Hebrews 2
2
Itulwa kulu
1Achaleka twakana tuwalemasya isuwilo lino twivwa achikala achitindi, alyakuti tutize tusendwe. 2Amuno amazwi yano awangeli wavwanzile yalinji ayakusimichila, achaleka wensi wino wakanile ukuyapochelela nanti akuyatontela wapochelezile ukusundwa kwakwe. 3Achaleka ngafwandi, tungiza tupusuke wuli nditwakana ukupechela itulwakulu ndilyoo? Pakutalika a Mfumu-nye nalwakwe awino wawumbuzile ivyitulwanye lyoo, nawonsi wane wamwivwile wapanichisizye ukusimichila kwakwe. 4Pampindinye yoyo nu Leza-nye ayonjelezya uwukalola wakwe kukulanjizya ivimanyilo vyamaka, nivizungusyo, nivyamayele vyamisango-namisango. Swinya wasasizye nivyawila vyakwe Muzimu Mwimichile ndivino ukulonda kwakwe kuli.
We Yesu wenganye-nsu awili Katula
5Leza atatela ayimike awangeli ukuti wize wawe awakapanzya wansi yino wakasi ukwelewula—insi yino tukutaka. 6Ukuwa, ndivino Amawaliko Matele yavwanga yati,
We Leza, nga umuntu nawe awachani,
wino wawika insingo peweliwe;
umuntu wavye-wavye, wino wapechela?
7Wamuchefizye kuwangeli kumpindi ntichi;
wamuzwisile akamba kamuchinzi,
8wamulasika pavintu vyonsi.
Yawalikwa yati, Leza welewuzile umuntu amulasika pavintu vyonsi; choo chataka wilachintu chonsi. Ukuwa kanonzi tusilola kuno umuntu akapanzya ivintu vyonsi. 9Ukuwa tukalola e Yesu wino wachefizwe pawangeli akapindi katichi, alyakuti muno ankumbu zyakwe Leza afwile awantu wonsi. Kanonzi tukumulola wazwikwa akamba kakuchindamikwa kwakwe muno amfwa yakwe yino wafwile. 10Chayine muno e Leza ekelewula swinya ekasunga wakwe vyonsi, aleke Yesu awe amuntumuntu muno akuyimba, alyakuti aleke awana wavule winjile muwukankala wakwe. Amuno we Yesu-nye awino akawatungulula kwitulwa.
11Weliwenye awino akaswefya awantu kuluwembu lwawo, weliwenye nalwakwe apaliponga nawano akaswefya awakwe yisi wenga. Achaleka Yesu as ifwa insoni zyakuwita ukuti awanawitu.
12Pano akutanji,
We Leza, nandi ndawumbulila awanawitu ivyako;
nandi ndakutumvya pamawumba yawo yonsi.
13Swinya akutanji, Ndiwika insingo yane pakwe Leza. Swinya akutanji, Panye-paa indi nawana wane Leza wampa.
14Vino awana, wali numuwili nuwazi, nu Yesu-nye nawe nalwakwe wawile wakwe woliwo atola umwata wawuntu. Wachisile wowonye alyakuti muno amfwa yakwe ayonone Umuwipe, wino ali namaka yamfwa, 15nga asapule wonsi wane walinji awazya muwulanzi wawo wonsi amuno watingana imfwa. 16Amuno nachawuzimanye asikwavwa awangeli. Ukuwa, ndivino yawalikwa mu Mawaliko Matele yati, Akwavwanga ikwata lyakwe Abrahamu. 17Chino chikusula kuno wakoline nawanyina mwakwe vyonsi, alyakuti awe amusuwilwa pakwe woliwo mbali nuluse awe wesimapepo mukulu mumulimo wakwe Leza, alyakuti uluwembu lwawantu lutetelwe. 18Achaleka muno weliwe nalwakwe welezizwe achula, ali namaka yakwavwa wano wakwelezwa.
Currently Selected:
Hebrews 2: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
