Hebrews 6
6
1Aleni fwandi, tutele tulandalile nimisambilizizye yavyachisongo tusyalichizye amasambilizyo yakutalika aya wu Klistu. Tutize swinya tutalike ulufula ulwakufuntuka kumilimo yavye tusuwile Leza; 2namasambilizyo yibatizo nukuwika amakasa pawantu, ayakuzyulupulwa kwawafwe nga nukusundwa kwamuyayaya, 3Swili tuwalukuya! Ndi Leza watuzimilizya, twazipila ukuchita wonye-woo.
4Ngafwandi awantu wane watela wapona wanganyoswa swinya wuli ukuti watontolokwe? Pakutalika walinji mukuwala kwakwe Leza. Watomile ichawila chamwiyulu awachipochelela nukuchipochelela mwakwe Muzimu Mwimichile. 5Awamanya uwuzimu wamazwi yakwe Leza, nukuoochelela amaka yampindi yino iliyiza. 6Ukuwa awapona! Kutanga kuwe uwakuwatontolosya swinya, amuno wakunyoka wakupamantila Umwanakwe Leza pawuchingane swinya, wakumusonzya insoni palwenze.
7Leza akapepa umusili wuno wukapochelela imvula yino ikawutonyelela, umusili wuno wukamezya ivizawalo vizima vino awantu wakalima. 8Ukuwa ndi umusili wati wuwamezya imyunga ninswaswa awutela awavye; nu Leza angawutipa, wochwe numulilo.
9Ukuwa chingatenga tukuvwanga wonyewoo, kweni mwenji, wakundwe wane, tukuwasuwila. Twamanya kuno mwapepwa mwalusya amuno mwapepwa nukupepwa kwikomolwa linu. 10Leza asi ninkota, atalitela ayiwilile vino mwachita, nanti kwiwilila uluk undo luna mwamuchitizile kukwavwa kuno mwavwanga swinya muchili mukwavwa awina Klistu. 11Ukulondesya kwitu akwakuluchila ukuti wila muntu uwakwe mwemwe alemasye ukulolela konsi ukwizafika nakunsilo, alyakuti ivintu vino mukalolela vize vifiswe. 12Tusinakulonda ukuti muwe mwewakata, ukuwa mukole wane wakasuwila swinya wakalindilila chimyamya, ukupochelela chino Leza walayilizya.
Ilayilizyo lyakusimichila ilyakwe Leza
13Pano Leza walayilizyanga Abrahamu, walafile ukuchita chino walayilizizye. Muno kutalinji winji wino wakula wamulusya, pano walapanga walafile izina lyakwe. 14Ati, Nakulayilizya kuno ndikupepa njize nkupe ikwata yule. 15Abrahamu walindililanga numwezo munda, achaleka ayiza apochelela chino Leza wamulayilizizye. 16Awantu weni ndiwakulapa, wakalapa amazina yakwe wamwi wane wakula wawalusya, navyo ivilapo vikaputula imipanzi yino wakupanzyania. 17Leza weni walondanga ukuti awantu wane wangiza wapochelele chino walayilizize wamanye ichete-chete kuno atalikawuka; achaleka walayilizizye mbali nukulapa. 18Kuli ivintu viwili vyoo, vino atanga apilule swinya vino atanga awipe uwufi. Achaleka sweswe swewantu watufyusya tuli ninsimpo nkulu ukulemasya isuwilo litu lino watupa. 19Isuwilo lyoo lino tuli nalyo mumyezo yitu lili ngati aliwe lino uwato wome wanyepelelwa kweneko nanti kuti wusyembuke. Iwe litu lyasyanjisya mukasi-kasi muchakuchinga chamasyo mate le chamwiyulu. 20Yesu winjila mwenemo watutanjilila muno sweswe. Wawa wesimapepo mukulu wapenape, ndivino Melkizedeki walinji.
Currently Selected:
Hebrews 6: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
