Hebrews 7
7
E Melkizedeki esimapepo
1E Melkizedeki-nye wee walinji amfumu ya Salemu swinya we simapepo wakwe Leza wamwilewelewe. Weyonye awino wasunkinie Abrahamu pane wanyokanga kwisumo lino wakomile izyamfumu, amupepa. 2Amupa ichikumi chonga pakwe vyonsi vino wasenzile. (Ukusula kwakutalika ukwizina lyakwe Melkizedeki akuli kuti, Imfumu yawulungamane. Ngaswinya muno walinji amfumu ya Salemu, swinya izina lyakwe likusula, Imfumu yamutende.) 3Melkizedeki weyo awakwasi wakwe watamanyikwa, nanti awayisikulu nawanyinakulu; inkwatwa yakwe nanti amfwa yakwe vitamanyikwa. Weni wakolana numwanakwe Leza; weni wesimapepo wape.
4Achaleka mwalola uwukulu wakwe vino wuli. E tatakulu e Abrahamu wamupile ichikumi chavintu vyonsi vino wasamfile mwisumo. 5Ikwata lyakwe Levi wane awali wasimapepo wakomelezwa nisundo ukupochelela ichikumi kuwa Israeli—akuli kuti, wakupochelelanga kuwantu wamunsi yakumwawo, chingatenga nawonye alikwata lyakwe Abrahamu. 6Chingatenga e Melkizedeki atalinji awamwikwata lyakwe Levi, walesile Abrahamu amupa ichikumi chonga apano apepa wino wapochelezile amalayilizyo yakwe Leza. 7Wino akapepa umuntu muwuye wakula walusya wino akapepwa. 8Kuvyakwe wasimapepo kweni, wane wakafwa awano wakapochelela ichikumi; ukuwa Melkizedeki weni, ichikumi chino chapilwe kweweliwe chapochelezilwe numuntu wino atanga afwe, ndimuno Amawaliko Matele yavwanjila. 9Tungati, pano Abrahamu wafimile ichikumi, nu Levinye (wino ikwata lyakwe likapochelela ivyikumi) wafimile. 10Amuno Levi wachilinji ukukwatwa, achino tungati walinji mumuwili wakwe yisikulu e Abrahamu pano Melkizedeki wamusunkinie.
11Awa Israeli wapilwe amasundo pano awina-Levi walinji awasimapepo. Achaleka fwandi ndachino wasimapepo wawina-Levi walange wafisile pakafiko, kutanga kulondwe ukuti simapepo wamwata wunji ayize, esimapepo wino awamwata wakwe Melkizedeki, uwakwe Eroni pole. 12Amuno ndi uwusimapepo wapilulwa, namasundonye yakapilulwa. 13Ukuwa Imfumu yitu, wino vyonyevyoo vikutaka, walinji awamwiko wunji; nuwaluko lwakwe wumwi atatela awombe umulimo wawusimapepo pakavuwa. 14Chamanyikwa kuno walinji awamwiko wakwe Yuda; nu Musa-nye atatela atake uwusimapepo wamumwikonye woo.
E simapepo winji wino wakolana nu Melkizedeki
15Kanonzi chonsi chamanyikwa chalusya; esimapepo wino wakolana nu Melkizedeki, wee watunka. 16Weni atimisilwe pawusimapepo namasundo yawulawa. wimisilwe amuno uwumi wakwe wusi ninsilo. 17Amuno Amawaliko Matele yavwanga yati, Ulilanga wesimapepo wamuyayaya, uwamwata wakwe Melkizedeki. 18Achaleka fwandi isundo kali lyakankamulwa, amuno lyatontechezile swinya lyalinji alyavye. 19Amuno amasundo yakwe Musa yatalesile ichintu chimwi achilungamana. Achaleka kanonzi ukulolela kuzima kwasokoloka, kuno kwatupalamizya papipi nu Leza.
20Choo chitupu pole, nkandi nukulapa kuno Leza walafile. Leza atatela alape kali pano wanji wimisilwe pawusimapepo. 21Ukuwa Yesu weni wimisilwe pawusimapepo muno akulapa kuno Leza walafile, pane wamunenile ati,
Imfumu yalapa,
italilapuluka:
Yati, Uliwa wesimapepo wapena-pe.
22Uwusyanonye woo, awuno waleka Yesu wawa wekupanichisya kwilayano lusye.
23Kuli uwusyano nawunjinye: wasimapepo wanji wawo wavulinkine muno wafwanga nimilimo yawo isilila panzila. 24Ukuwa e Yesu weni awawumi wamuyayaya, numulimo wakwe uwawusimapepo wusilechenkanwa kwakwe winji. 25Achaleka weni kanonzi namanda yonsi ali namaka yakutulila wonsi wane wakuya kwe Leza muno weliwe. Amuno awamuyayaya, akawalambilizizya kwakwe Leza.
26Achaleka fwandi, e Yesu, awili simapepo witu umukulu wino akamalizya intazi zitu. Amutele; asi ninzyoto lyaluwembu lumwi; wapawulwa ukufuma kuwawembu watumpulwa mupela-pela mwiyulu. 27Atakolana nawasimapepo wanji awakulu; weni asifima inzuwi wila wanda iyakuluwembu lwakwe, nanti ayakuluwembu lwawantu. Weni inzuwi yakwe yalinji lyonganyensu, pano umwenechonye wayifimile. 28Amasundo yakwe Musa yeni yakasola awantu wawembu awawa awasimapepo wakulu; ukuwa ilayilizyo lyakwe Leza Iyeni alyachilapo, lyasyalichizile ukwiza, alyimika Umwana, wino amwengu wamayayaya.
Currently Selected:
Hebrews 7: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
