Hebrews 8
8
E Yesu wesimapepo witu umukulu
1Ichikulu nkani pakwe vyonsi achoo: tuli nusimapepo mukulu wee, wino wikala kwikasa lyandilo ilyandulu ya Mukalasya Imfumu yamwiyulu. 2Awili simapepo wakupakata mumasyo mimichile nkani, mung'anda yihema lyenecho lino Imfumu-nye nalwakwe wazenzile, umuntu pole.
3Wasimapepo wakulu wonsi wakason twa kukufima ivyawila vyanzuwi zyanyama kwakwe Leza; achaleka fwandi nusimapepo witunye umukulu wazipila ukuwa nachimwi ichakufima. 4Ndachino alange awamunsi moo, ngali asi wesimapepo nanti katichi, amuno munsi muli wasimapepo wane wakufimanga ivyawila ndimuno isundo lyachi-Yuda lyayila. 5Umulimo wawusimapepo wuno wakawomba wuli ngati achizyungani chavye chakwe vino vili mwiyulu. Avino nu Musa-nye wachisile. Walanga pano Musa wati awalonda ukuzenga ing'anda yihema, Leza amunena ati, Upanichisye uchitile ndimuno walolezile chino walanjizizwe pamwamba. 6Ukuwa Yesu weni wapwa umulimo wawusimapepo wuno wakulisya walusya uwusimapepo wawo, ndivino ilayano lino wachisile pakwe Leza napawantu lyazipa lyalusya, muno lyeni lyimilila pavizima vilusye.
7Ndachino ilayano lyakutalika litele litalinji nakasinza kamwi, ngali kutalinji ilyachitiwili. 8Ukuwa Leza wasumbichizile awantu wakwe numulandu pano watili,
Imfumu yavwanga yati, Amanda yaliyiza,
pane ndilayana ilayano-pya nawa Israeli, nawamwiko wakwe Yuda.
9Lyeni litalikolana nilayano lino nalayine nawayisikulu
pawanda wuno nawalemile ikasa mbakolelela mbafumya mu Ijeputi.
Wakanile ukupechela ilayano lino nalayine nawo,
achaleka Imfumu yati, Nani ntawapechezile.
10Kanonzi, lyoo alili layano lino nandindayane
nawa Israeli mumanda yano yandi yize, avino Imfumu yataka.
Nandi mbike amasundo yane mumitwe yawo,
njawalike mumyezo yawo. Imbe ne Leza wawo
nawo wawe awantu wane.
11Pasi wumwi pakwe woliwo wino aliwasambilizya umuwuye,
nanti akumunena ukuti,
Manyani Imfumu.
Amuno wonsinye-pyu walimanya nene,
awatichi nawasongo.
12Indiwa nuluse kuvyakutinsyania kwawo,
nanti kupechela uluwembu lwawo luno wachita.
13Walile pano Leza wavwanga ivyilayano-pya, aleka ilyakutalika aliwa alyavye; nichintu chonsi cheni chikakota swinya achinyankantuka chikazimanjika nanti kuzimba.
Currently Selected:
Hebrews 8: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
