Hebrews 9
9
Imipepele yamunsi nimipepele yamwiyulu
1Ilayano lyakutalika lyalinji namasundo yakupepela swinya namasyo yakupepela yano awantu wazenganga. 2Wazenganga ing'anda yihema, ihema lyakulonde, lino lyitwanga ilyakuwunganila kweneko. Mwenemo mwawanga inyale, itebulo, nichakulya chino wafimilanga Leza. 3Kunsizi yachakuchinga chachitiwili kwalinji ihema lino Iyitwanga amasyo matele nkani. 4Mwenemo mwawanga akavuwa kakwe golide akakochela uwubani, swinya mwawanga nimbokosi yamasundo yilayano, intakasizwe nugolide. Mumbokosi mwikalanga ulweso lwakwe golide namana mwenemo, ninsonzo yakwe Eroni yino yafunduzile imfundwa zyamafwa, namawe yawiliyano pawalisilwe amasundo penepo. 5Napo pambokosi papela palinji ivitumbulwa vyakuchindama ivyakulanjizya kuno Leza alipo, vino vyakunzuluzile amapa yawo pamasyo yakutetelela uluwembu. Ukuwa kanonzi yoo isi ampindi yakulondolola chongachonga.
6Moo amuli muno ivintu vyayanizizwe. Wasimapepo wakakwinjila mwihema lyakulonde amanda yonsi ukuwomba imilimo yawo; 7ukuwa esimapepo mukulu weni akakwinjila mwihema lyamukasi, lyonga mumwaka. Akasenda uwazi wakufima kwe Leza muno aluwembu lwakwe nuluwembu lwawantu luno wachitanga ichintamanyilika. 8Mwakwe vyonyevyoo amuno Muzimu Mwimichile akasambilizizya ukuti inzila yakwinjilila mu masyo matele nkani itani iyiyuke amuno ihema lyakulonde lichili Iyimilile. 9Chonye-choo achili chimanyilo chakulanjizya impindi yakanonzi. Chikusula kuno ivyawila vyanzuwi yazyanyama vino wakafimila Leza vitanga viswefye umwezo wakwe kapepa. 10Vyeni avyakuvyakulya vitupu, nivyakungwa, nimisango-misango iyakupwizizya. Vyonye-vyoo amasundo yakunzi kumuwili, yeni ayampindi yino Leza atani apilule ivintu vyonsi.
11Ukuwa kanonzi Klistu wiza kali wino wesimappeo mukulu awavintu vyonsi ivizima vino vikuloleka. Ihema lino akapyunga mwenemo lyakulisya lyachindama lyalusya; Iyeni litazengwa nawantu, kuno akulikuti lizi alyamunsi moo. 12Walile pano Klistu winjila mwihemanye lyolyo walazile winjila mumasyo matele nkani lyonganye yawili pole, weni atatela asende uwazi wambuzi nanti awazi wawanang'ombe uwakufima inzuwi; ukuwa, wasenzile uwazi wakwenye ukuti akatupochelelele itulwa lyamuyayaya. 13Uwazi wambuzi nuwankambaku nitoyi lyamwanang'ombe wino wocha vikasansilwa pawantu wane wakombela kukuwaswefya kukukombela kwawo. 14Ngafwandi vino nacho choo achakusimichila, nga uwazi wakwe Klistu weni walutilizya wuli? Chisi chakutaka-nukutaka! Mumaka yakwe Muzimu wamuyayaya wayifimile nalwakwe kwakwe Leza ukuti awe anzuwi yakusimichila, ukuti uwazi wakwe wutuswefye kumilimo miwipe yonsi, alyakuti tuwapakata Leza mumi.
15Muno achonye-choo, e Klistu-nye nalwakwe awino wayania ilayano-pya, alyakuti wonsi wane witwa nu Leza wize wapochelele uwumi wamuyayaya wuno-Leza walayilizya. Wize wawe nuwumi wamuyayaya muno amfwa yakwe Klistu wino wakomola awantu kukuwifya konsi kuno wachisile pane waposilwe ukutontela mwilayano lyakutalika.
16Kuno kuli ilayano lyawupyani, umuntu angapyana ndi wino walayilizizye ilayanonye lyolyo wafwa. 17Amuno ilayano lyawupyani lisi nachimwi ndi umwenecho achili amumi; uwupyani wukachitwa ndiwino walayilizizye wafwa. 18Achino nilayano lyakutalika lyawomizwe nuwazi. 19Pakutalika Musa wanenile awantu amasundo yonsi, yano yawalisilwe. Ngapano asenda uwazi wandama, apaliponga naminzi akanyila kwekalata wamasundo nawantu wonsi nimbozyo nichifuti chameya mawenzu-che. 20Ati, Woo awazi wuno wawomya isundo lino Leza wawasunzile ukuti muwalitontela. 21Mumwata uwuliwonga Musa wasansizile uwazi kwihema napavintu vyonsi vino vyawombelwanga pamapepo. 22Molimonye, nditwalolechesya amasundo, kwela ivintu vyonsi vikaswefwa nuwazi; nuluwembu nalo lusitetelwa suka ndi uwazi wazwiswa.
Inzuwi yakwe Klistu ayino ikafumya uluwembu
23ivintunye vyoo, vino avimanyilo vyamiwele vyakutalichila vyamwiyulu, vyaswefizwe mumwatanye ndi woo. Ukuwa ivintu vyamwiyulu vyeni vikalonda inzuwi ndusye. 24Amuno Klistu atatela aye mumasyo matele yano yazengwa namakasa yawantu, yano yakolana namasyo-masyo awowo. Weni wayile mwiyulunye, muno nilelonye lyoo akaloleka pankolelo pakwe Leza muno asweswe. 25E simapepo mukulu wachiYuda akwinjilanga mu masyo Matele lyonga mumwaka nuwazi wanyama. Ukuwa Klistu weni atetela aye mwenemo ukuti ayifime impindi mvule; 26amuno yefwandi wanga alange akayimba impindi mvule ukufumilila pano insi yalile itumbulilwa. Ukuwa, kanonzi walolesile lyonganye-nsu yawili pole, pampindi yino ivintu vyonsi vyati vyasila, alyakuti afumye uluwembu ninzuwi yakuyifima kwakwe. 27Umuntu wensi akafwa lyonga, ngapansizi aya apanzwa nu Leza. 28Wowonye, avino nu Klistu wafimilwe inzuwi lyonganyensu kukufumya uluwembu lwawavule. Aliloleka swinya impindi yachitiwili, kuvyaluwembu pole, ukuwa kuwizafyusya wano wakamulindilila.
Currently Selected:
Hebrews 9: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
