Hebrews 13
13
Ukusechelesya Leza
1Kundananji amuno mwewanyina mwakwe Klistu, 2Pochelelanji aweni mung'anda zinu. Amuno mumwatanye woo wamwi wapochelezile awangeli ichintamanyilika. 3Yizukanji awakungwe, muwawa ngati namwe mwewakungwe apaliponga nawo. Yizukanji wane wakuyimba, muwawa ngati mukuyimba nawo apaliponga.
4Itwala lyazipila alichindikwa nawantu wonsi, nawo awalume nawachinye wazipila ukusuwilana. Leza alipanzya awazelele nawano wakachita uwuzelele.
5Fumyani imyezo yinu kukukundisya indalama, muwatima navino muli navyo. Amuno Leza wavwanga wati, Ntalitela nkusye; ntalietla nkulechelezye. 6Achaleka lekani tuvwange ninsimpo tuti,
Imfumu wekavwa wane, ntandi ndatina.
Nga umuntu nawe anganchita chani?
7Yizukanji wano walinji antunguluzi zinu kali, wane wawawililanga Ilandwe lyakwe Leza. Muwakwelengania imiwele yawo nimfwa zyawo, amuwa ndivino walinji. 8E Yesu Klistu awiliwenganye iyolo, nilelo, nape-nape. 9Mutize muwaleka imisambilizizye yamisango-misango iyize iwasovye iwafumye munzila nzima. We Leza-nye munkumbu zyakwe awino akawomya imizimu yitu. Ukutontela amasundo yakuvyakulya akwavye; wonsi wane wakatontela amasundo yamwatanye woo yasiwafungulila chimwi.
10Wasimapepo wachi-Yuda wane wakapyunga mwihema wasilya inzuwi yimwi yino ikakochelwa pakavuwa kitu. 11E simapepo mukulu uwachi-Yuda akatwala uwazi wanyama mumasyo matele nkani aya afima inzuwi zyakuluwembu; ukuwa inyama zyeni azyochelwa kunzi yankambi. 12Muno achochonye nu Yesu-nye wafwizile kunzi yampongolo, alyakuti aswefye awantu kuluwembu nuwazi wakwe. 13Achaleka aleni fwandi, tufumile kunzi yankambi tukawe ninsoni apaliponga nawe. 14Amuno munsi moo mweni tutawa nakaya kamuyayaya; tuchilili tukalolela akaya kano kangiza. 15Achaleka aleni fwandi, tuwatumvya Leza azili nzuwi zitu mwakwe Yesu, inzuwi zyamilomo yitu yino tukawumbulila izina lyakwe, 16Mutize muwakwiwilila ukuwa nuluse mbali nukwavwana, amuno inzuwi zyamwatanye ndi-woo azino zikasechelesya Leza.
17Tontelanji wanankolelo winu muwatontela uwutunguluzi wawo. Amuno walasikwa kukutesya ivyamyezo yinu nanti kupuza, amuno waliya wakayiluwululile imilimo yawo kwe Leza, Nachino mukuwatontela wangawomba umulimo wawo nichimwemwe; ukuwa ndimwakana wangawomba namalanda, nanti kuti chiyane kwemwemwe.
18Tupepelanji. Amuno tukusimichila kuno tuli nintwitwi nzima, muno tukalonda ukuchita vino viyine impindi zyonsi. 19Swinya nkunyochelela ukuwalambilizya ukuti muwapepa alyakuti Leza ayize anyosye kwemwemwe zuwa.
Ipepo
20E Leza wazyulupuzile Imfumu yitu e Yesu, umuchemi mukulu uwang'onzi muno amfwa yakwe, yino yalesile ilayano lintasila. 21Sivyo e Leza wamutende awapa mwemwe ivintu vizima vyonsi vino mukalonda alyakuti muwachita ukulonda kwakwe, nga mwakwe Yesu Klistu, achita mwakwe sweswe chino chingamusechelesya. Uwukankala wuwe kwakwe weliwe umuyayaya! Amen.
Amazwi yakupelelechezya
22Wanawitu, nkuwalambilizya ukuti muwatekana pakwivwa amazwi yakuwawomesya; amuno ekalatanye wee wino nawawalichila asi amutali nkani. 23Nkasi ukuti mumanye kuno umwanawitu e Timoti wafuma muvingololo. Ndachino wangufya wiza, ndiyiza nawe pano niza mukuwalola.
24Tulamuchilani wanankolelo winu apaliponga nawantu wakwe Leza wonsi. Awanawitu wane wafuma ku Hale wakuwalamuka.
25Sivyo e Leza awalole ninkumbu mwensi.
Currently Selected:
Hebrews 13: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
