Hebrews 10
10
1Amasundo yachi-Yuda yatakolana nkani-nkani namasundo yenecho. Avizyungani vitupu ivyavintu vino viliyiza. Inzuwi izilizyonganye zyafimilwa lyankani, mumwaka numwaka. Ngafwandi nayo amasundo, yangaswefwa ninzuwi wuli, awantu wane wiza kwe Leza? 2Ndachino awantu wane wakapepa Leza watele waswefizwe kuluwembu lwawo, watanga wawe nintwitwi zyaluwembu swinya, ninzuwi zyonsinye ngali zyasila. 3Ukuwa kanonzi, inzuwi achizusyo chakwizusya awantu uluwembu luno wakachita, umwaka-numwaka. 4Amuno uwazi wankambaku nanti awambuzi wutanga wufumye uluwembu.
5Muno achonye-choo, achino pano Klistu wati awakwiza munsi wanenile Leza ati,
Wenji usilonda inzuwi nivyakufima,
ukuwa wanjanizya umuwili.
6Usisechela ninyama zino zikakochwa impuma pakavuwa,
nanti akusechela ninzuwi zyakufumya uluwembu.
7Apano inti, Ne-waa, Leza,
kukuyachita chino ukulonda nchite,
ndimuno chawalichilwa ivyane mwekalata wamasundo.
8Pakutalika watili, Usilonda nanti akusechela ninzuwi nivifimwa, nanti anyama zino zikakochwa impuma pakavuwa nanti anzuwi zyakufumya uluwembu. Wavwanzile wonyewoo chingatenga inzuwinye zyoo nivifimwa avino vikachitwa ukulingana namasundo. 9Anyoka ati, Ne-waa, Leza, kukuyachita chino ukulonda nchite. Achaleka Leza wafumizye inzuwi nkali ayimika inzuwi yakwe Klistu ayino ipyanila. 10Amuno Yesu Klistu wachisile chino Leza walonzile ukuti achite, swensinye twaswefwa uluwembu lwitu muno anzuwi yamuwili wakwe Klistu twalala twaswefwa twalufuma.
11Wasimapepo wachi-Yuda wonsi wakakwimilila nukupyunga amanda yonsi awalanga wakafima inzuwi izilizyonganye impindi mvule. Ukuwa inzuwinye zyozyo zitanga zifumye uluwembu. 12Ukuwa Klistu weni, wafimile inzuwi yakuluwembu yonganye-nsu, inzuwi nzima iyamuyayaya, waya wikala kwikasa lyandilo ilyakwe Leza. 13Kokonye akuno akalindilila ukuti Leza asuke ayize aleke awalwani wakwe wawe avilyatilo vyamatamba yakwe. 14Amuno ninzuwi yonganye-nsu, walala wafisya napakafiko wonsi wane waswepa kuluwembu lwawo.
15Nu Muzimu Mwimichilenye watupanichisizya. Wavwanga wati,
16Lyoo alili layano lino ndilayana nawo
mumanda yano yakwiza, avino Imfumu yataka
yati, Ndiwika amasundo yane mumyezo yawo,
njawalike mumitwe yawo.
17Swinya wanyoka wati, Ntalitela njizuke uluwembu lwawo nuwuwipe wawo swinya, 18Achaleka ndivyonye-vyoo vyatetelwa, fwandi ye inzuwi yakusenda uluwembu isi numulimo.
Tuyani tupalamile kwe Leza
19Achaleka fwandi, wanawitu, tuli nuwanangwa wenecho uwakwinjilila kumasyo matele nkani muno amfwa yakwe Yesu. 20Wino watwiyulila inzilampya, inzila yawumi, iyakupitila muchakuchinga—kuno akuli kuti, mumuwili wakwe. 21Tuli nusimapepo mukulu ekasunga wang'anda yakwe Leza. 22Tuyani tupalamile kwe Leza, nimyezo yitu yonsi mbali nisuwilo lyakusimichila, swinya nimyezo yino yaswefwa kuluwembu nanti ntwitwi, nimiwili yino yapwizwa naminzi masengame. 23Lekani tulemasye ukulolela kwitu nisuwilo chikale chit-ndi, amuno twasuwila kuno Leza akafisya ilayilizyo lyakwe. 24Tupechelane nukupechelana, tuwakwavwana nukukundana tuwachita ivizima. 25Tutize tuwalechelezya ukuwungana apaliponga ndivino wamwi wakuchita, tuyani tuwachinchizyania nkaninkani amuno mwalola kuno uwanda wakwiza kwa Mfumu wapalamila.
26Amuno kusi inzuwi yinji swinya yino ingafumya uluwembu ndi twalanga tulandalizile ukuwembuka umwenzo napano twatela twamanya ukusimichila. 27Ukuwa, chino chatusyalila akuwa nintete kwakwe vino vilipona; ipanzyo numulilo wakutinia wuno wulilovya wonsi wano wakana Leza! 28Wensi wino wakana ukutontela amasundo yakwe Musa, wazipila imfwa nanti luse lumwi, ndi wasindwa kwipanzyo namazwi yakwe wakalola wawili pamwi watatu. 29Ngafwandi kwewino wakana ukutontela Umwanakwe Leza chingawa wuli? Chisi chakutaka! Wino wasula uwazi wilayano lyakwe Leza wuno wamuswefizye kuluwembu lwakwe? wino akakwelengula e Muzimu wankumbu? Weyonye ukusundwa kwakwe kuliwa akwamipamba! 30Amuno twamanya wino wavwanga wati, Ndichita ichilanduzi, ndandule; wino swinya wanyosile ati, Imfumu ilipanzya awantu wakwe. 31Achintu chamanzi ukuponela mumakasa yakwe Leza mumi!
32Yizukani chino chawaponezile kali. Mumandanye yayo, pano ukuwala kwakwe Leza kwawawalizile, mwayimbanga impindi mvule, lelo naponye mutatela muchimbe kukulwiswa. 33Mpindi zimwi mwakwelengulwanga paminso yawantu amuchitwa mwalwe, swinya mpindi zimwi mwalondanga ukuyayisanzya kwewano wachitwanga uwuwi wowonye. 34Mwalwetelanga awakungwe, napano insawo yinu yaposilwe naponye mwapupuzizye nichimwemwe chonsi, amuno mwamanyile kuno naponye mwalinji nivizima nkani ukulusye vyovyo, vino vingalandila. 35Mutize muwasumba ukusinga, amuno ukusinga kweni kukaleta ichilambu chikulu. 36Muwazizimichizya, alyakuti muwachita ukulonda kwakwe Leza ngamwize mupochelele chino walayilizizye. 37Amuno Amawaliko Matele yavwanga yati,
Amuno impindi ntichi ndikwazimba katichi,
apano weyo wino aliyiza alila ale ayize; nanti kuzimba.
38Ukuwa kweni, awantu wane
awatele walisuwila wize wawe nuwumi;
ukuwa ndiwumwi wiza wafutata, ntalisechela nawe.
39Tusi swewantu wano wangafutata wasowe. Ukuwa, tuli nisiwilo twatulwa nukutulwa.
Currently Selected:
Hebrews 10: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
