwi izya mumusinzo wawo nu Leza akunde. 7Amuno umusinzo wawo wuno wakatuchizile walinji awamulimo wakwe Klistu awalanga wakukanuzya ukupochelela ukwavwa kumintamanya Leza. 8Achaleka fwandi swenji, swe wa Klistu, twazipila ukwavwa awantunye waa, alyakuti twavwane nawo apaliponga mu mulimo wakusimichila.
E Diotrefesi no Demetriosi
9Nawalisile kalata mutichi kwi Klezia; ukuwa Diotrefesi, wino wakunda ukuwatungulula, asipechela chino nkutaka. 10Achaleka ndiniza niza, ndiyiza mvwange vyonsi vino wachita: ivintu vyakutinia vino watuwipizya! Ukuwa visi avyonye-vyoo ampela; swinya asipochelela awana witu ndiwafika, swinya akalesya nawano waka londa uk uwapochelelanye awalonda nukuwawinga mwi Klezia!
11Mukundwe wane, utize uwakonka iviwipe, ukuwa uwakonka chino chiyine. Wensi wino akachita ichete awakwe Leza; nawensi wino akachita uwuwi atalola Leza.
12Awantu wonsi wakavwanjila Demetriosi ichete; molimonye amuzima. Naswenye tukupanichisya wonye-woo, nawewenye umanyile kuno chino tukuvwanga achakusimichila.
Amazwi yakupelelechezya
13Indi nivintu vivule ivyakukunena, ukuwa nsinakulonda ukukuwalichila nakawalichilo nuwizyo. 14Ukuwa nkulondesya ukwiza kulola kanonzinye, ngatwize tuvwanzyanie ichilungampumi
15Umutende wuwe nawe.
Iviwuza vyako vyonsi wakulamuka. Lamuka iviwuza vitu vyonsi uwawataka amazina.
Currently Selected:
3 John 1: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.