Hebrews 4
4
1Achaleka fwandi aleni, ngavino Leza watulayilizya ukwiza Yinjila mukupuza apaliponga nawe, fwandi tule tuwatina, alyakuti wumwi uwakwe mwemwe atize ayize apotwe ukwinjila mukupuza. 2Amuno twayivwila Ilandwe zima, ndivino wawo wivwile. Wano chingatenga wivwile Amazwi Matele, lelo yatatela yawafungulile chimwi, amuno walanga pano wivwa awakana ukuyapochelelela nisuwilo. 3Achaleka fwandi, swewantu tukusuwila, twinjile tukapuzange apaliponga nu Leza. Ndimuno watachila wati,
Nafulichizilwe nkaninye ndapa inti,
Watalitela winjile mukupuza kwane nawanda!
Wavwanjizile chonye-choo muno umulimo wakwe uwakwelewula insi watezile wasila. 4Amuno Amawaliko Matele yamwi yavwanga yati, Leza wapuzile kumilimo yonsi pawanda wachitimunenulamoali. 5Swinya wanyoka wavwanga wati, Watalitela winjile mukupuza kwane nawanda. 6Wawo wane watalichizile awivwa Ilandwe zima watatela winjile mukupuza apaliponga nu Leza amuno wakanile ukusuwila. Achaleka kweni, kuli wanji, wane wazumilizwa ukwinjila mwenemo nukupuza apaliponga nu Leza. 7Choo chamanyikwa palwenze amuno Leza wasonta uwanda wunji, wuno witwa ukuti, Ilelonye-lyoo. Wavwanjizile mumulomo wakwe Davidi kali kuvyawandanye wowo, mumazwi matele yayo yano nataka ukuti,
Ilelo ndimwivwa izwi lyakwe Leza,
mutize mutumbe.
8Ukuwa ndachino Joshua wakolelezile awantu mukupuza kwakwe Leza, Leza ngali atavwanzile swinya ivyawanda wunji. 9Achaleka ee kweni, kuli ukupuza kwawantu wakwe Leza ndivino ukupuza kwakwe Leza ukwawanda wachitimunenulambali. 10Amuno wensi wino winjila mukupuza kwakwe Leza akatela wapuza nakumilimo yakwenye, ndivino Leza wapuzile. 11Aleni fwandi tulungame mukuyapuza apaliponga nu Leza. Kutize kuwe wumwi nanti wenga uwakwe sweswe, uwakuti akane ukutontela ndivino wawo wachisile nga ayize apotwe ukwinjila.
12Amuno izwi lyakwe Leza alyawumi swinya likawomba nkaninye. Lyakola nkaninye ukulusye ulukala. Likalasa alilepulania mumwezi mukasi-kasi muno umwezo vyasunkana numuzimu, namalimbilwe yasunkana nimifyompa. Likapanzya ukulonda kwamelengania yawantu mumyezo. 13Pasi chimwi chino chingavwama kwakwe Leza. ivintu vyonsi vino vyatumbulwa vyaloleka palwenze pakwe weliwe; kwakwe wino tukaluwulula ivintu vyonsi.
E Yesu e simapepo mukulu
14Achaleka aleni fwandi, tulemasye isuwilo litu lino wasuwila chikalae chiti-ndi. Amuno tuli nusimapepo mukulu wino waya winjila pankolelo pakwe Leza—e Yesu, Umwanakwe Leza. 15E simapepo witu umukulu asi awino angakana ukutufwila inkumbu muwutonte witu. Ukuwa kweni, tuli nusimapepo witu umukulu wino welezizwe mwakwe vyonsi ndivino sweswenye, ukuwa atetela awembuke. 16Fwandi aleni, tusinge, tukapalamile pandulu yakwe Leza, akatufwile inkumbu. Kokonye akuno alitulola uluse atufwile inkumbu atwavwe pano tukulunkuwa.
Currently Selected:
Hebrews 4: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
